ەقىۇ-نىڭ ءىس باسىنداعى ءتوراعاسى, قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆتىڭ شىعىس ەۋروپاداعى ءۇش مەملەكەت – بەلارۋس, ۋكراينا, مولدوۆا رەسپۋبليكالارىنا ساپارى اياقتالدى.
ديپلوماتياداعى باستى قارۋ–ورنىمەن ايتىلعان ءسوز. جۇيەسىن تاپقان ءسوز قۇدىرەتىنىڭ الدىندا قايقيعان باس ءيىلىپ, قايرالعان قىلىش قىنىنا تۇسكەنىنىڭ مىسالىنا تاريحتى پاراقتاي وتىرىپ كوز جەتكىزۋگە بولادى. قازاقستانعا ەقىۇ-عا توراعالىق تۇسىندا وسى قارۋدى مەيلىنشە ۆانكۋۆەردەن ۆلاديۆوستوكقا دەيىنگى الاپتى الىپ جاتقان 56 مەملەكەتتىڭ, ونداعى حالىقتاردىڭ يگىلىگىنە بار پارمەنىمەن جۇمساۋىنا تۋرا كەلەدى.
ولاي دەيتىنىمىز, ەقىۇ-نىڭ ۇنەمى نازارىنداعى ۇزاققا سوزىلعان كيكىلجىڭدەر وشاعىنىڭ كوبى كەڭەس وداعىنىڭ شەكپەنىنەن شىققان ەلدەردىڭ شەڭبەرىندە بولعان سوڭ وزگە توراعالارعا قاراعاندا قازاقستاننىڭ ماسەلەنى ۇعىنۋى, ىشكى جاعدايدى جەتىگىرەك باعامداۋى كوپ رەتتە الدىڭعى كەزەككە شىعادى. شىعىس ەۋروپاداعى وسىنداي ءبىر قاقتىعىس ورنى – 20 جىل بويىنا تانىلماعان, وزدەرىن پريدنەستروۆە مولداۆيا رەسپۋبليكاسى دەپ جاريالاعان پريدنەستروۆە بولىپ وتىر. ءىس باسىنداعى توراعانىڭ ساپارىندا قاي ەلدە دە ءجيى كوتەرىلگەن ساۋالدىڭ قاتارىندا وسى ماسەلەنىڭ جاتۋى سوندىقتان دا شىعار.
جالپى, ساپار الدىمەن ەقىۇ-عا توراعا رەتىندە ىسكە اسىرىلعاندىقتان, قازاقستان بۇل تۇستاعى العا قويعان ماقساتتارىن ورىنداۋدا تمد-لىق ارىپتەستەرىنىڭ قاي ءماسەلەدە ءبىر ارناعا توعىساتىنىن ناقتىلاۋدى ماقسات تۇتتى دەسەك, قاتەلەسپەسپىز. ارينە, وسى ساپار بارىسىندا كوتەرىلگەن قاي ماسەلەنىڭ دە وزىندىك سالماعى, كوتەرەر جۇگى بار. ءۇش مەملەكەتتە ايتىلعان اڭگىمەلەردى, شەشىلەتىن پروبلەمالار مەن اتقارىلاتىن جۇمىستاردى توپتاستىرىپ قاراساق, وسىلاردىڭ اراسىنان بىرنەشە ماسەلە العا شىعادى. بىرىنشىدەن, ەقىۇ جۇمىسىنىڭ ءاۋ باستاعى جوسپارىندا ءاربىر ەكى جىل سايىن شاقىرىلۋى ءتيىس مۇشە مەملەكەتتەر باسشىلارىنىڭ سوڭعى 10 جىل جۇزىندە جيىلماعان ءسامميتىن وتكىزۋدەگى پىكىرلەردى باعامداۋ, ەكىنشىدەن, سول سامميت ماسەلەسى شەشىلگەن كۇندە ءسى مينيسترلەرىنىڭ بەيرەسمي كەڭەسىن شاقىرۋ ارقىلى وسى كەلەلى باسقوسۋدا كۇن تارتىبىنە قويىلاتىن ماسەلەلەردى تالقىلاۋ, ياعني سامميتكە دايىندىق, ءۇشىنشىدەن, پريدنەستروۆەگە قاتىستى شيەلەنىسكەن ءتۇيىندى جۇمسارتۋ جولىنداعى جۇمىستار. بۇلاردىڭ سىرتىندا, ارينە, ەكىجاقتى بايلانىستاردى تەرەڭدەتۋ, قازاقستان, رەسەي جانە بەلارۋس مەملەكەتتەرى اراسىنداعى كەدەندىك وداقتاعى قاتىناستاردى قالىپتى جولعا قويۋ جانە ت.ت. تولىپ جاتقان ماسەلەلەر جاتقانى ءوز-وزىنەن تۇسىنىكتى.
