ەرەجەسىز جەكپە-جەكتە ونەر كورسەتەتىن قازاقستاندىق سپورتشىلار اراسىندا UFC ۇيىمىمەن ءبىرىنشى بولىپ كەلىسىمشارت جاساعان شاۆكات راحمونوۆتىڭ امەريكالىق ۇيىمداعى ءبىرىنشى قارسىلاسى انىقتالدى, - دەپ حابارلايدى Egemen.kz.
راحمونوۆ ءوزىنىڭ ءبىرىنشى كەزدەسۋىن 15-شىلدە كۇنى ابۋ-دابي قالاسىندا وتكىزەدى. ونىڭ قارسىلاسى M-1 Challenge ۇيىمىنىڭ بۇرىنعى چەمپيونى رامازان ەمەەۆ بولادى.
33 جاستاعى ەمەەۆ UFC-دا ءتورت كەزدەسۋ وتكىزگەن. رەسەيلىك سپورتشى وتكەن جىلى ماسكەۋدە وتكەن تۋرنيردە تورەشىلەردىڭ شەشىمى بويىنشا روككو مارتيننەن جەڭىلسە, وعان دەيىن سەم الۆي, البەرتو مينا جانە ستەفان سەكۋليچا دەگەن قارسىلاستارىنان ۇستەم تۇسكەن.
25 جاستاعى راحمونوۆ بولسا جارتىلاي ورتا سالماقتاعى M-1 Challenge چەمپيوندىق اتاعىن وتكەن جىلى ناۋرىزدا جەڭىپ الدى. وتانداسىمىز دانيل پريكازادانى جەڭدى.
ءاۋ باستا راحمونوۆ UFC-دەگى ءبىرىنشى كەزدەسۋىن ناۋرىز ايىندا لوندون قالاسىندا ۇيىمداستىرىلعان UFC Fight Night 171 تۋرنيرىندە وتكىزۋى كەرەك تۇعىن. قارسىلاسى دا انىقتالىپ قويعان ەدى. ول پولشالىق بارتوش فابينسكي بولاتىن. الايدا, كوروناۆيرۋس پاندەمياسىنا بايلانىستى ءتۋرنيردى اقش-قا اۋىستىرىپ جىبەردى. ال راحمونوۆ ۆيزا ماسەلەسىنە بايلانىستى امەريكاعا بارا المادى.
ايتا كەتەيىك, شاۆكات راحمونوۆ 2019 جىلدىڭ شىلدەسىندە UFC ۇيىمىمەن كەلىسىمشارت جاسادى. وسىلايشا ول قازاق سپورتشىلارى اراسىندا بۇل بەدەلدى ۇيىممەن ءبىرىنشى بولىپ شارتناما جاسادى.