قازاق ساحناسىنداعى فرانتسۋز تۋىندىسى

ساحنادا – جالعىز ايەل. ونىڭ كوزگە كورىنبەيتىن سۇيىكتىسىمەن تەلەفون ارقىلى تىلدەسۋى – سىرتتاي قاراعاندا قاراپايىم ديالوگ. الايدا سول ديالوگتىڭ استارىندا كۇيرەپ بارا جاتقان تاعدىر, ءۇزىلىپ بارا جاتقان ءۇمىت, سوڭعى رەت تىرشىلىككە جارماسقان سەزىم بار.

قويىلىمنىڭ باستى ەرەكشەلىگى – جان كوكتونىڭ پەساسى نەگىزىندە جازىلعان حح عاسىرداعى وپەرا ونەرىنىڭ جاۋھارى جالعىز كەيىپكەردىڭ تاعدىرى مەن ىشكى ارپالىسى ارقىلى ساراپتالۋىندا. ءبىر كەيىپكەردىڭ سەزىم الەمىن اشا وتىرىپ, تۋىن­دى كورەرمەنگە جالعىزدىق, ماحاببات, ءۇمىت پەن قوشتاسۋ سياقتى تەرەڭ ەموتسيالىق كۇيلەردى سەزىندىرەدى.

اتالعان تۋىندى بۇعان دەيىن بىرنەشە الەم تىلىندە ساحنالانىپ, ءار حالىقتىڭ كوركەمدىك قابىلداۋىنا ساي جاڭاشا بوياۋ تاپقان ەدى. اتاپ ايتساق, اعىلشىن, يتاليا, ورىس, يسپان, جاپون, كارىس, ۋكراين, ءتىپتى ىم-يشارا تىلىندە ساحنالانسا, ەندى سول تىزىمگە قازاق ءتىلى قوسىلدى. پەسا 2023 جىلى م. اۋەزوۆ اتىنداعى قازاق ۇلتتىق دراما تەاترى ساحناسىندا «داۋىس» اتاۋىمەن قويىلىپ, كوپشىلىكتىڭ ىستىق ىقىلاسىنا بو­لەنگەن بولاتىن. اۋدارماسىن قازاق ونەرىنىڭ كورنەكتى وكىلى تۇڭعىشباي جامانقۇلوۆ جاساپ, رەجيسسەر بارزۋ ابدۋرازاكوۆ ساحنالادى. ال بۇل جولى شىعارما مونووپەرا جانرىندا جاڭا قىرىنان ۇسىنىلىپ, ءسوز بەن اۋەن تۇتاس پسيحولوگيالىق قويىلىمعا اينالدى. سپەكتاكل رەجيسسەرى فارحات مولداعاليدىڭ كوركەمدىك شەشىمىندە ارتىق پافوس جوق, مينيماليستىك كەڭىستىك پەن جارىقتىڭ ءدال قويىلىمى ارقىلى كەيىپكەردىڭ ىشكى الەمى الدىڭعى قاتارعا شىققان.

ساحناداعى درامالىق وبرازدى قازاقستاننىڭ ەڭبەك سىڭىرگەن قايراتكەرى ءداريا ءجۇسىپ سومدادى. ءبىر ساعاتقا جۋىق ساحنادا جالعىز قالىپ, كەيىپكەردىڭ جان الەمىن تەك داۋىس پەن ىشكى كۇي ارقىلى جەتكىزۋ – ۇلكەن شەبەرلىك پەن رۋحاني تەرەڭدىكتى تالاپ ەتەدى. ءانشىنىڭ ورىنداۋىن­دا نازىك سىبىر دا, ۇمىتكە تولى جالىن دا, شاراسىزدىققا ۇلاسقان ۇنسىزدىك تە تابيعي ۇيلەسىم تاپتى. كۇردەلى ۆوكالدىق پارتيانى دايىنداۋعا بەلگىلى ۇستاز, ءانشى گالينا قارامولداەۆا اتسالىستى. ال وپەرانى ديريجەر قانات وماروۆ باسقارعان ت.ابدىراشەۆ اتىنداعى مەملەكەتتىك اكادەميالىق سيمفونيالىق وركەسترى سۇيەمەلدەدى.