العاشقى كۇنى ءىس باسىنداعى توراعانىڭ بەلارۋس پرەزيدەنتى الەكساندر لۋكاشەنكومەن كەزدەسۋى بەلگىلەنگەن ۋاقىت ولشەمىنەن شىعىپ, 1 ساعات 45 مينۋتقا سوزىلۋىنىڭ ءوزى ءبىراز ءجايتتى اڭعارتسا كەرەك. قازاقستاننىڭ توراعالىعى تۇسىندا بارلىق باستامالاردى قولداۋعا ازىرلىگىن بىلدىرگەن الەكساندر لۋكاشەنكوعا ەلباسىنىڭ ەلىمىزگە ساپارمەن كەلۋى جونىندەگى شاقىرتۋى ىقىلاسپەن قابىل الىندى جانە بەلارۋس تاراپى قازاقستان پرەزيدەنتىن وزىنە قولايلى دەگەن ۋاقىتتا ەلدەرىنە ساپارلاپ قايتۋعا شاقىردى. نەگىزىنەن العاندا بەلارۋس ەقىۇ-عا وعان مۇشە مەملەكەتتەر اراسىندا ەڭ بەلسەندى قاتىسۋشىلاردىڭ ءبىرى. اسىرەسە, ۇيىمعا ءبىزدىڭ توراعالىق ۋاقىتىندا ول ءوز كورىنىسىن تاپقان, ياعني بەلارۋس ەقىۇ-دا ەكونوميكا-ەكولوگيالىق فورۋمنىڭ وسى ماسەلەدەگى ۇيلەستىرۋشىسى, توراعاسى قىزمەتىن اتقارىپ وتىر. سونىمەن قاتار, بەلارۋس ءبىزدىڭ توراعالىعىمىزدىڭ تۇسىندا اتقارىلۋى جوسپارلانعان ۆەناداعى جانە استاناداعى ءىس-شارالارعا ءوزىنىڭ بەلسەندى تۇردە اتسالىساتىنىن جەتكىزگەن.
ارينە, نازاردان كەدەن وداعىنا قاتىستى ماسەلەلەر تىس قالعان جوق. قازاقستاننىڭ ەكونوميكالىق الەۋەتىن جاقسى بىلەتىن بەلارۋس تاراپى توڭازىتقىشتار, تەلەۆيزورلار شىعارۋ مەن ماشينە جاساۋ ىسىندەگى ءوزىنىڭ دايىن ونىمدەرىن بىزگە اكەلۋمەن شەكتەلمەي, قازاقستان جاعى قىزىعۋشىلىق تانىتىپ وتىرعان وزگە دە سەكتورلاردى دامىتۋدا ءبىزدىڭ ەلدىڭ ينۆەستيتسياسىن تارتۋعا پەيىلدى ەكەنىن ءبىلدىردى. ال ءبىزدىڭ ەل ءۇشىن بەلارۋستىڭ داعدارىس تۇسىنداعى ەكونوميكالىق ساياساتى قاپەردە ۇستايتىن نارسە. وسى كەزەڭدە بەلارۋس 160-قا جۋىق الىس-جاقىن ەلدەرمەن ساۋدا-ساتتىق ءجۇرگىزۋدە. ونىڭ ىشىندە 30-عا تامانى سوڭعى جىلدىڭ ىشىندە ىسكە اسىرىلىپتى. ولار وزدەرى شىعارعان تاۋارلار ءۇشىن جاڭا رىنوك ىزدەۋدە الىستاعى لاتىن امەريكاسىنداعى ۆەنەسۋەلا ءتارىزدى نەمەسە افريكاداعى وزگە مەملەكەتتەرگە دە جول تارتقان. سوڭعى جىلدىڭ ىشىندە بەلارۋس كاپيتالى ەسەبىنەن وسىنداي شەتەلدەردە 26 كاسىپورىن اشىلىپتى. ال ەلدىڭ شەكارادان تىس ايماقتارداعى مۇددەسىن العا جىلجىتۋ ءۇشىن بەلارۋس ۇكىمەتى تاراپىنان ليزينگتىك كومپانيا قۇرىلىپتى. ول, ارينە, شەت مەملەكەتتەرگە ەكسپورتتى جانداندىرۋعا جۇمىس جاساۋدا. زەرتتەۋگە تۇرارلىق, جاقسى تۇسىن ءوز ەكونوميكامىزعا بەيىمدەپ پايدالاناتىن شارۋا ەكەن دەپ وي تۇيدىك ىشتەي.
