بۇگىن, 10 قازان كۇنى تۇندە فارەر ارالدارىنىڭ اكىمشىلىك ورتالىعى – تورسحاۆن قالاسىندا قازاقستان قۇراماسى 2014 جىلى برازيليادا وتەتىن الەم چەمپيوناتىنىڭ ىرىكتەۋ تۋرنيرىندە جەرگىلىكتى قۇراما كوماندامەن كەزدەسىپ, 1:1 ەسەبىمەن تەڭ ءتۇستى. بۇل تۋرالى Egemennews.kz ءتىلشىسى حابارلادى.
الدىمەن فارەر ارالدارى دەگەن قانداي ەل, اڭگىمەنى سودان باستايىق. شىنىن ايتقاندا, بۇل – جەكە تاۋەلسىز دەربەس مەملەكەت ەمەس. ول – دانيا مەملەكەتىنىڭ قۇرامداس ءبىر بولىگى. ارال 1380 جىلدان دانيا كورولدىعىنىڭ قۇرامىندا كەلەدى. ال 1948 جىلدان دانيانىڭ اۆتونوميالىق وبلىسى بولىپ تابىلادى. حالقىنىڭ سانى - 48 مىڭ ادام. بۇل بىزدەگى ەڭ شاعىن اۋدانداردىڭ حالقىمەن بىردەي. وتكەن جولى ءبىز اتلانت مۇحيتىنىڭ سولتۇستىك-شىعىس بولىگىندە, نورۆەگ تەڭىزىندە ورنالاسقان, جانارتاۋلاردىڭ اتقىلاۋىنان پايدا بولعان بۇل ارالدار توبىن شىمكەنتتىڭ تۇبىندەگى 45 مىڭ حالقى قارابۇلاق اۋىلىمەن سالىستىرعان ەدىك. بۇل جەرگە ءبىر زامانداردا تۇستىكتەگى ۆيكينگتەردىڭ ءبىر تارماعى – يسلاندتار كەلىپ, وسىندا ماڭگى قالىپ قويعان. قاندىق جانە تىلدىك جاعىنان يسلاندتار مەن داتتار ءبىر اعاشتىڭ ەكى بۇتاعى سياقتى. ەكەۋىنىڭ ءتۇبىرى ءبىر. تىلدەرى دە بىردەي ەسەپتى. بۇل جاعىنان ولار ۆايناحتىڭ ەكى تارماعى – شەشەندەر مەن ينگۋشتارعا قاتتى ۇقسايدى. بولماسا, تىلدىك جاعىنان دا, گەنەتيكالىق جاعىنان دا ءتۇبى ءبىر حالىق بولىپ كەلەتىن قازاق پەن نوعاي سەكىلدى. قازاقتىڭ ءبىر قاناتى بولىپ تابىلاتىن سول نوعايلاردا قازىر «قازاق, نوعاي – ءبىر ادام» دەگەن ماقال بار.
ەندى ويىنعا كەلەيىك. كوماندالار الاڭعا مىنا قۇرامداردا شىقتى:
فارەر - نيلسەن, نەس, تراۋست-داۆيدسەن, بالدۆينسسون, داۆيدسەن, ۋدسەن, بەنيامينسەن, حانسسون, يۋستينۋسسەن, لامحاۋگە-حولست, ەدمۋندسسون (كلەتسكار, 75).
قازاقستان - سيدەلنيكوۆ, گۋرمان, مۋلداروۆ (لوگۆينەنكو, 79), كيسليتسىن, ەنگەل, كوروبكين, بوگدانوۆ, فينونچەنكو (ششەتكين, 90), شومكو, جۇماسقاليەۆ (بايجانوۆ, 64), حيجنيچەنكو.
