اقتوبە وبلىسىندا كوكتەمدە 865 مىڭ گەكتار القاپقا ءدان سەبىلەدى. ونىڭ ىشىندە 506 مىڭ گا ءداندى داقىلدار, 75 مىڭ گا مايلى داقىلدار, 277 مىڭ گا مال ازىعى داقىلدارى ەگىلسە, 3,5 مىڭ گا كارتوپ جانە 3,3 مىڭ گەكتارعا باسقا دا كوكونىس تۇرلەرى وتىرعىزىلادى. قازىرگى ۋاقىتتا قاجەتتى تۇقىمنىڭ 90 %-ى ازىرلەنىپ, 42 مىڭ توننا تۇقىم ساپاسىنا لابوراتوريالىق تەكسەرىس جۇرگىزىلگەن, دەپ حابارلايدى Egemen.kz.
وبلىستىق اۋىل شارۋاشىلىعى باسقارماسى باسشىسى اسقار جۇسىباليەۆتىڭ حابارلاۋىنشا, ەگىس ناۋقانىنا 1,5 مىڭ تراكتور, 100-دەن استام ەگىس كەشەنى, 1,4 مىڭ دانسەپكىش جانە 1,8 مىڭ جەر جىرتاتىن تەحنيكا دايىن. بيىل اقتوبە وبلىسىنا ەگىستىك جۇمىستارىنا 7,9 مىڭ توننا جەڭىلدەتىلگەن جاعارماي وتىنى ءبولىندى. ازىرگە شارۋالارعا جاڭارمايدىڭ ءار ءليترى قانداي باعامەن جەتكىزىلەتىنى بەلگىسىز. دالالىق جۇمىستارعا بولىنەتىن وتىن باعاسىن ەنەرگەتيكا مينيسترلىگى بەكىتكەننەن كەيىن جەتكىزۋشى وپەراتور بەلگىلەيدى.
ەگىس القابىنداعى جۇمىستاردى ۋاقتىلى اياقتاپ, استىقتى دەر كەزىندە جيناپ الۋ قاجەت - پرەزيدەنت
وسى جىلى «كەڭ دالا-2» باعدارلاماسىمەن ەگىس ناۋقانىنا 5 %-دىق جىلدىق مولشەرلەمەمەن نەسيە بەرۋ جالعاسىپ جاتىر. قازىرگى ۋاقىتتا شارۋالار 1,7 ملرد تەڭگە جەڭىلدەتىلگەن نەسيە الىپ ۇلگەرگەن. وعان قوسا وسىمدىك شارۋاشىلىعىن سۋبسيديالاۋعا 2,1 ملرد تەڭگە قاراستىرىلدى. جىل سايىن شىلدەنىڭ اپتاپ ىستىعىندا شەگىرتكەلەر قاپتاپ, ەگىستىككە وراسان زور زيان كەلتىرىپ جاتادى. اۋىل شارۋاشىلىعى باسقارماسىنىڭ دەرەگىنە قاراعاندا, بيىل زيانكەستەردىڭ 160 مىڭ گەكتار القاپقا تارالۋ قاۋپى بار. سول سەبەپتى قۇمدى القاپتاردا ۋلاۋ جۇمىستارىن ەرتەرەك قولعا الۋ پىسىقتالدى.
2026 جىلعى ەگىس ناۋقانىن ەرتە قارجىلاندىرۋ باستالدى