ءىس باسىنداعى توراعا پرەزيدەنت الەكساندر لۋكاشەنكومەن, سىرتقى ىستەر ءمينيسترى سەرگەي مارتىنوۆپەن, ۇلتتىق كەڭەستىڭ وكىلدەر پالاتاسىنىڭ توراعاسى ۆلاديمير اندرەيچەنكومەن كەزدەسۋلەر بارىسىندا بەلارۋس مەملەكەتىنىڭ حالىقارالىق بەدەلدى ۇيىمنىڭ جۇمىسىنا ايتارلىقتاي ۇلەس قوسىپ كەلە جاتقانىن ايتىپ, قازاقستان مەن بەلارۋس مەملەكەتتەرىنىڭ ستراتەگيالىق ارىپتەس رەتىندە ۇيىمنىڭ جۇمىسىن جانداندىرۋدا, اسىرەسە, قازىرگىدەي مۇشە مەملەكەتتەر ەۋروپانىڭ جاڭا قاۋىپسىزدىگىنىڭ ساۋلەتىنە قاتىستى ماسەلەنى كوتەرىپ جاتقان تۇسىنداعى ماڭىزىنا ءمان بەردى.
جاڭادان مەملەكەت باسشىسىن سايلاعان ۋكراينا 2013 جىلعى ەقىۇ توراعالىعىنان ۇمىتكەر كورىنەدى. “الماقتىڭ دا سالماعى بار” دەگەندەي, كەزىندە قازاقستان ءتوراعالىعىنا قولداۋ كورسەتكەن ەل بىزدەن ەندى قارىمتا كۇتكەن سىڭايدا. بۇل ءجايت ەقىۇ جانە ەكىجاقتى قاتىناستار كوتەرىلگەن ءاربىر كەزدەسۋدە بوي كورسەتكەن. ارينە, ءبىزدىڭ تاراپ ۋكرايناعا قارىز بولىپ قالمايتىنىنا سەندىردى. پرەزيدەنت ۆيكتور يانۋكوۆيچ قازاقستانعا شاقىرۋدى العىسپەن قابىل الىپ, ءوزىنىڭ تاياۋ مەزگىلدە ەلىمىزگە كەلەتىنىن ايتىپ, قازاقستان باسشىسىن كيەۆكە شاقىردى.
ۆيكتور يانۋكوۆيچ: ء“بىز قازاقستاننىڭ جوعارى دەڭگەيدەگى سامميت وتكىزۋ نيەتىن تولىق قولدايمىز, ونىڭ كۇن ءتارتىبىن اقىلداسۋعا پەيىلدىمىز, بۇل رەتتە وعان جۇرگىزىلىپ جاتقان دايىندىق جۇمىستارىن دا بىلگىمىز كەلەدى”, دەپ “كورفۋ پروتسەسى” دەگەن بەيرەسمي اتاۋعا يە رەسەي جاعى ۇسىنعان ەۋروپا قاۋىپسىزدىگىنىڭ جاڭا ۇلگىسىن قولدايتىندىقتارىن جەتكىزدى. ال دنەستر بويىنداعى كيىكىلجىڭگە قاتىستى بۇل ءماسەلەدە مولدوۆانىڭ تەرريتوريالىق تۇتاستىعى ساقتالىنىپ, الايدا ونداعى از ۇلتتاردىڭ مۇددەسى ەسكەرىلە وتىرىپ, ول ايماققا ارنايى ءمارتەبە بەرىلۋدى قالايتىندىقتارىن ءبىلدىردى. وسىناۋ 20 جىلعا سوزىلعان پروبلەمانى قاراستىرۋ 5 پليۋس 2 فورماتىندا, ياعني كەلىسىمگە كەلە الماي وتىرعان ەكى جاق مولدوۆا مەن پريدنەستروۆە, سونداي-اق ارااعايىندار – رەسەي, ۋكراينا جانە ەقىۇ, بايقاۋشىلار – اقش جانە ەۋرووداق قاتىسۋىمەن جۇرگىزىلۋى قاجەتتىگىن العا تارتتى. ۋكراينانىڭ سىرتقى ىستەر مينيسترى كونستانتين گريششەنكو ەقىۇ ءسامميتىنىڭ كۇن تارتىبىنە جالپى قاۋىپسىزدىك پروبلەمالارى مەن ءتۇيىنى شەشىلمەي تۇرعان داۋ-دامايلاردى رەتتەۋ ماسەلەلەرى ەنسە دۇرىس بولار ەدى, سامميت وتكىزىلمەگەن سوڭعى 10 جىلدىڭ ىشىندە كوپتەگەن ءوزگەرىستەر ورىن الدى جانە قۇرلىقتاعى قاۋىپسىزدىك ماسەلەلەرى بۇگىندە جاڭاشا قويىلۋدا. قازىرگى تاڭدا ەقىۇ-نىڭ قاۋىپسىزدىك سالاسىنداعى ءرولى جەتە باعالانباي وتىرعان سياقتى. ءتىپتى ورتاق مامىلە جاسالماسا دا, ەلدەردىڭ پروبلەماعا قاتىستى كوزقاراستارىن ۇيلەستىرۋگە بولادى, دەگەن ۋكراينالىق ديپلومات ءوزىنىڭ 16-17 شىلدەدە الماتىدا وتەتىن ءسى مينيسترلەرىنىڭ بەيرەسمي كەزدەسۋىنە قۋانا ساپار شەگەتىنىن دە جەتكىزدى.
كيەۆكە ساپارى ۋاقىتىندا ءىس باسىنداعى توراعا ۋكراينا پرەزيدەنتىمەن, سىرتقى ىستەر ءمينيسترىمەن, جوعارعى رادا توراعاسى ۆلاديمير ليتۆينمەن, پرەمەر-مينيستر نيكولاي ازاروۆپەن جانە ساياسي پارتيالاردىڭ سەركەلەرىمەن دە جۇزدەستى. ولاردىڭ قاي-قايسىنىڭ دا ەكى ەلدى جاقىنداستىرۋعا ۇلەسىن قوساتىنىنا كۇمان جوق. جالپى, قازاقستان مەن ۋكراينا اراسىنداعى قارىم-قاتىناستار ىرعاقتى دامىپ قانا قويماي, سىرتقى ساياسي مەكەمەلەر اراسىنداعى جانە حالىقارالىق ۇيىمدار شەڭبەرىندەگى ءوزارا ءىس-قيمىلدار ۇتىمدى ءجۇرگىزىلىپ, ەكى تاراپتىڭ كوپتەگەن حالىقارالىق ماسەلەلەردەگى ۇستانىمدارى ءوزارا سايكەس كەلەتىندىگىن ايتا كەتكەن ءجون.
ەقىۇ-نىڭ ءىس باسىنداعى توراعاسىنىڭ سوڭعى ۇشاعىن قوندىرعان الاڭى مولدوۆا رەسپۋبليكاسى بولدى. ساپار باعدارلاماسىنا سايكەس قانات ساۋداباەۆ كيشينەۆكە ناۋرىزدىڭ 31-ءى كۇنى كەشقۇرىم كەلدى. ەرتەڭىنە العاشقى جۇزدەسۋدى مولدوۆا پرەمەر-ءمينيسترىنىڭ ورىنباسارى – سىرتقى ىستەر جانە ەۋروپالىق ىقپالداستىق ءمينيسترى يۋريە ليانكەمەن وتكىزىپ, ەكى مينيسترلىك اراسىندا ىنتىماقتاستىق جونىندەگى مەموراندۋمعا قول قويىسىمەن جۋرناليستەرگە ارنالعان بريفينگ ۇيىمداستىرىلدى. يۋريە ليانكە مولدوۆا تاراپىنىڭ دنەستر بويىنداعى ۇزاققا سوزىلعان كيكىلجىڭدى تەك ساياسي رەتتەۋدى قالايتىنىن ايتىپ, وزدەرىنىڭ ەقىۇ-نىڭ ءىس باسىنداعى توراعا تاراپىنان دنەستر بويىنداعى جانجالدى شەشۋدە رەسمي كەلىسسوزدەردى جالعاستىرۋعا جاردەمدەسەتىن ىزگى نيەتىن سەزىنىپ وتىرعانىن جەتكىزدى. سوندىقتان استانا قالاسىندا مامىر ايىندا 5 پليۋس 2 فورماتىندا كەزدەسۋ وتكىزۋ تۋرالى ۇسىنىس كوڭىلىمىزگە مەيلىنشە قونادى, كەز كەلگەن پروبلەمانى ۇنقاتىسۋ ارقىلى شەشۋگە بولادى عوي دەپ ويلايمىز, دەدى مولداۆان ديپلوماتى.
