بوكس. جاستار. گاۋھار ەرمەكباي – الەم چەمپيونى!

بولگاريانىڭ البەنا قالاسىندا كەشە, 28 قىركۇيەك كۇنى تۇندە مارەگە جەتكەن جاستار (1995-1996 جج.) اراسىنداعى الەم چەمپيوناتىندا قازاقستاندىقتار 1 التىن, 1 كۇمىس جانە 3 قولا مەدال جەڭىپ الدى. بۇل تۋرالى Egemennews.kz ءتىلشىسى حابارلادى. ءبىزدىڭ قىزدار اراسىندا 69 كيلوعا دەيىنگى سالماقتا ونەر كورسەتكەن گاۋھار ەرمەكباي چەمپيون اتاندى. بولگاريا رينگىندە 4 ۇرىس وتكىزگەن ول ءتۋرنيردى 1/8 فينالدان باستاپ, يتاليان دوميزيانا گيۋليانەلليدى تالاسسىز (3:0) جەڭدى. ال شيرەك فينالدا ورىس قىزى اننا بوبىرەۆانى 2:1 ەسەبىمەن تىزە بۇكتىردى. جارتىلاي فينالدا وعان امەريكالىق سامانتا كينچەن قارسى تۇرا المادى – 3:0! سوسىن التىن مەدال ءۇشىن تالاستا يرلاند كريستينە دەسموندتان باس بايگەنى تارتىپ اكەتتى – 2:1. بىرىنشىلىكتە 60 كيلوعا دەيىنگى سالماقتا ەلىمىزدىڭ نامىسىن قورعاعان ايدانا اراپباەۆا اقتىق ايقاستا پولياك اگنەتا رۋگيەلسكاعا 0:3 ەسەبىمەن جول بەرىپ الدى. ال قولا مەدالدى الۋا بالقىبەكوۆا (48 كگ), ۆالەنتينا حالزوۆا(75 كگ) جانە اناستاسيا رىلينا (81 كگ) ەسىمدى قىزدارىمىز قانجىعاعا بايلادى. جالپى, چەمپيوناتتا پولياك قىزدارى – 2, ال بولگاريا, تايپەي, قىتاي, شۆەتسيا, قازاقستان, اقش, ۆەنگريا جانە رەسەي كوماندالارى ءبىر-بىردەن چەمپيون شىعاردى. كوماندالىق ءبىرىنشى ورىن وسىعان وراي 2 التىن, 1 كۇمىس مەدالى بار پولشا قۇراماسىنا بۇيىردى. ەكىنشى ورىنعا 1 التىن, 2 كۇمىس مەدالمەن قىتاي قىزدارى شىقتى. ءبىزدىڭ جاساق ءۇشىنشى ورىنعا تۇراقتادى. دامير قوجامقۇل.