كۇن وتكەن سايىن قانشاما وتانداستارىمىز ايتىپ كەلمەيتىن اپاتتىڭ ازۋىندا كەتىپ جاتىر. كەيبىرىنىڭ دەرتى اسقىنىپ, ەمدەۋ شيپا بەرمەسە, ەندى بىرىنە قاجەتتى ءدارى-دارمەك ۋاقتىلى جەتپەي اجال قۇشۋدا. وسىلايشا وتاندىق فارماتسەۆتيكانىڭ دا ۇدەپ بارا جاتقان ىندەتكە قارسى تۇرارلىق قاۋقارى ازايا تۇسكەنى بەلگىلى.
وسىناۋ قيىن-قىستاۋ شاقتا شىمكەنت قالاسىنداعى «حيمفارم» كاسىپورنى جانە «زەردە-فيتو» فارماتسەۆتيكالىق كومپانياسى قالاداعى دارىحانالارعا ۇزدىكسىز ءدارى-دارمەك جەتكىزە باستادى.
بۇل ءبىرىنشى كەزەكتە شەتەلدەن كەلەتىن تاۋارعا قاراپ قالماي, ءوز ونىمدەرىمىزبەن ناۋقاستاردى ەمدەۋگە سەپتىگىن تيگىزدى. سونىمەن قاتار مەديتسينالىق كومەكتى ءوز ۋاقىتىندا كورسەتۋدى قامتاماسىز ەتۋ ءۇشىن بىرىڭعاي ديستريبيۋتور ارقىلى 207,1 ملن تەڭگەگە قوسىمشا ءدارى-دارمەكتەر مەن مەديتسينالىق قۇرالدارعا تاپسىرما بەرىلدى. بۇگىنگى كۇندە 76,8 ملن تەڭگەگە تاۋار جەتكىزىلدى.
مونيتورينگ ناتيجەسى بويىنشا كوپتەگەن ءدارىحانادا ءدارى-دارمەك قورى جەتكىلىكتى. تۇرعىندار سۇرانىسىنىڭ كوبەيۋىنە وراي ىستىقتى تۇسىرەتىن دارىلەردىڭ (پاراتسەتامول, ەففەرالگان, پانادول, نۋروفەن, يبۋپروفەن, نيمەسۋليد) 238 486 قوراپ قورى بار. ونىڭ ىشىندە ءدارىحانا قويمالارىندا 115 389 قوراپ بولسا, ءدارىحانالاردا 123 097 قورابى ساقتالعان.
ال ۆيرۋسقا قارسى دارىلەردىڭ (ينگاۆيرين, ەرگوفەرون, كاگوتسەل, ارپەفليۋ) قورى – 38 187 قوراپ, ونىڭ ىشىندە 25 518 قورابى ءدارىحانا قويمالارىندا, ال ءدارىحانالاردا 12 869 قورابى بار.
تۇرعىندار ءبىرىنشى كەزەكتە سۇرايتىن انتيبيوتيكتەردىڭ (ازيتروميتسين, تسەفترياكسون, تسەفيكسيم, اموكسيتسيللين, لەۆوفلوكساتسين) 592 899 قوراپ قورى بولسا, ونىڭ ىشىندە ءدارىحانا قويمالارىندا 502 788, ءدارىحانالاردا 90 101 قورابى ساۋدالانۋدا.
دەي تۇرعانمەن, ءدارى-دارمەك شىعاراتىن زاۋىت وكىلدەرى قۇرالداردىڭ ماكسيمالدى تۇردە ءوندىرىلىپ جاتقانىن ايتادى. الايدا حالىقتىڭ سۇرانىسى كۇننەن-كۇنگە ارتىپ كەلەدى. وسىعان بايلانىستى تاپشىلىق پايدا بولعان.
ء«بىز ەلدى ءدارى-دارمەكپەن قامتۋ ءۇشىن قولدان كەلگەننىڭ ءبارىن جاساپ ءجۇرمىز. باعانىڭ قىمباتتاپ كەتپەۋى ءۇشىن دەلدالدار قاتارىن كوبەيتپەۋگە دە تىرىسىپ الەكپىز. بارلىعى جۇرتتىڭ دەنساۋلىعى ءۇشىن جاسالىپ جاتىر», دەيدى «حيمفارم» اق SANTO كومپانياسىنىڭ ديرەكتورى يرينا چۋبلۋكوۆا.
قازىرگى تاڭدا قالادا ۆيرۋسقا قارسى دارىلەرگە سۇرانىس جوعارىلاپ, فارماتسەۆتيكالىق كومپانيالار تاپسىرىسىن 5 ەسەگە ارتتىرعان. شاھارداعى «حيمفارم» كومپانياسىمەن قاتار «زەردە-فيتو» كومپانياسى توتەنشە جاعداي كەزىندە ءونىم كولەمىن ارتتىرۋ ءۇشىن ءۇزىلىسسىز جۇمىس ىستەپ جاتىر.
اتالعان كومپانيا وكىلدەرىنىڭ مالىمەتىنشە, قازىرگى تاڭدا ءدارىحانالاردا پاراتسەتامولدىڭ 50-گە تارتا انالوگى بار.
