مەملەكەت باسشىسى قاسىم-جومارت توقاەۆ كۇندەلىكتى كوروناۆيرۋسقا تەست تاپسىرىپ جاتىر. بۇل تۋرالى ءباسپاسوز حاتشىسى بەرىك ءۋالي Facebook پاراقشاسىندا جازدى, - دەپ حابارلادى Egemen.kz
"سوڭعى كۇندەرى مەملەكەت باسشىسى قاسىم-جومارت توقاەۆتىڭ دەنساۋلىعىنا قاتىستى ەلىمىزدىڭ كوپتەگەن ازاماتتارى الاڭداۋشىلىق ءبىلدىرىپ, ساۋال جولداپ جاتىر. وسىعان وراي, قاسىم-جومارت كەمەل ۇلىنىڭ دەنساۋلىعى جاقسى ەكەنىن حابارلايمىن. سوڭعى كەزدەردەگى ەپيدەميولوگيالىق جاعدايدىڭ ءورشي تۇسۋىنە بايلانىستى, ول كۇندەلىكتى كوروناۆيرۋسقا تەست تاپسىرىپ جاتىر. تاپسىرىلعان بارلىق تەست سىناماسى تەرىس ناتيجە كورسەتتى", دەپ جازدى بەرىك ءۋالي.
ونىڭ ايتۋىنشا, پرەزيدەنت جۇمىس كەستەسىنە سايكەس ونلاين-كەزدەسۋلەر وتكىزۋدە.
"مەملەكەت باسشىسى ءوزىنىڭ قىزمەت ورنىندا بەلگىلەنگەن جۇمىس كەستەسىنە سايكەس, مەملەكەتتىك ورگاندار مەن ۆەدومستۆولاردىڭ باسشىلارىمەن جانە قوعامدىق ۇيىمداردىڭ وكىلدەرىمەن ونلاين-كەزدەسۋلەر وتكىزۋدە. قازاقستان پرەزيدەنتى تۆيت ارقىلى ەلباسى نۇرسۇلتان ءابىش ۇلى نازارباەۆتىڭ تەزىرەك ساۋىعىپ كەتۋىن تىلەپ, تۇڭعىش پرەزيدەنتتىڭ وزىنە ءتان مىقتى رۋحىنىڭ ارقاسىندا, بۇل سىناقتى دا جەڭىل ەڭسەرەتىنىنە سەنىم ءبىلدىردى", دەدى بەرىك ءۋالي.