سەنات توراعاسى قايرات ءماميدىڭ جەتەكشىلىگىمەن وتكەن پالاتانىڭ كەشەگى جالپى وتىرىسىنىڭ كۇن ءتارتىبى بويىنشا ءتورت ماسەلە قارالدى. دەپۋتاتتار بۇل جولى بالقاش جىلۋ ەلەكتر ستانساسى مەن ەڭبەك كوشى-قونى ماسەلەلەرىنە قاتىستى زاڭ جوبالارىن قىزۋ تالقىدان وتكىزدى.
سەنات توراعاسى قايرات ءماميدىڭ جەتەكشىلىگىمەن وتكەن پالاتانىڭ كەشەگى جالپى وتىرىسىنىڭ كۇن ءتارتىبى بويىنشا ءتورت ماسەلە قارالدى. دەپۋتاتتار بۇل جولى بالقاش جىلۋ ەلەكتر ستانساسى مەن ەڭبەك كوشى-قونى ماسەلەلەرىنە قاتىستى زاڭ جوبالارىن قىزۋ تالقىدان وتكىزدى.
كۇن تارتىبىندە الدىمەن پالاتا قازاقستان پرەزيدەنتىنىڭ ۇلتتىق بانك توراعاسىن تاعايىنداۋىنا كەلىسىمىن بەرۋ ماسەلەسىن قاراپ, ول بويىنشا ءتيىستى قاۋلىعا قولداۋ ءبىلدىردى. ەلباسىنىڭ قايرات كەلىمبەتوۆتى تاعايىنداۋعا كەلىسىم بەرۋ ءوتىنىشىن پرەزيدەنت اكىمشىلىگىنىڭ باسشىسى كارىم ءماسىموۆ جەتكىزدى.
بۇدان كەيىن دەپۋتاتتار قازاقستان رەسپۋبليكاسى مەن كورەيا رەسپۋبليكاسى ۇكىمەتتەرى اراسىنداعى بالقاش جىلۋ ەلەكتر ستانساسىن دامىتۋ, قارجىلاندىرۋ, جوبالاۋ, سالۋ, پايدالانۋ جانە وعان تەحنيكالىق قىزمەت كورسەتۋ سالاسىنداعى كەلىسىمگە وزگەرىستەر ەنگىزۋ حاتتاماسىن راتيفيكاتسيادان وتكىزدى. بالقاش جىلۋ ەلەكتر ستانساسىنا قاتىستى كەلىسىمگە 2 جىل بۇرىن قول قويىلعان. ەنگىزىلگەن وزگەرىستەر ۇكىمەتتىڭ ەلەكتر ەنەرگياسى باعاسىن بەلگىلەيتىن قۇقىققا يە بولۋىن قاراستىرادى.
جالپى, قازاقستان تاراپىنان بۇل ينۆەستيتسيالىق جوباعا «سامۇرىق-قازىنا» ۇلتتىق ءال-اۋقات قورى» اق جاۋاپتى بولسا, ونى ىسكە اسىراتىن «سامۇرىق-ەنەرگو» اق. زاڭ جوباسى بويىنشا قىسقاشا بايانداپ بەرگەن پرەمەر-ءمينيستردىڭ ورىنباسارى – يندۋستريا جانە جاڭا تەحنولوگيالار ءمينيسترى اسەت يسەكەشەۆكە دەپۋتاتتار كوپتەگەن سۇراقتار قويىپ, ءوز ويلارىن ورتاعا سالدى. ماسەلەن, سۆەتلانا جالماعامبەتوۆا ەكىباستۇزدىق كومىردىڭ كۇلدىلىگى جوعارى ەكەنىن ايتىپ, ونى بايىتۋ ماسەلەسىن العا تارتتى. «سامۇرىق-ەنەرگو» اق باسقارماسىنىڭ توراعاسى الماسادام ساتقاليەۆتىڭ سوزىنە قاراعاندا, كومىردى بايىتۋ ءۇشىن باسقا شىعىنداردى ايتپاعاننىڭ وزىندە ۇلكەن كولەمدەگى سۋ قاجەت ەكەن. ونىڭ ايتۋىنشا, سونداي-اق, قورشاعان ورتاعا شىعاتىن تاستاندىلاردى سۇزگىدەن وتكىزۋ تالاپتارى ەۋروپالىق ستاندارتتارعا سايكەس جۇزەگە اسىرىلىپ وتىرعان كورىنەدى.
