ەلوردادا ناقتىلىعى جوعارى پتر-سكرينينگ ارقىلى حالىقتى كوروناۆيرۋسقا تەكسەرەتىن العاشقى مودۋلدىك زەرتحانا كەشەنى جۇمىسىن باستادى.
دەنساۋلىق ساقتاۋ مينيسترلىگى مەن نۇر-سۇلتان قالاسىنا موبيلدىلىگى مەن بيوقاۋىپسىزدىگىنىڭ جوعارى دەڭگەيى جانە زەرتتەۋ پروتسەسىنىڭ اۆتوماتتاندىرىلۋى ارقىلى ەرەكشەلەنەتىن بىرەگەي زەرتحانانى بولات وتەمۇراتوۆ قورى تاپسىردى.
قايىرىمدىلىق قورى مەديتسينالىق زەرتتەۋلەرگە, زەرتحانالىق تالداۋعا ارنالعان جابدىقتار مەن ماتەريالدار سالاسىنداعى الەمدىك كوشباسشى سانالاتىن BGI (قحر) كومپانياسىنان جالپى سوماسى 4 ملن دوللارعا ەكى زەرتحانا كەشەنىن ساتىپ الدى. ەكىنشى كەشەن الماتى قالاسىنا ورناتىلا باستادى.
دەنساۋلىق ساقتاۋ ءمينيسترى ەلجان ءبىرتانوۆ, نۇر-سۇلتان اكىمى التاي كولگىنوۆ, قايىرىمدىلىق قورىنىڭ قۇرىلتايشىسى بولات وتەمۇراتوۆ جانە قامقورشىلار كەڭەسىنىڭ توراعاسى الماز شارمان زەرتحانانىڭ جۇمىسىن ىسكە قوستى.
«بولات وتەمۇراتوۆ قورى تاپسىرعان ءمودۋلدى زەرتحانا كەشەندەرى كوروناۆيرۋسقا تەكسەرۋدىڭ جىلدامدىعى مەن قامتۋىن مەيلىنشە كوبەيتەدى. قايىرىمدىلىق قورىن ينفەكتسيامەن كۇرەستىڭ العاشقى كۇنىنەن باستاپ دەنساۋلىق ساقتاۋ مينيسترلىگىنە كورسەتىپ وتىرعان قولداۋى مەن ۆيرۋستىڭ تارالۋىن شەكتەۋ ءۇشىن قوسىپ وتىرعان قوماقتى ۇلەسى ءۇشىن العىس ايتقىم كەلەدى», دەدى دەنساۋلىق ساقتاۋ ءمينيسترى ەلجان ءبىرتانوۆ.
زەرتحانا كەلەسى تۇلعالار ءۇشىن تەگىن سكرينينگ جاسايتىن بولادى: جۇمىسسىزدار, تۇرمىسى تومەن جانە كوپبالالى وتباسىلار, مۇگەدەكتەر, جوسپارلى تۇردە ستاتسيونارعا جاتاتىن ناۋقاستار, تىنىس الۋ جولدارى, ەندوكريندى جانە جۇرەك-قان تامىرلارى اۋرۋلارىمەن تىركەۋدە تۇرعان 50 جاستان اسقان ناۋقاستار, ەپيدەمياعا قارسى كۇرەسكە جۇمىلدىرىلعان ارنايى كونتينگەنت – ۆولونتەرلەر, پاترۋل قىزمەتكەرلەرى, قارتتار ءۇيى, ينتەرناتتار مەن باسقا دا مامانداندىرىلعان مەكەمەلەردىڭ جانە مەكتەپكە دەيىنگى مەكەمەلەردىڭ قىزمەتكەرلەرى.
زەرتحانا پتر تالدامانىڭ بارلىق تسيكلىن جاساۋ ءۇشىن تولىق جابدىقتالعان. كەشەن تۇتاستاي بيولوگيالىق ماتەريالدى جيناۋعا, ساقتاۋعا جانە زات تاڭبالاۋعا, پوليمەرازدى تىزبەكتى رەاكتسيانى قولدانا وتىرىپ زەرتتەۋ جۇرگىزۋگە ارنالعان 42 تەحنولوگيالىق قۇرال-سايمان مەن قۇرال جيىنتىعىنان تۇرادى. زەرتتەۋ پروتسەسسى تولىق اۆتوماتتاندىرىلعان, بۇل تەستتى جىلدام ءارى مامانداردىڭ از قاتىسۋى ارقىلى جوعارى دالدىكپەن انىقتاۋعا مۇمكىندىك بەرەدى. زەرتحانانىڭ قۋاتى – تاۋلىگىنە 1000 تالداۋ, كەيىن 5000-عا دەيىن كوبەيتۋ جوسپارى بار. تەست ناتيجەسى ءۇش ساعاتتىڭ ىشىندە دايىن بولادى. بولات وتەمۇراتوۆ قورى ءار زەرتحانانى جەدەل ىسكە قوسۋ ءۇشىن 30 مىڭ تەست جاساۋعا قاجەتتى رەاگەنتتەر جيىنتىعىمەن جابدىقتادى.
