كەنشىلەر استاناسى الداعى ۋاقىتتا ءتىپتى دە اجارلانا تۇسپەك. بۇل باعىتتا وبلىس جانە قالا باسشىلىعى تاراپىنان اۋقىمدى جوبالار قولعا الىنۋدا. ولاردى جۇزەگە اسىرۋعا قاجەتتى قارجى كوزى دە قاراستىرىلعان. مىسالى, بيىل قاراعاندىنى اباتتاندىرۋعا بيۋدجەتتەن 9,6 ملرد تەڭگە ءبولىندى. بۇل قارجىعا «جۇمىسپەن قامتۋدىڭ جول كارتاسى» اياسىندا 421 اۋلا, 46 ورامىشىلىك جولدار جوندەلەدى. قالاداعى 119 جاياۋ جۇرگىنشىلەر جولدارىنا فالدار سالىنادى جانە 269 بالالار مەن سپورت الاڭدارى ورناتىلادى. سونداي-اق, بيۋدجەت ەسەبىنەن 212 كوپقاباتتى ءۇيدىڭ قاسبەتتەرى مەن شاتىرلارى رەتكە كەلتىرىلەدى. اتالعان باعدارلاما بويىنشا 1400 جۇمىس ورنى قۇرىلادى. ەڭ ماڭىزدىسى سول, مۇنىڭ جارتىسىنا جۋىعى قالالىق جۇمىسپەن قامتۋ ورتالىعىنا تىركەلگەن تۇرعىندارعا تيەسىلى بولادى.
وسى جانە باسقا دا جاعىمدى جاڭالىقتارعا جەرگىلىكتى باق وكىلدەرى ارنايى ۇيىمداستىرىلعان پرەسس-تۋر بارىسىندا كوز جەتكىزدى.
جۋرناليستەر ارنايى ساپار كەزىندە قالا اۋماعىنداعى «جۇمىسپەن قامتۋدىڭ جول كارتاسى» باعدارلاماسى بويىنشا اباتتاندىرىلىپ جاتقان اۋلالاردىڭ جاعدايىمەن تانىستى. نىسانداردىڭ جۇمىسىنا جاۋاپتى تۇلعالاردىڭ ايتۋىنشا, ءبىر اۋلانى ساپالى اباتتاندىرۋ ءۇشىن شامامەن 3 ملن تەڭگە قارجى قاجەت ەكەن. مۇنداعى جۇمىستارعا نەگىزىنەن وتاندىق ونىمدەر پايدالانىلىپ جاتىر. جامبىل كوشەسىندەگى بىرقاتار ۇيلەردىڭ اۋلاسى جولدارىنىڭ جيەكتاستارى جاڭارتىلىپ, اسفالت توسەلىپ, جارىق تا تارتىلۋدا. بۇل جۇمىستارمەن اينالىسىپ جاتقان «قۇرىلىس ورتالىعى» جشس وكىلدەرى تۇرعىن ۇيلەردىڭ اۋلالارىنا قوسا, سىرتقى اۋماعىنىڭ دا جوندەلەتىنىن ايتادى.
جاڭعىرتۋ جۇمىستارى بارىسىندا قالانىڭ تاريحي كەلبەتى مىندەتتى تۇردە ساقتالۋى ءتيىس. تالاپ سونداي. قاراعاندى قالالىق تۇكش ءبولىمىنىڭ مامانى داۋلەت ماحانوۆ قالاداعى 212 كوپقاباتتى ءۇي جوندەۋدەن وتكىزىلىپ, بىرىڭعاي تاريحي ارحيتەكتۋرالىق كەلبەتى ساقتالا وتىرىپ جاڭعىرتىلاتىنىن اتاپ ءوتتى.
– ءبارىن دە تۇرعىندارمەن اقىلداسا وتىرىپ جاسايمىز. «جۇمىسپەن قامتۋدىڭ جول كارتاسى» باعدارلاماسى نەگىزگى قارجىلاندىرۋ كوزى بولىپ وتىر. مۇندا دا 1300-دەن اسا جۇمىس ورنى قۇرىلىپ, جۇمىسشىلار قالالىق جۇمىسپەن قامتۋ ورتالىعى ارقىلى تارتىلادى, – دەدى ول.
ەرمەكوۆ كوشەسىندەگى №№ 2, 4 ۇيلەردىڭ اۋلاسى دا باعدارلاماعا ەنگەن. مۇنداعى جۇمىستار اياقتالۋعا جاقىن. مايقۇدىقتاعى 11«ا» شاعىن اۋدانىنداعى №№7, 11, 19, 22, 23 ۇيلەردىڭ اۋلاسىنداعى جۇمىستار دا قىزۋ جۇرگىزىلىپ جاتىر. مۇنداعى فۋتبول الاڭدارىنا جاساندى كوگال توسەلىپ, سپورتتىق قۇرال-جابدىقتار ورناتىلىپ جاتىر. ويىن الاڭىنا قاراعاندىدا جاسالعان سپورتتىق جابدىقتار پايدالانىلۋدا. بۇل ىسكە جاۋاپتى «ككك لتد» فيرماسى بيىل 142 ويىن الاڭىن ورناتامىز دەگەندى ايتادى. مۇنداي يگى ىستەر مايقۇدىق, پريشاحتينسك جانە سۇرىپتاۋ ەلدى مەكەندەرىندەگى ۇيلەردىڭ اۋلالارىن دا قامتيتىن بولادى.
