«نۇر وتان» حدپ وبلىستىق فيليالىندا «كوركەيە بەر, تۋعان جەر» اكتسياسى اياسىندا ستۋدەنت-جاستار ەڭبەك جاساقتارىنىڭ ءىح وبلىستىق سلەتى وتكىزىلدى.
«نۇر وتان» حدپ وبلىستىق فيليالىندا «كوركەيە بەر, تۋعان جەر» اكتسياسى اياسىندا ستۋدەنت-جاستار ەڭبەك جاساقتارىنىڭ ءىح وبلىستىق سلەتى وتكىزىلدى.
وبلىستىق باسقارمالار باسشىلارى, جوعارى وقۋ ورىندارى مەن كوللەدجدەر وكىلدەرى, اۋدان اكىمدەرىنىڭ ورىنباسارلارى, جاس دەپۋتاتتار, ستۋدەنت-جاستار قاتىسقان سلەتتە «اتامەكەن» ستۋدەنتتىك جاستار جاساقتارى قوعامدىق بىرلەستىگىنىڭ توراعاسى نۇرلىبەك مۋسين ەڭبەك سەمەسترىندە اتقارىلعان جۇمىستار جايلى باياندادى. ەلباسىنىڭ ستۋدەنتتىك جاستار جاساقتارىن قۇرۋ جونىندەگى باستاماسىن ءبىرىنشى بولىپ قولداعان اقتوبەلىكتەر وسى ءداستۇردى جىل سايىن جالعاستىرىپ, العاشقىلاردىڭ قاتارىندا جۇمىستى باستاپ كەلەدى. اقتوبەلىك جاستار ستۋدەنتتىك قۇرىلىس جاساقتارىنا بەلسەندى قاتىسىپ, جىل سايىن ولاردىڭ قاتارى كوبەيە تۇسۋدە. بيىل جۇمىسپەن قامتۋدا اۋدانداردا تۇراتىن جاستارعا, سونىڭ ىشىندە جۇمىسسىز جاستارعا باسىمدىق بەرىلىپتى. ءبىر سوزبەن ايتقاندا, ەڭبەككە ىنتالى جاستارعا اۋىلدىق جەرلەردە دە «ەكى قولعا ءبىر كۇرەك» تابىلادى. تەك ۇيىمداستىرا ءبىلۋ كەرەك, جاستاردىڭ ىنتاسىن وياتسا بولعانى.
– ءتورت ايلىق جازعى ەڭبەك سەمەسترىندە ون ەكى اۋدان بويىنشا 1610 جاس جۇمىس ىستەدى. قالامىزدى كورىكتەندىرۋ جانە كوگالداندىرۋ جۇمىستارىنا 3 مىڭ ستۋدەنت - جاستار قاتىستى. قۇرىلىس جاساقتارىنىڭ جاۋىنگەرلەرى «كتپ», «گلوبۋس», «كونتاكت» جشس سياقتى ىرگەلى كاسىپورىنداردا ەڭبەك ەتتى. قۇرىلىس جاساقتارىنداعى جاۋىنگەرلەر «نۇراقتوبە», «باۋىرلاستار-1» جانە «باتىس-2» شاعىن اۋداندارىنداعى قۇرىلىس نىساندارىندا جۇمىس ىستەدى. «جاسىل ەل» جاساقتارى 4,5 مىڭ گەكتار القاپقا جاس اعاش كوشەتتەرىن وتىرعىزدى. جاۋىنگەرلەر اي سايىن ورتاشا 30 مىڭ تەڭگە ەڭبەكاقى الدى, – دەدى ن.مۋسين.
سلەتتە ءسوز سويلەگەندەر بۇل قوزعالىستىڭ تيىمدىلىگىن, جاستاردى ەڭبەككە داعدىلاندىرۋداعى جانە ازامات بولىپ قالىپتاستىرۋداعى تاربيەلىك ءمانىن ايرىقشا اتاپ ءوتتى. جيىنعا قاتىسۋشىلاردى جاڭا وقۋ جىلىنىڭ باستالۋىمەن جانە ەڭبەك ماۋسىمىنداعى قول جەتكەن تابىستارىمەن قۇتتىقتاعان وبلىس اكىمى ارحيمەد مۇحامبەتوۆ جاستاردى ەڭبەكپەن قامتاماسىز ەتۋ, ولاردىڭ تۇرمىستىق ماسەلەلەرىن شەشۋ باعىتىنداعى قولعا الىنىپ جاتقان شارالارعا توقتالدى. ءوڭىر باسشىسى تەك 2011-2012 جىلدارى عانا «جۇمىسپەن قامتۋ-2020» مەملەكەتتىك باعدارلاماسى بويىنشا 13 مىڭ جاستىڭ ەڭبەككە تارتىلعانىن, ونىڭ 7,5 مىڭى 29 جاسقا دەيىنگى جاستار ەكەنىن جەتكىزدى. 1806 ادام جاستار تاجىريبەسىنەن ءوتىپ, جۇمىسقا ورنالاسقان ەكەن.
– ستۋدەنت-جاستاردىڭ ەڭبەك جاساقتارىنا 5 مىڭعا جۋىق ادام تارتىلدى. ولارعا 100 ميلليون تەڭگە قارجى ءبولىندى. وبلىستا جاستار ماسەلەسىن شەشۋ باستى نازاردا ۇستالۋدا. بيىل اۋدانداردا 30-عا جۋىق جاستار ۇيىمدارى قۇرىلدى, اۋدانداردا جاستار رەسۋرستىق ورتالىقتارى اشىلا باستادى. الىس اۋداندارعا باراتىن دارىگەرلەر ءۇشىن 2 ميلليون تەڭگە كولەمىندە گرانت بولىنەتىن بولدى. جىل سايىن «ديپلوممەن – اۋىلعا!» باعدارلاماسى بويىنشا 350-دەن استام جاس ماماندار اۋىلدىق جەرگە بارۋدا. ولارعا كوتەرمە اقى تولەۋ, تۇرعىن ۇيمەن قامتاماسىز ەتۋ, باسقا تۇرمىستىق جاعدايلار تۋعىزۋ جولعا قويىلدى. بيىل جىلدىڭ اياعىنا دەيىن «قولجەتىمدى تۇرعىن ءۇي-2020» باعدارلاماسى بويىنشا 216 جاس وتباسى باسپانالى بولادى, – دەدى اكىم.
ا.مۇحامبەتوۆ ەڭبەك ماۋسىمىندا ەسەلى ەڭبەك ەتىپ, ۇزدىك دەپ تانىلعان 100 ستۋدەنتكە استانا قالاسىنا بارىپ, دەمالىپ قايتۋعا تەگىن جولداما تاپسىردى. سونداي-اق, ستۋدەنتتەردىڭ جازعى ەڭبەك ماۋسىمىن جاقسى ۇيىمداستىرعان اۋدان اكىمدەرىنە, جوعارى وقۋ ورىندارى مەن كوللەدجدەر باسشىلارىنا العىس حاتتار تابىستالدى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.