ونى ازىرلەۋگە بيزنەس وكىلدەرى دە مۇددەلى
الماتىدا ۇلتتىق ەكسپورتتىق ستراتەگيانى (ۇەس) تالقىلاۋ جونىندەگى دوڭگەلەك ۇستەل ءوتتى. بۇل شاراعا بيزنەس-قاۋىمداستىقتاردىڭ وكىلدەرى مەن تاۋار وندىرۋشىلەر قاتىسۋعا مۇمكىندىك الدى. وسىناۋ باسقوسۋ «KAZNEX INVEST» ەكسپورت جانە ينۆەستيتسيالار ۇلتتىق اگەنتتىگىنىڭ ۇەس-تىڭ نەگىزگى ازىرلەۋشىسى رەتىندە قازاقستان قالالارىندا وتكىزۋگە جوسپارلانعان كەزدەسۋلەر توپتاماسىنداعى العاشقىسى دەپ ايتۋعا بولادى.
ونى ازىرلەۋگە بيزنەس وكىلدەرى دە مۇددەلى
الماتىدا ۇلتتىق ەكسپورتتىق ستراتەگيانى (ۇەس) تالقىلاۋ جونىندەگى دوڭگەلەك ۇستەل ءوتتى. بۇل شاراعا بيزنەس-قاۋىمداستىقتاردىڭ وكىلدەرى مەن تاۋار وندىرۋشىلەر قاتىسۋعا مۇمكىندىك الدى. وسىناۋ باسقوسۋ «KAZNEX INVEST» ەكسپورت جانە ينۆەستيتسيالار ۇلتتىق اگەنتتىگىنىڭ ۇەس-تىڭ نەگىزگى ازىرلەۋشىسى رەتىندە قازاقستان قالالارىندا وتكىزۋگە جوسپارلانعان كەزدەسۋلەر توپتاماسىنداعى العاشقىسى دەپ ايتۋعا بولادى.
سونىمەن «KAZNEX INVEST» مەملەكەتتىك ورگاندار مەن بيزنەس-قاۋىمداستىق وكىلدەرىمەن بىرلەسە وتىرىپ, قازاقستاننىڭ 2020 جىلعا دەيىنگى ۇلتتىق ەكسپورتتىق ستراتەگياسىن ازىرلەۋگە كىرىستى.
بۇل قۇجاتتىڭ قاجەتتىلىگى يندۋستريالاندىرۋ كارتاسىنا سايكەس تاۋارلاردىڭ اۋقىمدى ءوندىرىسىنىڭ كۇتىلىپ وتىرعانىنا بايلانىستى بولىپ وتىر. ستراتەگيانىڭ نەگىزگى ماقساتى – ەكسپورتتى قولداۋدىڭ جالپىۇلتتىق جۇيەسىن قالىپتاستىرۋ, ونىڭ ناتيجەسى شيكىزاتتىق ەمەس ەكسپورت ۇلەسىنىڭ ارتۋى, ونى گەوگرافيالىق جانە تاۋارلىق ءارتاراپتاندىرۋ بولماق. بۇل ءونىمنىڭ قوسىمشا قۇنىن ارتتىرۋعا جانە ەل ەكونوميكاسىنىڭ ينتەرناتسيونالدانۋىن ارتتىرۋعا باعىتتالعان جاڭا يندۋستريالاندىرۋ باعدارلاماسىنىڭ ء(ۇيدمب) ەكىنشى بەس جىلدىعىنداعى نەگىزگى باسىمدىقتارمەن ءوزارا تىعىز بايلانىستى.
