قازاقستان پارلامەنتى ماجىلىسىندە تاعى ءبىر يگىلىكتى يدەيا كوتەرىلدى. دەپۋتاتتار بۇل جولى «سالىق تۋرالى» زاڭعا وزگەرىستەر مەن تولىقتىرۋلار ەنگىزۋ بارىسىندا حان سارايىنداي قىمبات باعالى ۇيلەردىڭ سالىعى باسقالاردان ءۇش ەسە كوپ بولۋى كەرەكتىگى تۋرالى ۇيعارىمعا ۇيىدى. حالىق قالاۋلىلارى جوبانى اسقان شاپشاڭدىقپەن تالقىلاپ, ءبىرىنشى وقىلىمدا بەكىتىپ بەردى.
قازاقستان پارلامەنتى ماجىلىسىندە تاعى ءبىر يگىلىكتى يدەيا كوتەرىلدى. دەپۋتاتتار بۇل جولى «سالىق تۋرالى» زاڭعا وزگەرىستەر مەن تولىقتىرۋلار ەنگىزۋ بارىسىندا حان سارايىنداي قىمبات باعالى ۇيلەردىڭ سالىعى باسقالاردان ءۇش ەسە كوپ بولۋى كەرەكتىگى تۋرالى ۇيعارىمعا ۇيىدى. حالىق قالاۋلىلارى جوبانى اسقان شاپشاڭدىقپەن تالقىلاپ, ءبىرىنشى وقىلىمدا بەكىتىپ بەردى.
ايتكەنمەن, قازىر ناعىز قالتالى بايلار بۇل وزگەرىستەردىڭ وزىنەن اينالىپ ءوتۋى ابدەن مۇمكىن, دەگەن قاۋىپ تۋىنداپ جاتىر. ويتكەنى, ادامنان قۋلىق ارتىلا قويمايتىنى دا بەلگىلى. ەندى ءوزىڭىز بايقاپ قاراڭىز. استانادا شىرىگەن بايلار قونىس جايلاعان ەليتالىق اۋدانداعى 402 شارشى مەترلىك كوتتەدجدىڭ قۇنى 270 ملن. تەڭگەدەن اسىپ-جىعىلادى ەكەن. ونىڭ ءىشى دە كەڭ, بولمەلەرى كوپ. جاتىن جايىنىڭ سانى التاۋدان كەم ەمەس. سونىڭ قاباتىندا ساۋناسى تاعى بار. ەسىگىنىڭ الدىنداعى اۋلاسى دا اتشاپتىرىم. ال جاڭا ميزامنىڭ پارمەنى بويىنشا, باعاسى 150 ملن. تەڭگەدەن اساتىن ۇيلەرگە سالىناتىن سالىق بۇرىنعى مولشەردەگىدەن ءۇش ەسەگە اسىپ تۇسكەلى تۇر. مىنا ءۇي سونىڭ شەڭبەرىنە ەمىن-ەركىن ەنەدى دە كەتەدى.
سوسىن ەلورداداعى ەليتالىق پاتەرلەردىڭ اراسىندا ءتورت جانە ودان دا كوپ بولمەلەردەن قۇرالاتىندارى كەزدەسەدى. ونىڭ دا بولمەلەرى داڭعاراداي. ىشىندە ۇلكەن فۋتبول بولماعانىمەن, ميني-فۋتبولدى ويناۋعا ابدەن بولادى. جالپى كولەمى جوعارىداعى كوتتەدجدەن شامالى عانا از, شامامەن 300 شارشى مەتردىڭ اينالاسىندا. مۇندا دا بارلىق جاعدايلار جاسالعان. ءوزى ەسىلدىڭ سول جاعالاۋىندا ەندەي كولبەپ جاتىر. سوندىقتان ولارعا قالتالارى كادىمگىدەي قالىڭ كاسىپكەرلەر قۇمار. ودان قالدى, جيناعان قورلارى ءبىر كوسىلۋىنە ىرىق بەرە الاتىن انشىلەر مەن ونەرپازدار بۇل جاققا ءجيى كوزىن سالادى. بىراق باعاسى الدىڭعى اتالعان سارايعا قاراعاندا ءۇش ەسەگە جۋىق ارزان. ياعني 100 ملن. تەڭگەنىڭ توڭىرەگىنەن تەپەڭ ەتىپ شىعا كەلەدى. سوندىقتان ماناعى 150 ملن. تەڭگە دەگەن ولشەمنىڭ ورمەگىنە تۇسە قويمايدى. دەمەك, بۇرىن قالاي تولەپ كەلسە, ەندىگى جولى دا سالىعىن سولاي وتەي بەرمەك.
شىنتۋايتقا كەلگەندە, سوڭعى اتالعان پاتەرلەر ءۇي ساۋداسى كەزىندە جاڭا ايتىلعان مولشەردەن الدەقايدا جوعارى باعامەن تارازى باسىنا ءتۇسۋى ابدەن ىقتيمال. ءتىپتى, وزدەرى ۋاعدالاسقان, وزدەرىنىڭ كوڭىلدەرى قالاعان سونداي باعالارمەن ساتىلىپ تا جاتقان بولار. بۇل دەڭگەي 150-ءدىڭ بەلدەۋىنەن دە اسىپ ءتۇسۋى ابدەن كادىك. بىراق ەندىگى جەردە پاتەر يەلەرى ونىڭ باعاسىن ەشقاشاندا 100-ءدىڭ ماڭايىنان جوعارىلاتىپ كورسەتپەيدى. ساتىلعان ساتتە دە, الىنعان كەزدە دە ساۋداعا سانات قوسىپ, الاقان ۇرىساتىندار سول اۋادا قالقىعان استارلى باعانى كولبەڭدەتىپ تۇرىپ الادى.
قازىرگى جەتىپ جاتقان قاۋەسەتتەرگە قاراعاندا, وسىنداي پاتەرلەردە تۇراتىن باي-باعلاندار مەن بايشىكەشتەر سەلەبەسىن سۋىرىپ كەلىپ قالعان سالىقتىڭ سۇسىنان جالتارۋدىڭ الۋان ءتۇرلى قۇقايىن قاراستىرىپ جاتقان كورىنەدى. ال قالعانىن الداعى ۋاقىت كورسەتەر.
دەگەنمەن, بۇگىندە جۇرت ءۇيدىڭ ۇلكەنى سالىقتان تاياق جەگىزەتىنىن ۇعىپ قالدى.
قۇرىش نۇرىمبەت.