2020 جىلدىڭ 29 ماۋسىمى مەن 3 شىلدەسى ارالىعىندا "استانا" حالىقارالىق قارجى ورتالىعىنىڭ ۇيىمداستىرۋىمەن ءۇشىنشى رەت ءداستۇرلى Astana Finance Days مامانداندىرىلعان قارجى كونفەرەنتسياسى وتەدى. بۇل تۋرالى احقو ءباسپاسوز قىزمەتى حابارلادى.
"قۇبىلمالى الەمدەگى نارىقتار" اتالعان بيىلعى كونفەرەنتسياعا الەمنىڭ 40-تان استام ەلىنەن 10 مىڭنان استام قاتىسۋشى كەلەدى دەپ جوسپارلانعان. سونىمەن قاتار ونلاين وتەتىن شاراعا قارجى, ەكونوميكا, زاڭ جانە وزگە دە سالالارداعى وتاندىق جانە شەتەلدىك ساراپشىلار, ساياساتكەرلەر, بيزنەستىڭ, مەملەكەتتىك قىزمەت جانە عىلىمي ۇيىمداردىڭ وكىلدەرى, سونىمەن قاتار "استانا" حالىقارالىق قارجى ورتالىعىندا تىركەلگەن كومپانيالاردىڭ وكىلدەرىنەن قۇرالعان 100-دەن استام سپيكەر دە قاتىسادى.
قارجى كونفەرەنتسياسى اياسىندا "COVID-19 داۋىرىندەگى بەلدەۋ جانە جول باستاماسىنىڭ بولاشاعى", "COVID-19 دامۋشى نارىقتاردى قالاي كۇيرەتەدى؟", "تۇراقتىلىق, تاۋەلسىزدىك, پاندەميادان كەيىنگى ەكونوميكالىق ءتارتىپ: قارىزدار, تسيفرلىق تەحنولوگيالار مەن جەرگىلىكتى قامتىلىم كوبەيە مە؟" تاقىرىپتارىندا پانەلدىك سەسسيالار ءوتىپ, وندا پوست-پاندەميا كەزىندەگى الەم بويىنشا الەۋمەتتىك-ەكونوميكالىق احۋال, دامۋشى ەلدەردىڭ جاي-كۇيى تالقىلانادى.
ايتا كەتەيىك, بيىل COVID-19 پاندەمياسىنىڭ اسقىرۋىنا بايلانىستى ءداستۇرلى كونفەرەنتسيا ونلاين رەجيمدە وتكىزىلىپ وتىر. بەس كۇندىك شارانىڭ كەز كەلگەن سەسسياسىن كونفەرەنتسيانىڭ رەسمي سايتى astanafindays.org سايتىنا تىركەلىپ, ناقتى ۋاقىتتا كورە الاسىزدار.