بۇگىن, 29 قىركۇيەك كۇنى ەلىمىزدىڭ 6 قالاسىندا پرەمەر-ليگا كوماندالارى اراسىندا 28-تۋردىڭ ويىندارى وينالدى.
تۋردا 1-6 ورىندار ءۇشىن تالاسۋشىلار اراسىندا العاشقى ءۇش ورىندى الىپ كەلە جاتقان كوماندالار تۇگەل جەڭىسكە جەتتى. اتاپ ايتقاندا, ءبىرىنشى ورىنداعى «اقتوبە» الماتىدا ويناعانىنا قاراماستان, جەرگىلىكتى «قايراتتان» 1:0 ەسەبىمەن باسىم ءتۇستى. راس, ماچتىڭ ءبىرىنشى بولىگى نەگىزىنەن الاڭ يەلەرىنىڭ باسىمدىلىعىمەن ءوتتى. دەگەنمەن, قوناقتاردىڭ بۇل ۋاقىت ارالىعىندا دا گول سوعىپ, العا شىعۋعا زور مۇمكىندىگى بولدى. ولاردىڭ قاقپاعا قاراي ۇرعان ەكى دوبىنىڭ ناتيجەلى اياياقتالۋىنا ءسال عانا دالدىك جەتپەي قالعانىن اياتپاعاندا, ءبىر رەت ءتىپتى ون ءبىر مەترلىك ايىپ دوبىن دا پايدالانا المادى. دۇرىسى, الەكساندر گەنريح ۇرعان پەنالتي داربازا اۋماعىنا تۋرالاپ تا بارعان جوق. مۇنىڭ ەسەسىنە, اقتوبەلىكتەر ەكىنشى تايمدا ءبىرشاما بەلسەندى وينادى. بىراق ولار ويىنداعى جالعىز گولدى العاشقى 90 مينۋتتا ەمەس, وعان قوسىلعان ءبىرىنشى مينۋتتا سوقتى.
شىمكەنتتە «ورداباسى » تۋرنير كەستەسىندە ەكىنشى بولىپ كەلە جاتقان «استانانى» قابىلداپ, 0:2 بولىپ ۇتىلدى. وسىمەن شىمدى شاھاردىڭ شاندوزدارى قاتارىنان ءۇشىنشى مارتە جەڭىلىپ وتىر. ال كەستەنىڭ ءۇشىنشى ساتىسىندا تۇرعان پاۆلوداردىڭ «ەرتىسى» ءوزىنىڭ ءىزىن باسىپ كەلە جاتقان «شاحتەرمەن» ويىندا جەڭىستى ەڭ سوڭعى مينۋتتاردا تارتىپ اكەتتى. وندا ءتىپتى قوناقتار ءبىرىنشى بولىپ ەسەپ اشتى. دەگەنمەن, كوپ ۇزاماي الاڭداعى جاعدايدى تەڭەستىرگەن الاڭ يەلەرى ويىندى جەڭىسكە دەيىپ اپارىپ اياقتادى.
ەندى ويىنداردىڭ ناتيجەلەرىمەن تانىس بولىڭىزدار:
«ۆوستوك» (وسكەمەن) – «اقجايىق» (ورال) 2:0
گولدار: ەربەس (36), كوستيۋك (79, پەنالتي)
«ورداباسى» (شىمكەنت) – «استانا» (استانا) 0:2
گولدار: قونىسباەۆ (8), تۆۋماسي (75)
«قايرات» (الماتى) – «اقتوبە» (اقتوبە) 0:1
گول: بادلو (90+1)
«ەرتىس» (پاۆلودار) – «شاحتەر» (قاراعاندى) 2:1
گولدار: چيسۋلين (78), مۋرزوەۆ (88) – جولشورين (70)
«تاراز» (تاراز) – «جەتىسۋ» (تالدىقورعان) 0:1
گول: تىلەشوۆ (3)
«اتىراۋ» (اتىراۋ) – «توبىل» (قوستاناي) 0:0
كەلەسى تۋردىڭ ويىندارى 5 قازان كۇنى وينالادى. بۇل ەكى ورتادا, 2 قازان كۇنى قاراعاندىنىڭ «شاحتەرى» استانادا ەۋروپا ليگاسى توپتىق ويىندارىنىڭ 2-تۋرىندا ءيزرايلدىڭ حايفا قالاسىنىڭ «ماككابي» كومانداسىن قابىلدايدى.
رۋسلان يگىلىك.