كەزدەسۋدىڭ باس جاعى الما-كەزەك شابۋىلمەن ءوتتى. بىراق الاڭ يەلەرى بىرتىندەپ تىزگىندى وزدەرىنە قاراي تارتا باستادى. سونىڭ ىڭعايىندا ولار قاقپاعا دا كوبىرەك جانە قاۋىپتىرەك سوققىلاردى جاساۋعا كوشتى. بۇرىشتاما ايىپ دوبىن دا سولار ۇرىپ جاتتى. ال ءبىزدىڭ جىگىتتەر ايىپ الاڭىنان اسىرىپ دوپ شىعارعاننان ارتىققا بارا المادى. ءبىزدىڭ ناعىز كاسىپقوي فۋتبولشىلارعا قاراعاندا, جارتىلاي كاسىپقوي جانە اۋەسقوي ويىنشىلاردان قۇرالعان كوماندا وسىلاي الاڭ ۇستىندە ۇستەمدىك كورسەتۋگە كىرىستى. سونداي شابۋىلداردىڭ بىرىندە, ماتچتىڭ 41-مينۋتىندا حالليۋر حانسسون ەسەپ اشىپ كەتتى.
كەزدەسۋدىڭ ەكىنشى تايمى دا الاڭ يەلەرىنىڭ شابۋىلىمەن باستالدى. جەتىسايدىڭ «ماقتاارالىنداي» عانا كوماندا ءبىزدىڭ جىگىتتەردىڭ اپشىسىن قۋىرۋىن جالعاستىرا بەردى. سودان كەيىن عانا قازاقستاندىقتار ءوز-وزدەرىنە كەلىپ, بىرتىندەپ العا شىعۋدى ۇدەتتى. بۇلار جورىقتاردىڭ اراسىندا قاۋىپتىلەرى دە كوبەيە ءتۇستى. اقىرى قوناقتار وسى شابۋىلداردان ناتيجە شىعارا الدى. قاقپا الدىنداعى كەزەكتى قاربالاس ساتتە دوپقا ءبىرىنشى بولىپ الەكسەي مولداروۆ جەتتى. بىراق ونىڭ سوققىسى دۇرىس شىقپادى. سوسىن ونىڭ اياعىنان ۇشقان دوپقا اندرەي فينونچەنكو باسىن توسەي سالدى. ول بارىپ اشىق قاقپاعا گۇمپ ەتتى. گول! ەسەپ 54-مينۋتتا وسىلاي تەڭەستى.
قوناقتار بۇدان كەيىن دە ءبىرشاما شابۋىلدار ۇيىمداستىردى. بىراق ونىڭ جالىنى كوپ ۇزاماي باسىلىپ قالعانداي بولدى. سونى پايدالانعان الاڭ يەلەرى تاعى دا العا ۇمتىلدى. مۇنىڭ ناتيجەسى – قاقپاعا قاۋىپتى ساتتەر تاعى دا كوبەيدى. سونىڭ بىرەر ساتىندە بىرەسە اندرەي سيدەلنيكوۆ ابجىلدىك تانىتسا, بىرەسە قورعاۋشىلار قاۋىپ بۇلتىن سەيىلتىپ تۇردى.
كەزدەسۋدىڭ سوڭعى جاعىندا فارەرلىكتەر ءتىپتى ورشەلەنىپ كەتتى. ولار بىرنەشە رەت شىن مانىندە دە قاۋىپتى ساتتەر تۋعىزدى. بىراق, ابىروي بولعاندا, ولاردىڭ بارلىعىن قايتارىپ تۇردىق.
الاڭداعى تورەشىنىڭ ىسقىرىعى الاڭ يەلەرىنىڭ وسىنداي شابۋىلى ءجۇرىپ جاتقان كەزدە ەستىلدى.
ءبىزدىڭ قۇرامانىڭ ويىنى كوڭىلدەن شىققان جوق.
دامير قوجامقۇل.
قازىرگە دەيىن مىنا قۇرالامالار اراسىنداعى ويىندار اياقتالدى:
حورۆاتيا – بەلگيا 1:2
ارمەنيا – بولگاريا 2:1
ازەربايجان – سولتۇستىك يرلانديا 2:0
ليتۆا – لاتۆيا 2:0
مولدوۆا – سان-مارينو 3:0