«سامۇرىق-قازىنا» اق اكتيۆتەردى جەكەشەلەندىرۋ بويىنشا كەشەندى جۇمىستاردى كەزەڭ-كەزەڭىمەن ويداعىداي جۇزەگە اسىرۋدا. وسى رەتتە «سامۇرىق-قازىنا» ۇاق» اق باسقارما توراعاسى احمەتجان ەسىموۆ پەن «استانا» حالىقارالىق قارجى ورتالىعىنىڭ باسقارۋشىسى قايرات كەلىمبەتوۆ ءوزارا تۇسىنىستىك تۋرالى مەموراندۋمعا قول قويدى.
اتالعان قۇجاتقا سايكەس تاراپتار احقو بيرجاسىندا قور كومپانيالارى اكتسيالارىنىڭ ليستينگى ماسەلەلەرى بويىنشا تىعىز ىنتىماقتاسۋعا جانە كەڭەس بەرۋگە نيەت ءبىلدىرىپ وتىر.
– جەكەشەلەندىرۋ باعدارلاماسىن ورىنداۋدى اياقتاۋ «سامۇرىق-قازىنا» قورى ءۇشىن باستى مىندەتتەردىڭ ءبىرى بولىپ تابىلادى جانە قور احقو-نىڭ دامۋىنا اسا مۇددەلى. «قازاتومونەركاسىپ» عالامدىق دەپوزيتارلىق قولحاتتارىن ورنالاستىرۋ تاجىريبەسى ونىڭ كەلەشەكتە بيرجالىق الاڭ رەتىندە پەرسپەكتيۆاسىن كورسەتتى, – دەپ اتاپ ءوتتى قور باسقارماسىنىڭ توراعاسى احمەتجان ەسىموۆ.
ىنتىماقتاستىق بارىسىندا قوردىڭ كومپانيالار توبى جاساعان شارتتار بويىنشا داۋلاردى شەشۋ ينستيتۋتى رەتىندە احقو حالىقارالىق تورەلىك ورتالىعى مەن سوت ەسكەرتپەلەرىن ەنگىزۋ ارقىلى احقو يۋريسديكتسياسىن بەلسەندى قولدانۋ كوزدەلەدى. سونىمەن قاتار قور مەن «استانا» حالىقارالىق قارجى ورتالىعى احقو-نىڭ ەكسپات ورتالىعى جانە ۇزدىكسىز كاسىبي دامۋ بيۋروسىنىڭ مۇمكىندىكتەرىن پايدالانۋعا جانە قارجىلىق تەحنولوگيالار, Big Data جانە احقو-نىڭ فينتەح-يننوۆاتسيانى رەتتەۋشى سالاسىندا ىنتىماقتاستىق ورناتۋعا نيەت ءبىلدىردى.
– ءبىزدىڭ پلاتفورمانىڭ مۇمكىندىكتەرى مەن قىزمەتى جەدەلدەتىلگەن تسيفرلاندىرۋ ارقىلى سۇرانىس تابادى. بۇل كراۋدفاندينگكە دە, تسيفرلى پلاتفورمالار ارقىلى سان ءتۇرلى كومەك الۋ, تسيفرلى بانكتەر, ۇزدىكسىز ءبىلىم الۋ ترەندى, ياعني ءداستۇرلى ۋنيۆەرسيتەتتەردىڭ تولىقتاي ونلاين پلاتفورماسىن مەڭگەرۋىنە تيەسىلى. ءبىز قورعا ءبىزدىڭ الاڭىمىزدى جانە رەسۋرستارىمىزدى قولدانۋدا بارىنشا كومەك كورسەتۋگە دايىنبىز, – دەدى احقو باسقارۋشىسى قايرات كەلىمبەتوۆ.
قور مەن احقو جەكەشەلەندىرۋدىڭ 2016-2020 جىلدارعا ارنالعان كەشەندى جوسپارى اياسىندا تابىستى ىنتىماقتاستىقتا بىرقاتار جوبانى ىسكە اسىرىپ كەلەدى. ماسەلەن, «سامۇرىق-قازىنا» ۇاق» اق قازاتومونەركاسىپتىڭ بۇرىن ورنالاستىرىلعان اكتسيالارىنا قولايلى سۇرانىستى پايدالانا وتىرىپ, «قازاتومونەركاسىپ» كومپانياسىنىڭ اكتسيالارى مەن جاھاندىق دەپوزيتارلىق قولحاتتارىن قوسىمشا ورنالاستىرۋ پروتسەسىن اياقتادى. ولاردى لوندون قور بيرجاسىندا (LSE) جانە استانا حالىقارالىق قارجى ورتالىعىنىڭ بيرجاسىندا (AIح) ورنالاستىرۋ قورىتىندىسى بويىنشا كومپانيا اكتسيالارىنا ينۆەستورلار تاراپىنان سۇرانىس ۇسىنىستان 2,9 ەسە اسىپ ءتۇستى.
وسىلايشا, كومپانيا اكتسيالارىنىڭ 6,28%-ى 211 ملن اقش دوللارى نەمەسە 85 ملرد تەڭگەگە ساتىلدى. حالىقارالىق ينۆەستورلار اكتيۆتەرگە ۇلكەن قىزىعۋشىلىق تانىتۋىنىڭ ارقاسىندا AIX-تا ورنالاسقان «قازاتومونەركاسىپتىڭ» 4,3 ملن گلوبالدى دەپوزيتارلىق قولحاتتارىنىڭ ىشىنەن شەتەلدىك ينستيتۋتسيونالدى ينۆەستورلار 2,5 ملن GDR ساتىپ الدى.