مولداۆان حالقى قازىرگى كۇنى ساياسي داعدارىستى باستان كەشىرىپ وتىر. كونستيتۋتسيا بويىنشا ەكى رەت پرەزيدەنت قىزمەتىن اتقارۋدىڭ مەرزىمى تاۋسىلۋىنا بايلانىستى جۇمىستان كەتۋگە ارىزىن بەرگەن كوممۋنيست ۆلاديمير ءۆورونيننىڭ پورتفەلىن جيناپ قويعانىنا دا بىرنەشە ايدىڭ ءجۇزى بولدى. بىراق ءالى دە مولدوۆا پرەزيدەنتى مەملەكەت باسىنا كەلۋ ءۇشىن ەلدە قايتا سايلاۋ وتە مە, الدە كونستيتۋتسياعا وزگەرىستەر ەنىپ, رەفەرەندۋم وتكىزىلە مە, ونىڭ باسى اشىلماعان كۇيىندە. كونستيتۋتسياعا سايكەس پرەزيدەنتتىڭ مىندەتىن پارلامەنت سپيكەرى ميحاي گيمپۋ اتقارۋدا. قانات ساۋداباەۆ داۋ-دامايى باسىلماي تۇرعان دنەستر بويىنا كولىگىن بۇرماستان بۇرىن ميحاي گيمپۋمەن, سونداي-اق ەل پرەمەر-ءمينيسترى ۆلاديمير فيلاتپەن, مۇنان سوڭ جانجال وشاعى تيراسپولگە بارىپ, پريدنەستروۆە ليدەرى يگور سميرنوۆپەن كەزدەستى.
كەڭەس وداعى تاراۋدان از عانا بۇرىن دنەستر بويىنداعى مولداۆيانىڭ 5 اۋدانى وزدەرىن ورتالىعىن تيراسپول ەتىپ بەلگىلەپ, وداق قۇرامىنداعى پريدنەستروۆە سوتسياليستىك رەسپۋبليكاسى دەپ جاريالاعان بولاتىن. وعان نەگىزىنەن دنەستردىڭ سول جاعالاۋىنداعى ءوندىرىستى ايماقتار مەن وڭ جاعاداعى بەندەرى قالاسى كىرگەن. ىرگەسىن 1792 جىلى ەكىنشى ەكاتەرينانىڭ بۇيرىعىمەن سۋۆوروۆ قالادى دەيتىن تيراسپول – دنەستر بويىنداعى ءىرى قالانىڭ ءبىرى. تيراسپولدە جانە دنەستر جاعالاۋىنداعى داۋلى ولكەدە حالىق قۇرامى ورىس, ۋكراين جانە مولداۆانداردان تۇرادى. اۋەلدەگى قىرقىس ءالىپبي ماسەلەسىنە قاتىستى شىقتى, دەيدى تيراسپول تۇرعىندارى. 1992 جىلى داۋ ءورشىگەنى سونشالىق, ارادا بىرنەشە اي قارۋلى قاقتىعىس بولىپ, ەكى جاقتان دا ادامدار كوز جۇمدى. اقىرى ءبىتىمگەرلەر اسكەرى كىرۋمەن جاعداي باقىلاۋعا الىنىپ, كۇنى بۇگىنگە دەيىن بىتىمگەرلەر جاعدايدى قاداعالاپ تۇر.
