سونداي-اق جول ەرەجەسىن بۇزعانى ءۇشىن 25 مىڭ تۇرعىن جاۋاپقا تارتىلدى. ستاتيستيكاعا سايكەس جول-كولىك وقيعالارىنىڭ باستى سەبەبى - جول ەرەجەسىن ساقتاماۋ, دەپ حابارلادى pavlodarnews.kz ءتىلشىسى.
وبلىستىق پد ءباسپاسوز قىزمەتىنىڭ مالىمدەۋىنشە, جىل باسىنان بەرى وڭىردە 176 جول-كولىك وقيعاسى تىركەلگەن. سالدارىنان 11 ادام قايتىس بولسا, 262 ادام جاراقات الدى.
ونىڭ ىشىندە بالالاردىڭ قاتىسۋىمەن بولعان 35 جول-كولىك وقيعاسىندا ءبىر بالا قازا تاۋىپ, 38 بالا جاراقات الدى.
- قايعىلى وقيعالار كولىك جۇرگىزۋشىلەرى مەن جاياۋ جۇرگىنشىلەردىڭ دە جول قوزعالىسى ەرەجەلەرىن ساقتاماۋى جانە ۇقىپسىزدىقتىڭ سالدارىنان ورىن الدى, - دەدى دەپارتامەنتتە.
- كوپ جاعدايدا جۇرگىزۋشىلەر بەلگىلەنگەن جىلدامدىقتى اسىرىپ, تىيىم سالىنعان باعدارشام تۇسىنە قاراماي قوزعالىستى جالعاستىرعان. سونداي-اق جاياۋ جۇرگىنشىلەرگە قوزعالىس كەزىندە جول بەرمەۋى جانە كەيبىر جۇرگىزۋشىلەردىڭ ماس كۇيىندە كولىك جۇرگىزگەن وقيعالارى تىركەلدى. جول-كولىك وقيعالارىندا زارداپ شەككەن جاياۋ جۇرگىنشىلەردىڭ كوپشىلىگى جول قاۋىپسىزدىگىنىڭ نەگىزگى تالاپتارىن ەسكەرمەگەن. ولاردىڭ باسىم بولىگى جولدى قىزىل شامعا نەمەسە بەلگىلەنبەگەن جەردەن اسىعىس كەسىپ وتپەك بولعان. - بۇگىنگى تاڭدا جاياۋ جۇرگىنشىلەردىڭ جول-كولىك وقيعالارى تۋرالى 66 فاكتىسى تىركەلدى, - دەدى پوليتسيا دەپارتامەنتىندە. - 5 ادام قازا تاۋىپ, 64 ادام جاراقات الدى.
بۇل رەتتە, حالىقتىڭ اجىراماس بولىگىنە اينالعان سمارتفوندار, GPS قۇرىلعىلارى جانە باسقا دا ەلەكترونيكالار زيانىن تيگىزۋدە. ءتارتىپ ساقشىلارى جول قوزعالىسى قاتىسۋشىلارىنا جول ەرەجەلەرىن قاتاڭ ساقتاۋ كەرەكتىگىن ەسكەرتەدى. جاياۋ جۇرگىنشىلەرگە قىراعىلىقتى ۇمىتپاي, قاراڭعىدا جارىقتاندىرۋ ەلەمەنتتەرى بار كيىم كيۋگە كەڭەس بەرەدى.