ءبىلىم جانە عىلىم مينيسترلىگى بالالاردى تاماقتاندىرۋ ساپاسىن ارتتىرۋ ماقساتىندا كونكۋرستىق راسىمدەردى مەملەكەتتىك ساتىپ الۋدىڭ بىرىڭعاي ەلەكتروندىق فورماتىنا كوشىردى. بۇل تۋرالى بالالاردىڭ قۇقىقتارىن قورعاۋ كوميتەتىنىڭ ءباسپاسوز قىزمەتىنە سىلتەمە جاساي وتىرىپ Egemen.kz حابارلايدى.
بۇل قادام – كونكۋرستىڭ ايقىندىلىعىن ارتتىرىپ, قۇجاتتار سانىن قىسقارتىپ, جەتكىزۋشىلەرگە ءوتىنىم تولتىرۋعا جۇمسالاتىن ۋاقىتتى ۇنەمدەيى. سونداي-اق, قارجىلىق باقىلاۋ ورگاندارى جەدەل ەلەكتروندىق باقىلاۋدى جۇزەگە اسىرا الادى.
كونكۋرسقا قاتىسۋشىلاردىڭ ءبىرى كونكۋرستىق كوميسسيانىڭ ارەكەتىنە شاعىم تۇسىرگەن جاعدايدا, كونكۋرستى جويۋ, ءونىم بەرۋشىمەن شارتتى بۇزۋ جانە ۋاكىلەتتى مەملەكەتتىك ورگانداردىڭ اكتىلەرى نەگىزىندە جەڭىمپازبەن شارت جاساسۋ ءراسىمىن توقتاتا تۇرۋ بويىنشا نورمالار ەنگىزىلدى.
سونىمەن قاتار ءبىلىم بەرۋ ۇيىمدارى مەن ورگاندارعا, قىزمەتتەردى, تاۋارلاردى جەتكىزۋشىلەرگە قويىلاتىن تالاپتار كۇشەيتىلدى.
مەكتەپتەردە تاماقتانۋدى ۇيىمداستىرۋ تۋرالى اتا-انالاردى حاباردار ەتۋ ءۇشىن ءبىلىم بەرۋ ورگاندارى مەن ۇيىمدارىنىڭ سايتىندا "مەكتەپتىك تاماقتاندىرۋ" ايدارى, سونداي-اق "كۇندەلىك" جۇيەسىندە اس ءمازىرى, تاعامداردىڭ فوتوسۋرەتى, براكەراج كوميسسيالارىنىڭ جانە ۆەدومستۆوارالىق ساراپتاما توپتارىنىڭ اكتىلەرى قوسا بەرىلەدى.
قالالىق مەكتەپ اسحانالارىنىڭ اس بلوكتارىندا بەينەباقىلاۋ جۇيەسى ورناتىلادى. سونداي-اق اتا-انالار بالالاردىڭ تاماقتانۋىن باقىلاۋدا ۇستاۋى ءۇشىن قولما-قول اقشاسىز ەسەپ ايىرىسۋ جۇيەسى ەنگىزىلەدى.
ءبىلىم الۋشىلارعا جەدەل جانە ساپالى قىزمەت كورسەتۋ ماسەلەلەرىن شەشۋ نەگىزىندە وقۋشىلاردىڭسانىنا بايلانىستى اسپازشىلار مەن اس بلوكتارى قىزمەتكەرلەرىنىڭ سانىنا قويىلاتىن تالاپتار قاراستىرىلعان. مىسالى, ەگەر مەكتەپتە 1501-دەن 2500-گە دەيىن ءبىلىم الۋشى بولسا, وندا ءونىم بەرۋشى كەمىندە 3 اسپازشى مەن 5 اس ءۇي جۇمىسشىسى قىزمەتىن قامتاماسىز ەتۋى ءتيىس.
ءونىم بەرۋشى كونكۋرستى وتكىزۋ كەزەڭىندە اي سايىن پايدالانىلاتىن تاماق ونىمدەرىنىڭ ساپاسىن, اس بلوگى قىزمەتكەرلەرىنىڭ ساندىق جانە ساپالىق قۇرامىن مالىمدەپ, راستايتىن بولادى.