ماسكەۋدەگى نيگەريا ەلشىلىگىنە ستۋدەنتتەر نارازىلىق ءبىلدىردى. بۇل تۋرالى «vesti.ru» حابارلادى.
ماسكەۋدىڭ جوعارى وقۋ ورىندارىندا ءبىلىم الىپ جۇرگەن نيگەريانىڭ 20 ستۋدەنتى ءوز ەلشىلىگىنە شاعىمدانىپ كەلگەن بولاتىن. ولار وزدەرىنە تيەسىلى شاكىرتاقىنىڭ ءبىراز ۋاقىت بويى بەرىلمەي جۇرگەنىنە نارازىلىق بىلدىرگەن. الايدا, نيگەريا ەلشىلىگى وكىلدەرى ستۋدەنتتەردىڭ ماسەلەسىن شەشە الماي, ولاردان مەكەمەنى بوساتۋدى تالاپ ەتكەن كورىنەدى. اشىنعان ستۋدەنتتەر ونداعى جيھاز بەن تەحنيكالىق قۇرال-جابدىقتاردى سىندىرعان.
رەسەي ءىىم ءباسپاسوز قىزمەتىنىڭ مالىمدەۋى بويىنشا, وقيعا ورنىنا جەتكەن پوليتسيا قىزمەتكەرلەرى 16 ستۋدەنتتى ۇستاعان. قازىر ولاردى اكىمشىلىك جاۋاپكەرشىلىككە تارتۋ ماسەلەسى قاراستىرىلۋدا.
«ءبىز رەسەيدىڭ حالىقتار دوستاستىعى ۋنيۆەرسيتەتى نيگەريا ستۋدەنتتەرىنىڭ تالابىن قولدايمىز. ويتكەنى, نيگەريا ۇكىمەتى ءوز ستۋدەنتتەرىن قارجىلاندىرۋعا مىندەتتى»,–دەيدى ۋنيۆەرسيتەت رەكتورى ۆلاديمير فيليپپوۆ.
ايدار ورىسباەۆ.