دەنساۋلىق ساقتاۋ ۆيتسە-ءمينيسترى ليۋدميلا بيۋرابەكوۆا كوروناۆيرۋس ينفەكتسياسىمەن اۋىرعان ناۋقاستاردى ەمدەۋ ءۇشىن 138,8 ميلليون تەڭگەگە 59 ءدارى ءتۇرى ساتىپ الىنعانىن ايتتى, - دەپ حابارلايدى Egemen.kz.
ء"دارى-دارمەكپەن قامتاماسىز ەتۋ - تەگىن امبۋلاتورلىق ءدارى-دارمەكپەن قامتاماسىز ەتۋ بويىنشا بەكىتىلگەن بۇيرىققا سايكەس امبۋلاتورلىق دەڭگەيدە جۇزەگە اسىرىلادى. بۇگىندە كوروناۆيرۋس ينفەكتسياسىمەن اۋىرعان ناۋقاستاردى ەمدەۋ ءۇشىن 138,8 ميلليون تەڭگەگە 59 ءدارى ءتۇرى ساتىپ الىنعان. اتالعان دارىلىك زاتتار بارلىق وڭىرگە جەتكىزىلدى. مەديتسينالىق ۇيىمداردا "لوپينوۆير", "ريتوناۆير" جانە "گيدروكسيحلوروحين" دارىلەرى بار. "رەمدەسيۆير" ءدارىسىن ساتىپ الۋ جۇمىستارى اياقتالدى, كەلىسىم شارت جاسالدى, ەندى جاقىن كۇندەرى بۇل ءدارى ستاتسيونارلارعا جەتكىزىلەدى", - دەدى دەنساۋلىق ساقتاۋ ۆيتسە-ءمينيسترى ليۋدميلا بيۋرابەكوۆا.
ونىڭ ايتۋىنشا, اتالعان دارىلەر كوروناۆيرۋستىڭ كۇردەلى ءتۇرىن ەمدەۋگە اسا قاجەت.
"سونىمەن قاتار ءبىز "فاۆيپيراۆير" ءدارىسىن ەمدەۋ شارالارىنا قوسقاننان كەيىن, ول دا جاقىندا ساتىپ الىناتىن بولدى. بىرنەشە وندىرۋشىلەرمەن كەلىسسوزدەر جۇرگىزىلدى", - دەدى ول.