اقوردادا مەملەكەتتىك حاتشى مارات ءتاجيننىڭ توراعالىعىمەن عىلىم مەن تەحنيكا سالاسىنداعى قازاقستان رەسپۋبليكاسىنىڭ مەملەكەتتىك سىيلىقتارىن بەرۋ جونىندەگى كوميسسيانىڭ قورىتىندى وتىرىسى ءوتتى.
اقوردادا مەملەكەتتىك حاتشى مارات ءتاجيننىڭ توراعالىعىمەن عىلىم مەن تەحنيكا سالاسىنداعى قازاقستان رەسپۋبليكاسىنىڭ مەملەكەتتىك سىيلىقتارىن بەرۋ جونىندەگى كوميسسيانىڭ قورىتىندى وتىرىسى ءوتتى.
عىلىم مەن تەحنيكا سالاسىنداعى مەملەكەتتىك سىيلىقتار عىلىم مەن تەحنيكا قايراتكەرلەرىنىڭ ەڭبەگىن قوعام مەن مەملەكەت الدىندا جوعارى باعالاۋ بولىپ سانالادى. ال قازاقستان پرەزيدەنتى مەملەكەتتىك سىيلىقتى قازاقستاننىڭ ازاماتتارىنا ەلىمىزدىڭ ەكونوميكالىق جانە الەۋمەتتىك دامۋىن ايتارلىقتاي جەدەلدەتۋگە, قازاقستاندىق عىلىم مەن تەحنيكانىڭ الەمدەگى وزىق جەتىستىكتەر دەڭگەيىنە شىعۋىنا اكەلەتىن ىرگەلى جانە قولدانبالى زەرتتەۋلەر سالاسىنداعى اسا ۇزدىك ناتيجەلەرى, قوعامعا كەڭىنەن تانىلعان ءبىر سالاداعى عىلىمي جاڭالىقتار, مونوگرافيالار مەن عىلىمي جۇمىستارى, سونداي-اق, تەحنيكانىڭ, ماتەريالدار مەن تەحنولوگيالاردىڭ الەمدىك انالوگتارى نەمەسە ودان جوعارى دەڭگەيدەگى جاڭا تۇرلەرىن ازىرلەگەنى جانە ءوندىرۋدى ۇيىمداستىرعانى ءۇشىن بەرىلەدى.
وسىعان وراي, مەملەكەتتىك حاتشى مارات ءتاجين بۇل وتىرىستا ەرەجەگە سايكەس, ەڭبەكتەردى تاعى دا ساراپتاپ, قورىتىندى شەشىم قابىلداۋ قاجەتتىگىن اتاپ ءوتتى. «بۇعان دەيىن ءبىلىم جانە عىلىم مينيسترلىگى ۇسىنعان جۇمىستارعا الدىن الا مەملەكەتتىك عىلىمي-تەحنيكالىق ساراپتاما جاسادى. قوعامدىق تالقىلاۋدان وتكىزدى. كوميسسيا عىلىم مەن تەحنيكا سالاسىنداعى قازاقستان رەسپۋبليكاسىنىڭ مەملەكەتتىك سىيلىقتارىن بەرۋ تۋرالى پرەزيدەنتكە ءوز ۇسىنىسىن بەرەدى», دەدى مارات ءتاجين. مەملەكەتتىك حاتشىنىڭ ايتۋىنشا, كوميسسيانىڭ شەشىمى قۇپيا داۋىس بەرۋ ۇدەرىسى ارقىلى جۇرگىزىلەدى. سايكەسىنشە, مەملەكەتتىك سىيلىقتار كوميسسيا مۇشەلەرىنىڭ 50 پايىزدان تومەن ەمەس داۋىسىن جيناعان ەڭبەكتەرگە بەرىلەدى.
بۇل كۇنگى وتىرىستىڭ كۇن تارتىبىندە ەكى ماسەلە قارالدى. ولاردىڭ ءبىرىنشىسى, 2013 جىلعى قازاقستاننىڭ مەملەكەتتىك سىيلىقتارىن بەرۋ جونىندەگى كونكۋرسقا ۇسىنىلعان عىلىم مەن تەحنيكا سالاسىنداعى ەڭبەكتەردى ساراپتان وتكىزۋ بولسا, ەكىنشىسى, 2013 جىلعى عىلىم مەن تەحنيكا سالاسىنداعى قازاقستان رەسپۋبليكاسىنىڭ مەملەكەتتىك سىيلىعىن بەرۋ جونىندە شەشىم شىعارۋ.
ءبىر اتاپ وتەرلىگى, 2013 جىلعى عىلىم مەن تەحنيكا سالاسىنداعى قازاقستاننىڭ مەملەكەتتىك سىيلىقتارىن الۋعا بارلىعى 19 جۇمىس ءتۇسىپتى. بيىلعى جىلدىڭ 12 ماۋسىمىندا بۇل جۇمىستارعا مەملەكەتتىك عىلىمي-تەحنيكالىق ساراپتاما جانە ساراپتامالىق-تالداۋ باعالاۋ جۇرگىزۋ جونىندە وتىرىس وتكىزىلىپ, وتىرىستىڭ قورىتىندىسى بويىنشا كونكۋرسقا ودان ءارى قاتىساتىن جۇمىستار ءتىزىمى ىرىكتەلگەن ەكەن. ال اتالعان جۇمىستار جونىندەگى مالىمەتتەر قوعامدىق تالقىلاۋ ءۇشىن باق-تا جاريالانىپتى. تالقىلاۋ كەزىندە 300-گە جۋىق پىكىر (رەتسەنزيالار, حاتتار, باسىلىمداعى جاريالانىمدار), سونىمەن قاتار شەتەل عالىمدارىنان 116 پىكىر كەلىپ ءتۇسىپتى. وسىعان وراي, كونكۋرستىق جۇمىستار ۇسىنىلعان پىكىرلەر مەن رەتسەنزيالاردى ەسكەرە وتىرىپ, سەكتسيالىق-ساراپتامالىق وتىرىستاردا قارالىپتى.
كوميسسيانىڭ قورىتىندى وتىرىسىندا مەملەكەت باسشىسىنىڭ قاراۋىنا ۇسىنىلاتىن 3 جۇمىس بەكىتىلدى. ال مەملەكەتتىك سىيلىق لاۋرەاتتارىن ماراپاتتاۋ ءراسىمى تاۋەلسىزدىك كۇنى قارساڭىندا وتەدى.
ءلايلا ەدىلقىزى,
«ەگەمەن قازاقستان».