– ءبىز قاراعاندىلىق «كارات» جشس وندىرۋشىسىمەن جۇمىس ىستەيمىز. ولاردىڭ ترەناجەرلارى مەن ويىن كەشەندەرى مىقتى جانە ولاردىڭ باعاسى ءبىز ءۇشىن وتە ءتيىمدى. ءبىز ءوز الاڭدارىمىزعا جىل جىل كەپىلدىك بەرەمىز. ەگەر وسى ۋاقىت ىشىندە ءبىر نارسە سىنسا, بارلىعىن ءوز ەسەبىمىزدەن قالپىنا كەلتىرۋگە مىندەتتىمىز. سوندىقتان, ءبىز سەنىمدى, تەكسەرىلگەن وندىرۋشىلەرمەن جۇمىس ىستەگەندى قالايمىز, ولاردىڭ ونىمدەرىنىڭ ساپاسىنا سەنىمدى بولۋىسىز كەرەك, – دەيدى مەردىگەر كومپانيانىڭ وكىلى سىمبات توعاي.
ال «ليدەرسترويگرۋپ» كومپانياسىنىڭ وكىلى تيمۋر مىڭباەۆ «ججك» باعدارلاماسى اياسىندا 12 اۋلاعا بالالار مەن سپورت كەشەندەرىن ورناتۋعا كونكۋرستى جەڭىپ العاندارىنا قۋانىشتى ەكەندىگىن جاسىرمادى.
– بۇل ءبىزدىڭ كومپانيا ءۇشىن ۇلكەن كومەك. كارانتين كەزىندە توقتاپ قالعان ەدىك, جۇمىس كولەمى بولعان جوق. قازىر ءبىز ۇيرەنشىكتى ىرعاققا ورالامىز. ءبىزدىڭ كومپانيادا جۇمىس ىستەيتىن 20 ادام بار, ولاردىڭ ءبىر بولىگىن ءبىز جۇمىسپەن قامتۋ ورتالىعى ارقىلى تاۋىپ الدىق. ولاردىڭ بارلىعى قازىر جۇمىسقا جۇمىلدىرىلىپ, جالاقى الادى, – دەيدى ول.
سونداي-اق, پرەسس-تۋر بارىسىندا جۋرناليستەر «ەنەرگوسيستەمى ەلتو» جشس-ىنە قاراستى زاۋىتتا بولىپ, كاسىپورىننىڭ تىنىس-تىرشىلىگىمەن تانىستى. نەگىزى 1973 جىلى قالانعان زاۋىتتا كوشەلەردى جارىقتاندىرۋعا ارنالعان ۇزىندىعى 20, 30, 40 مەتر بولاتىن باعاندار مەن ءتۇرلى شامدار شىعارىلادى. قاراعاندىنىڭ كوشەلەرى مەن اۋلالارىنا وسى كاسىپورىننىڭ ونىمدەرى ورناتىلۋدا. زاۋىت باسشىلىعىنىڭ ايتۋىنشا, كاسىپورىن شىعاراتىن ساپالى ونىمگە دەگەن سۇرانىس جوعارى ەكەن. ءتىپتى, ەلىمىزدىڭ باسقا ايماقتارىنا دا, مىسالى رەسەي, وزبەكستان جانە قىرعىزستان سياقتى كورشى ەلدەرگە دە ونىمدەرى جەتكىزىلەتىن كورىنەدى.
– «جۇمىسپەن قامتۋدىڭ جول كارتاسى» بويىنشا قاراعاندى قالاسىن جارىقتاندىرۋعا 1500 باعان جەتكىزىپ بەرمەكشىمىز. كارانتين كەزىندە 40 ادامدى اقىسىز ەڭبەك دەمالىسىنا جىبەرگەن ەدىك. باعدارلاما ارقىلى سولاردى قايتا شاقىردىق. ەندى, ءونىمدى تۇراقتى وندىرۋگە كۇش سالامىز, – دەيدى زاۋىتتىڭ باس ديرەكتورى تالعات بايعابىلوۆ.
الداعى ۋاقىتتا قاراعاندى قالاسىنىڭ جۇمىسپەن قامتۋ ورتالىعىندا ءالى دە بىرقاتار بوس جۇمىس ورىندارى اشىلادى. ياعني, ەڭبەك ەتىپ, نانىمدى ادال تاپسام دەگەن اعايىنعا, ءتۇرلى جۇمىس ىستەيتىندەرگە, شاتىر جابۋشىلارعا, جيەك جانە كەسەك تاس توسەۋشى ماماندارعا دەگەن سۇرانىس وتە جوعارى بولماق.
قاراعاندى وبلىسى