ال-گامدي دەگەن اراب قىزىن زورلاپ, ولتىرگەنى ءۇشىن 8 جىل الدى
ساۋد ارابياسىندا 8 قازان كۇنى وتكەن سوت پروتسەسى ءوزىنىڭ 5 جاسار قىزىن زورلاپ, ارتىنان ءولتىرىپ تاستاعان فايحانا ال-گامدي دەگەن ازعىنعا 800 مارتە دۇرە سوعىپ, 8 جىلعا تۇرمەگە وتىرۋ جازاسىن بەلگىلەدى. بۇل تۋرالى «كومسومولسكايا پراۆدا» گازەتى حابارلادى.
بۇعان قوسا, ادامدىقتان بەزگەن ايۋان بۇرىنعى ايەلىنە قىزىنىڭ وتەماقىسى رەتىندە 1 ملن. ساۋد ريالىن (270 مىڭ دوللارعا جاۋىق) تولەيدى. شارياتتىڭ زاڭى بويىنشا, ول بۇل اقشانى بۇرىنعى جۇبايىنىڭ بۇعان ءولىم جازاسى بەرىلۋىن ءۇزىلدى-كەسىلدى تالاپ ەتپەۋىنە ايىرباس رەتىندە بەرۋى كەرەك ەكەن. ال باسىندا ايەل ودان 10 ملن. ريال تالاپ ەتكەن كورىنەدى.
«سوت سونداي-اق گامديدىڭ ەكىنشى ايەلىن دە وسى قىلمىستى كورىپ-بىلە تۇرا قۇقىق قورعاۋ ورگاندارىنا حابارلاماعانى ءۇشىن جازالاپ وتىر. وعان سوندىقتان قىلمىسقا قاتىسۋشى رەتىندە ايىپ تاعىلىپ,10 اي تۇرمەدە وتىرۋ مەن 150 دۇرە قابىلداۋ جازاسى بەلگىلەندى», - دەپ جازدى France-Presse گازەتى.
حابارلانعانداي, گامديدىڭ 5 جاسار قىزى 2011 جىلدىڭ جەلتوقسانىندا دەنەسىنە تۇسكەن كوپتەگەن جاراقاتىمەن اۋرۋحاناعا جاتقىزىلعان. سول كۇيى ايىعا الماعان نارەستە بىرنەشە ايدان كەيىن قايتىس بولعان. ءسابي بىرنەشە رەت زورلىققا ۇشىراپ, اياۋسىز ولتىرىلگەن. ونىڭ قابىرعاسى مەن سول قولى سىنىپ كەتىپتى. باس سۇيەگى بىت-شىت بولعان. دەنەسىنەن كوپتەگەن سوققى مەن كۇيىكتىڭ ءىزى كورىنگەن. اكەسى مۇنى قىزىنىڭ قىزدىق بەلگىسىن جوعالتىپ العانىنا كۇدىكتەنگەننەن جاساعانىن ايتقان.
بۇل قىلمىس ساۋد ارابياسىمەن بىرقاتار شەت ەلدەردە ۇلكەن قوزعالىس پەن تولقۋ تۋعىزدى. سەبەبى, قاڭتار ايىندا بۇل ازعىنعا كوپ مولشەردە تولەماقى تولەتىپ الىپ, ءوزىن تۇرمەدەن بوساتادى نەمەسە از مولشەردە جىل كەسەدى, دەگەن اڭگىمە تاراپ كەتىپتى.
نەگىزى, ساۋد ارابياسىندا زورلاۋ مەن ادام ولتىرۋگە تەك قانا ءولىم جازاسى كەسىلەدى. الايدا, بۇل زاڭ قىز-كەلىنشەكتەردىڭ كۇيەۋلەرى مەن اكەلەرىنە قولدانىلمايدى. ەر كىسى ءوزىنىڭ جەكە ايەلى مەن قىزدارىنا قاتىستى مۇنداي سيپاتتاعى قىلمىس جاساعانى ءۇشىن 5 جىلدان 12 جىلعا دەيىن عانا تۇرمەگە وتىرادى.
سۇلتان بوزايعىر.