تۇرعىن ءۇي قۇرىلىسىنداعى وتاندىق ءونىم ۇلەسى 90 پايىزدى قۇرايدى. قۇرىلىس قارقىنىنىڭ جىل ساناپ ارتىپ كەلە جاتقانىن ەسكەرسەك, بۇل ءتاپ-ءتاۋىر كورسەتكىش.
بيىل وبلىستدا «نۇرلى جەر» باعدارلاماسى بويىنشا 11 جالدامالى جانە جەڭىلدەتىلگەن نەسيەلىك 12 تۇرعىن ءۇيدىڭ قۇرىلىسى باستالدى. وڭىردە كىرپىش شىعاراتىن 9 كاسىپورىن جۇمىس ىستەيدى. ونىڭ التاۋى ماۋسىمدىق. «ەنكي», «استانا كەراميك» سەرىكتەستىكتەرى مەن ەرەيمەنتاۋ كىرپىش زاۋىتى جىل بويى ءۇزىلىسسىز كىرپىش شىعارۋدا. بارلىعى 145 ميلليون دانادان استام كىرپىش قالىپتايدى. تەمىربەتون كونسترۋكتسيالارى وندىرىسىمەن – «رەگيون-ستروي», «كوكشەتاۋ جولدارى», «نامىس» كاسىپورىندارى اينالىسادى. كوكشەتاۋ تسەمەنت زاۋىتى دا ءوڭىر نارىعىنداعى ىرگەلى ءوندىرىس وشاعى.
– رەسپۋبليكا ايماقتارى اراسىندا ءبىزدىڭ وبلىستىڭ قۇرىلىس جۇمىستارىنىڭ قارقىنى ورتادان جوعارى. ساراپتاپ قاراساڭىز, قولبايلاۋ بولىپ تۇرعان جاي قۇرىلىس ماتەريالدارى سالاسىندا وندىرىستىك بازا جەتكىلىكتى دامىماعان. جوبالىق قۇجاتتاردا وتاندىق ءونىم قولدانىسىنا باسىمدىق بەرۋ ارقىلى وڭىردەگى قۇرىلىس ماتەريالدارى ءوندىرىسىنىڭ دامۋىنا ىقپال ەتەمىز,–دەيدى «كوكشەتاۋگورسەلپروەكت» سەرىكتەستىگىنىڭ ديرەكتورى اناتولي ميتروفانوۆ.
قۇرىلىستىڭ قارقىن الۋى تۇرعىنداردىڭ سەنىمىن ارتتىرۋدا.