رەسەي فەدەراتسياسى تىبا رەسپۋبليكاسىنىڭ باسشىسى شولبان كارا-وول كوروناۆيرۋسقا شالدىعىپ, اۋرۋحاناعا جاتقىزىلدى. بۇل تۋرالى ول ءوزىنىڭ ۆكونتاكتە جەلىسىندەگى پاراقشاسىنا جازىپ, بۇقاراعا بەينەجازباسىن جولداپ, ولاردى ساق بولۋعا شاقىردى.
تىبا باسشىسىنىڭ ايتۋىنا قاراعاندا, وزىنەن باسقا تاعى بىرنەشە لاۋازىمدى شەنەۋنىك ىندەت جۇقتىرعان ەكەن. ولاردىڭ ءبارى ەمدەلىپ جاتىر. «اۋرۋحانادا مەنەن باسقا تاگنا جانە ۇلەگحەم كوجۋن (اۋدان) اكىمدەرى, سونداي-اق اپپارات قىزمەتكەرلەرى ەم قابىلداپ جاتىر. پاندەميانىڭ بەتى وتە جامان. دەنساۋلىققا اسەر ەتۋ جولدارى دا ءارتۇرلى. بىرەۋدىڭ باسى قاتتى اۋىرسا, كەلەسى ادامنىڭ وكپەسى زاقىمدانعان. ەندى بىرەۋلەر اسا قينالا قويمادى. دەسە دە دارىگەرلەر قاۋىمىنىڭ ەڭبەگى ەرەكشە. بىزگە جوعارى دەڭگەيدە ساۋىقتىرۋ شاراسىن جۇرگىزۋدە. بۇيىرسا, بۇنى دا جەڭىپ شىعامىز دەگەن ءۇمىت مول» دەپتى كارا-وول مىرزا.
سونىمەن قاتار, رەسپۋبليكا باسشىسى كوروناۆيرۋس ءوزى ويلاعانىنان قاۋىپتى ەكەنىن ايتىپ, ادامداردى ساق بولۋعا شاقىردى. ءدال قازىر اتالمىش ەلدە ىندەتكە شالدىققاندار سانى 800-گە جۋىقتاپ, ولاردان 100-گە جۋىق ادام ساۋىعىپ شىقسا, ءبىرلى-جارىمى قازا تاپقان كورىنەدى.
رەسپۋبليكا باسشىسىنىڭ ءباسپاسوز حاتشىسى دولاانا سالچاك تاراتقان رەسمي مالىمەتىنە جۇگىنسەك, ەلگە باسشىلىق جاساۋ جۇمىسى رەسپۋبليكانىڭ جاۋاپتى ءمينيسترى الەكساندر بروكەرتكە ۋاقىتشا جۇكتەلىپتى.