ءىس باسىنداعى توراعاعا جاعدايدى ءمالىم ەتكەن قوس تاراپ ءبىرىن-ءبىرى ايىپتاپ, بۇعان دەيىن 5 پليۋس 2 فورماتىندا جانە رەسمي كيشينەۆ پەن تيراسپول اراسىندا قول جەتكەن كەلىسىمدەردىڭ ورىندالماۋىن العا تارتتى. كيشينەۆ ورىندالماعان كەلىسىمدەر 140-تىڭ سىرتىنا شىقتى دەسە, تيراسپول ونى 80-نەن استى دەيدى. وسىلايشا ۇلكەن قيىندىقپەن قول جەتكىزگەن كەلىسىمدەردىڭ اياقاستى بولۋىنان جەرگىلىكتى حالىق زارداپ شەگۋدە. پريدنەستروۆە ۋكرايندارى ۋكراينا ازاماتتىعىن السا, ورىستارى رەسەي ازاماتتارى رەتىندە تولقۇجاتتار العان. ايتا كەتۋ كەرەك, 20 جىل بويىنا حالىقارالىق قوعامداستىقتا رەسمي مويىندالماعان پريدنەستروۆەنىڭ ءوز كونستيتۋتسياسى, بارلىق زاڭ شىعارۋشى ورگانىمەن قاتار, اتقارۋشى ورگاندارى بار. تانىلماعان ايماق تۇرعىندارىنا شەتەلدەرگە شىعۋ, نەمەسە وسى ەلدە تۇرعىزىلعان جاڭا الەۋمەتتىك نىسانداردى زاماناۋي قۇرال-جابدىقتارمەن قامتاماسىز ەتۋدىڭ قيىندىعى شاشەتەكتەن ەكەن. ازاماتتىق قۇقىقتارى ايقىندالماعان سوڭ, دنەستر بويىنداعى جاستار جوعارى ءبىلىم الۋلارىندا, نەكەلەسۋ, بالا تۋدى تىركەۋ جانە تاعى باسقا ماسەلەلەردە تۇيىققا تىرەلگەن. ءىس باسىنداعى توراعا: “جىلدار بويى قوردالانعان پروبلەمالاردى بىردەن شەشىپ تاستاۋ ءمۇمكىن ەمەس, بىراق ۇنقاتىسۋ ارقىلى ءبىر-بىرىمەن ۇعىنىسۋدىڭ ماڭىزى جوعارى. الدىمەن 5 پليۋس 2 فورماتىنداعى كەزدەسۋدە قاراپايىم ادامدارعا باعىتتالعان, ولاردىڭ ومىرلەرىن جەڭىلدەتەتىن قاراپايىم قادامدار جاسالۋى ءتيىس. قايتكەن كۇندە دە ەكى جاقتىڭ دا قاراپايىم ادامدارى زارداپ شەگىپ, قيىندىق كورمەۋى ءتيىس. ۇنقاتىسۋ وسىنداي ناقتى كەلىسىمدەرگە الىپ كەلسە, ونان حالىق ۇتاتىن بولادى”, دەپ قاداپ ايتتى. الدىڭعى كەزەكتە گۋمانيتارلىق, الەۋمەتتىك ماسەلەلەر بويىنشا قادامدار جاسالسا, قىرعي-قاباقتىق جىلى شىرايعا اۋىسار ەدى دەگەن ويىن جەتكىزدى.
ەلگە قايتىپ كەلە جاتقاندا ۇشاق ۇستىندە جۋرناليستەرمەن اڭگىمەلەسكەن ايرىقشا تاپسىرمالار جونىندەگى ەلشى – ەقىۇ-نىڭ ءىس باسىنداعى توراعاسىنىڭ ارنايى وكىلى بولات نۇرعاليەۆ قانات ساۋداباەۆ پەن مولدوۆا پرەمەر-مينيسترى ۆلاد فيلاتتىڭ شاعىن جانە كەڭەيتىلگەن قۇرامدا بولعان كەلىسسوزدەرىندە تاراپتار ساۋدا-ەكونوميكالىق باعىتتاعى ءتۇرلى ماسەلەلەردىڭ قوردالانىپ قالعانى تۋرالى ورتاق پىكىرگە كەلگەنىن ايتتى. قازاقستاندا مولدوۆا كومپانيالارى ءۇشىن پەرسپەكتيۆالى باعىتتاردى جانە قازاقستاندىق بيزنەس ءۇشىن اگرارلىق سالادا يگەرىلمەگەن الەۋەتتى ەسكەرە وتىرىپ, ەكى ەلدىڭ پرەمەر-مينيسترلەرى دەڭگەيىندە كەزدەسۋ وتكىزۋدىڭ قاجەتتىگى اتاپ كورسەتىلىپ, ۆلاد فيلاتتىڭ وسى جىلى قازاقستانعا جۇمىس ساپارىمەن كەلەتىندىگى ۋاعدالاسىلعان.
انار تولەۋحانقىزى.