باسقارما توراعاسىنىڭ مالىمەتىنە قاراعاندا, ءبىر جىلدا جينالاتىن كۇل كولەمى 1,8 ميلليون توننا بولسا, سونىڭ 1,36 ميلليونى كۇلدى-يزۆەست تسەمەنتىن شىعارۋ تەحنولوگيالىق جەلىسىنە باعىتتالاتىنى بەلگىلى بولىپ وتىر. بۇدان باسقا, كۇلدى-كەراميكالىق جانە كۇلدى-بەتوندىق ونىمدەر شىعارۋعا دا قالدىقتار پايدالانىلادى دەپ جوسپارلانىپتى.
وسى رەتتە سەناتور قوجاحمەت بايماحانوۆ كۇلدى قالدىقتاردىڭ جوعارىدا اتالعان ونىمدەرىن شىعارۋ جارامدىلىعىنا ءوز كۇمانى بار ەكەنىن دە جاسىرمادى. جالپى, قازىرگى تاڭدا ەلىمىزدە قاتتى قالدىقتار كولەمى ميلليارد تونناعا جەتسە, بالقاش جەس-ىنەن شىققان قالدىقتار سونىڭ 2 پايىزىن عانا قۇرايتىنى دا ايتىلماي قالمادى. ەكىباستۇزدىق كومىردىڭ كۇلدىلىگى 40 پايىزعا دەيىن جەتەتىندىگىن كولدەنەڭ تارتقان سەناتور يران ءامىروۆ ەكولوگيالىق تاۋەكەل ەسكەرىلمەي وتىرعاندىعىنا قىنجىلىس ءبىلدىردى.
ءا.يسەكەشەۆ 2018 جىلى وڭتۇستىك وڭىرلەردە ەلەكتر ەنەرگياسىنىڭ جەتىسپەۋشىلىگى 2 مىڭ مەگاۆاتقا جەتەتىندىگىن ايتا كەلىپ, ينۆەستيتسيانىڭ 75 پايىزدىق ۇلەسىن كورەيلىك تاراپ سالىپ وتىرعان جوبانىڭ تيىمدىلىگىمەن ءبولىستى. سالىنعان ينۆەستيتسيا تولىق قايتارىپ الىنعاننان كەيىن جەس تەك قازاقستاندىق تاراپقا پايدا اكەلەدى.
كەشەگى وتىرىستا دەپۋتاتتار «قازاقستان رەسپۋبليكاسىنىڭ ۇكىمەتى مەن ليۋكسەمبۋرگ ۇلى گەرتسوگتىگىنىڭ ۇكىمەتى اراسىنداعى تابىس جانە كاپيتالعا سالىناتىن سالىقتارعا قاتىستى قوسارلانعان سالىق سالۋدى بولدىرماۋ جانە سالىق سالۋدان جالتارۋعا جول بەرمەۋ تۋرالى كونۆەنتسيانى جانە وسى كونۆەنتسياعا وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسىن قابىلدادى.
سونىمەن قاتار, سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەڭبەك كوشى-قونى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا ءبىرىنشى وقىلىمدا قولداۋ ءبىلدىرىپ, ماقۇلدادى. زاڭ جوباسى ەڭبەكشى كوشىپ كەلۋشىلەردى زاڭداستىرۋعا جانە كوشى-قون ۇدەرىستەرىن مەملەكەتتىك رەتتەۋدى جەتىلدىرۋگە باعىتتالعان.
اسقار تۇراپباي ۇلى,
«ەگەمەن قازاقستان».