موڭعوليا ۇلتتىق مۋزەيى مەن حالىقارالىق تۇركى اكادەمياسىنىڭ بىرلەسكەن "كەرۋلەن" جوباسىنىڭ اياسىندا موڭعوليانىڭ وڭتۇستىك ءوڭىرى گوبي ايماقتارىنا بارلاۋ ەكسپەديتسياسىنىڭ ناتيجەسىندە دۋندگوۆ ايماعى نوگوونتال (جاسىل دالا) دەگەن جەردەن بۇرىن بەيمالىم بولىپ كەلگەن تۇركى عۇرىپتىق كەشەنى تابىلدى. بۇل تۋرالى اكادەميانىڭ ءباسپاسوز قىزمەتى حابارلادى.
"نەگىزىنەن بۇعان دەيىن تۇركى حانزادالارى مەن بەكتەرىنىڭ ءىرى كەشەندەرى موڭعوليانىڭ ورتالىق ايماعى ورحون, تۋل وزەنى القابىنان تابىلىپ كەلگەن ەدى. ەلدىڭ وڭتۇستىك تاراپىنداعى گوبي ءشولى ايماعىنان مۇنداي ەسكەرتكىشتەر اسا سيرەك كەزدەسەتىندىكتەن, ونى تياناقتى زەرتتەۋ كونە تۇركى مادەنيەتى ارەالىن كەڭەيتە تۇسۋگە مۇمكىندىك تۋدىرادى. بۇل جادىگەرلەردى زەرتتەپ زەردەلەۋدىڭ تۇركى تاريحىنا ولجا سالارى انىق", – دەپ جازدى اكادەميا باسشىسى دارحان قىدىرالى.
تابىلعان كەشەننىڭ اۋماعى 2.5ح2.5 م, شارشى ءپىشىندى. كەشەندە ورنالاسقان جايپاق تاساتتىق تاسقا ءمۇيىز بەن گۇل ءتارىزدى ويۋ-ورنەكتەر ويمىشتاپ ايقىن بەينەلەنگەن. عۇرىپتىق كەشەندە بيىكتىگى 2 مەتردەن اساتىن 4 دانا تىك سىنتاس انىقتالدى. كەشەن كونە تۇركى اقسۇيەك بەكزاداسىنىڭ تيەسىلى دەپ جورامالدانۋدا.
ايتا كەتۋ كەرەك, تۇركى اكادەمياسى موڭعوليانىڭ ۇلتتىق مۋزەيىمەن بىرلەسىپ 2016 جىلدان بەرى "كەرۋلەن" جوباسى اياسىندا حەنتي ايماعى دەلگەرحاان سۇمىنىندا حايااحۋداگ, گۇنبۇرد تۇركى كەشەندەرىنە ارحەولوگيالىق قازبا جۇرگىزىپ, كوشپەندىلەردىڭ مادەنيەتىنە قاتىستى ەلەۋلى جاڭالىقتار اشقان بولاتىن.
اكادەميا مەن موڭعوليا ۇلتتىق مۋزەيى الداعى ۋاقىتتا جاڭادان تابىلعان نىساندا زەرتتەۋ جاساۋدى جوسپارلاپ وتىر.