«كورشىلەس جامبىل, قىزىلوردا, تۇركىستان وبلىستارىنان سۇرانىس كوپتەپ تۇسۋدە. ەڭ ءبىرىنشى شىمكەنت قالاسىن تولىعىمەن قامتىپ بولعان سوڭ عانا وزگە قالالارعا جىبەرىلەدى», دەيدى سالا ماماندارى.
ال «SANTO» ءدارى-دارمەك زاۋىتىندا ينەكتسيالىق ەرىتىندىلەر مەن ينفۋزيالار, قاتتى پەرورالدى دارىلىك زاتتار (تابلەتكالار, ساشە, تۇيىرشىكتەر), انتيبيوتيك ۇنتاقتارى, ستەريلدى ەمەس ەرىتىندىلەر شىعارىلادى. تاپسىرىس كولەمىنىڭ ارتۋىنا بايلانىستى شىعارىلاتىن ءونىم دە كوبەيگەن.
«830 قىزمەتكەر تاۋلىك بويى ءتورت اۋىسىمدا جۇمىس ىستەۋدە. ءونىمنىڭ 70 پايىزى – كوتەرمە, 30 پايىزى بولشەك باعادا ساتىلۋدا», دەدى كومپانيانىڭ ءوندىرىس جونىندەگى ديرەكتورى سۆەتلانا مايورسكايا.
قالادا «اقنيەت», «زەردە» كومپانيالارى ءجۇز شاقتى دارىحاناعا ەكى مەزگىل ءدارى جەتكىزىپ, ديستريبيۋتەرلەر قويمالاردى كۇنىنە 2-3 كولىك ءدارى-دارمەكپەن تولتىرىپ جاتىر.
ميلليوندى قالادا بىرنەشە فارم كومپانيالاردىڭ ءونىمى قاجەتتىلىكتى تولىق قامتاماسىز ەتە المايتىنى راس. ءبىر قىزىعى, قالاداعى ءدارى-دارمەك تاپشىلىعىن قولدان جاساپ وتىرعان جاعداي دا جوق ەمەس. ولاي دەيتىنىمىز, ءدارى-دارمەكتىڭ جەتىسپەۋشىلىگىن الىپساتارلار قولدان ۇيىمداستىرىپ وتىر. بۇل جونىندە وتكەن اپتادا ۆيتسە-پرەمەر ەرالى توعجانوۆ ايتقان بولاتىن. پرەزيدەنت تاپسىرما بەرگەننەن كەيىن شىمكەنتتە ءدارى-دارمەكتى قىمبات باعاعا ساتىپ جۇرگەندەر ۇستالدى.
وكپەنى جاساندى جەلدەتۋ اپپاراتى شىعارىلادى
بۇگىندە شىمكەنتتە ناۋقاستارعا اسا قاجەتتى قۇرالدىڭ ءبىرى – وكپەنى جاساندى جەلدەتۋ اپپاراتى. ىندەت جۇقتىرعاندار سانىنىڭ ارتۋىنا وراي شەتەلدەن كەلەتىن بۇل قۇرال بارلىق ەمدەلۋشىلەرگە جەتپەي وتىر. وسىناۋ قىسىلتاياڭ شاقتا وتاندىق مەديتسينالىق قۇرال-جابدىقتار وندىرەتىن «Kazmedpribor Holding» جشس اتالعان اپپاراتتى وزدەرىندە وندىرەتىن بولدى.
بۇل اقجولتاي جاڭالىقتى شىمكەنت قالاسىنىڭ اكىمى مۇرات ايتەنوۆ الەۋمەتتىك جەلىدەگى پاراقشاسىندا جاريالادى. سونداي-اق قالا باسشىسى «Kazmedpribor Holding» جشس ديرەكتورى راحات بايزاقوۆپەن پاندەميامەن كۇرەس ماسەلەلەرىن تالقىلادى.
راحات تۇرعانبەك ۇلى قالا تۇرعىندارىنا 150 دانا توسەكتىك ورىن, ينفۋزيا قۇيۋعا ارنالعان 400 دانا شتاتيۆ جانە 40 دانا مەديتسينالىق باعانا سىيلادى.
ءوزىنىڭ العىسىن بىلدىرگەن قالا اكىمى جاقىن ارادا اكىمدىك قولداۋىمەن «Kazmedpribor Holding» جشس-ءى ءوجج اپپاراتىن شىعاراتىنىن جەتكىزدى.
ء«بىز بۇل جوبامەن ءۇش اي بويى جۇمىس ىستەدىك. ەندىگى كەزەكتە قاجەتتى سەرتيفيكاتتى الساق, اپپاراتتى شىعارا باستايمىز. الدىمەن, قالانى تولىعىمەن قامتىپ, سودان كەيىن ەلىمىزدىڭ وزگە قالالارىنا كومەكتەسەتىن بولامىز. بۇگىنگى باستى جاعىمدى جاڭالىق وسى», دەدى م. ايتەنوۆ.
قازىرگى تاڭدا قالاداعى مەديتسينالىق مەكەمەلەردە 323 ءوجج اپپاراتى, ونىڭ ىشىندە 130 ءپورتاتيۆتى اپپارات بار. سونداي-اق 250 «بوبروۆ» تىنىس الۋ اپپاراتى, 10 مونيتورمەن قامتاماسىز ەتىلگەن.