كەشەننىڭ اۋا تىرەگى قۇرىلىمى ىشكى ءتسيليندردىڭ جانە اۋانى ءسۇزۋدىڭ اۆتونومدى جۇيەسى بار ءۇش تسيليندرلىك ۇرلەنەتىن مودۋلدەردەن (مەمبرانالاردان) تۇرادى.
جۇيە ستاتسيونارلىق زەرتحانالاردا دا قول جەتكىزۋ مۇمكىن ەمەس بيولوگيالىق قاۋىپسىزدىكتىڭ جوعارى دەڭگەيىن قامتاماسىز ەتەدى جانە دۇنيەجۇزىلىك دەنساۋلىق ساقتاۋ ۇيىمىنىڭ تالاپتارىنا سايكەس كەلەدى. ءوندىرۋشىنىڭ ۇسىنىسىمەن كەشەن جوعارى تۇراقتىلىق پەن ساقتالۋى ءۇشىن عيماراتتىڭ ىشىندە ورناتىلادى. نۇر-سۇلتاندا زەرتحانانى ورناتۋ ءۇشىن «قازاقستان» سك, ال الماتىدا «اتاكەنت» كورمە كەشەنىنىڭ ءبىر پاۆيلونى تاڭدالدى. قاجەتتىلىك تۋىنداعان جاعدايدا زەرتحانانىڭ ورنىن ءبىر اپتانىڭ ىشىندە اۋىستىرۋعا بولادى.
«باستى مىندەتتىڭ ءبىرى – COVID-19-بەن اۋىرعانداردى انىقتاۋ. تاجىريبە كورسەتىپ وتىرعانداي, ينفەكتسيا جۇقتىرعانداردا اۋرۋ بەلگىلەرى بايقالمايدى. كارانتين باستالعاندا قالادا 1 عانا زەرتحانا بولسا, قازىر ونىڭ سانى 6-عا جەتتى. الداعى ۋاقىتتا تاعى ەكەۋىن اشامىز. بولات وتەمۇراتوۆ قورى تاپسىرعان پتر-سكرينينگ جاساۋعا ارنالعان زەرتحانا كەشەنى تەست كولەمىن ارتتىرۋعا مۇمكىندىك بەرەدى: ىندەت ەرتە كەزەڭدە انىقتالعان ناۋقاستار دەر كەزىندە مەديتسينالىق كومەك الىپ, ولارمەن بايلانىستا بولعان ادامداردىڭ سانى ەداۋىر ازايادى. كورسەتىلگەن قولداۋ ءۇشىن العىس ايتامىن», دەدى ەلوردا اكىمى التاي كولگىنوۆ.
ء«موبيلدى كەشەندەر كوممەرتسيالىق كەشەندەردە كوروناۆيرۋسقا تەست تاپسىرۋعا مۇمكىندىگى جوق الەۋمەتتىك وسال توپتاعى ازاماتتار ءۇشىن تەگىن جۇمىس ىستەيتىن بولادى. بۇل سكرينينگ اۋقىمىن كەڭەيتىپ, اۋرۋدى ەرتە كەزەڭدە انىقتاۋعا, اسقىنۋ قاۋپىن تومەندەتۋگە جانە ۆيرۋستىڭ تارالۋىن شەكتەۋگە مۇمكىندىك بەرەدى. وسىلايشا مەملەكەت, بيزنەس جانە قوعامنىڭ بىرلەسكەن كۇشىمەن ءبىز ينفەكتسيانى توقتاتىپ, ونى جەڭەمىز», دەدى بولات وتەمۇراتوۆ قورىنىڭ ديرەكتورى مارات ايتماعامبەتوۆ.
بۇعان دەيىن بولات وتەمۇراتوۆتىڭ قورى قازاقستاندا العاشقى بولىپ 200 ملن تەڭگەگە 94 مىڭ ەكسپرەسس-تەست ساتىپ الىپ, ونى دەنساۋلىق ساقتاۋ مينيسترلىگىنە تابىستاعان بولاتىن. كوروناۆيرۋسقا سكرينينگ جاساۋدان بولەك, وتەمۇراتوۆ «ۆەرنىي كاپيتال» كومپانيالار توبى ارقىلى تۇڭعىش پرەزيدەنت – ەلباسى نۇرسۇلتان نازارباەۆتىڭ باستاماسىمەن كوروناۆيرۋسپەن كۇرەس جانە حالىقتىڭ الەۋمەتتىك از قامتىلعان توبىن قولداۋ ءۇشىن قۇرىلعان «Birgemiz» قوعامدىق قورىنا 1 ملن دوللار اۋداردى.