بيزنەس-قاۋىمداستىقتى ۇلتتىق ەكسپورتتىق ستراتەگيا جونىندە اۋقىمدى تۇردە اقپاراتتاندىرۋ ءۇشىن «KAZNEX INVEST» اگەنتتىگى قالالىق اكىمدىكتەردىڭ قولداۋ كورسەتۋىمەن وڭىرلەردە كەزدەسۋلەر وتكىزەدى. الماتىلىق ەكسپورتتاۋشىلارمەن وتكەن ءدوڭگەلەك ۇستەل بيزنەسمەندەردىڭ ۇسىنىستارىنا قۇلاق اسۋدى جانە ۇەس-تى ءازىرلەۋ كەزىندە ولاردى ەسكەرۋدى كوزدەيتىن اقپاراتتىق-پىكىرتالاس جۇمىسىنىڭ باسىن باستاپ بەردى.
– ءبىز رەسەي, قىرعىزستان, وزبەكستان, تاجىكستان, ازەربايجان سەكىلدى تمد ەلدەرىنە ەكسپورتتايمىز. وسى رەتتە رەسەيگە ءونىمدى ەكسپورتتاۋ ۇلكەن ماسەلە بولىپ تابىلادى, ءبىرىنشى كەزەكتە, بۇل كوپ ۋاقىتتى الاتىن جانە شىعىندى قاجەت ەتەتىن اككرەديتاتسيامەن بايلانىستى قيىندىق. ەكىنشى ماسەلە – قارجىلاندىرۋ, بۇعان رەسەيلىك بانكتەر ىنتالى ەمەس. وسىعان بايلانىستى ەكسپورتتاۋشىلاردىڭ قارجىلاندىرىلۋىن كىدىرتۋگە بولمايتىن سالالىق قۇرىلىمداردى ناقتى بەلگىلەپ الۋ قاجەت. ءبىرىنشى كەزەكتە, ەكسپورتقا شىعاتىن, سونداي-اق, رەسپۋبليكانىڭ ەكونوميكاسى مەن ءىجو-گە اسەر ەتەتىن كولىك قۇراستىرۋ وسىنداي سالاعا جاتادى. ودان قالدى, ەكسپورتشىلارعا سالىقتىق جەڭىلدىكتەر مەن ارتىقشىلىقتاردى بەرۋ قاجەت, – دەدى «Alageum group» جشس باس ديرەكتورى نۇرجان ىستىباەۆ.
اتالمىش كولىك قۇراستىرۋشى كومپانيادان كەيىن ءسوز العان فارماتسەۆتيكالىق كومپانيا وكىلى ۆالەنتينا پولۋكاروۆا:
– قازىرگى تاڭدا ءبىزدىڭ كومپانيا قىرعىزستان, اۋعانستان نارىقتارىنا بەلسەندى تۇردە شىعىپ وتىر. KAZNEX INVEST-ءتىڭ قولداۋ كورسەتۋىمەن اۋعانستان وكىلدەرى الماتىعا ساپارمەن كەلمەك, ونىڭ بارىسىندا ءبىز سەرىكتەستەرگە ءوزىمىزدىڭ ءونىمىمىزدى, وندىرىستىك ءۇردىسىمىزدى تانىستىراتىن بولامىز. سونىمەن قاتار, بىزدە رەسەيدىڭ فارماتسەۆتيكالىق نارىعىنا شىعۋ بويىنشا ايتارلىقتاي ۇلكەن جوسپارىمىز بار. الايدا, بۇگىنگى كۇنى بۇل قيىن ماسەلە بولىپ وتىر. وسىعان وراي ءبىزدىڭ ءونىمىمىزدى جاڭا نارىقتارعا ىلگەرىلەتۋ بويىنشا سەرۆيستىك قولداۋ الۋ قاجەت دەپ ەسەپتەيمىز, – دەدى.
سونىمەن ۇلتتىق ەكسپورتتىق ستراتەگيانى ازىرلەۋ جونىندەگى ساراپتاۋ توبىنىڭ بيزنەس-قاۋىمداستىق وكىلدەرىمەن كەزدەسۋى بيىلعى جىلدىڭ قازان-قاراشا ايلارىندا شىمكەنت, ورال جانە پاۆلودار قالالارىندا جالعاساتىن بولادى.
ايناش ەسالي,
«ەگەمەن قازاقستان».
الماتى.