قىسقى وليمپيادا مارەگە جەتتى

بيىلعى دوداعا الەمنىڭ 94 ەلى­نەن 2917 سپورتشى قاتىستى. ەلىمىزدىڭ ۇلتتىق قۇراماسى ساپىندا 36 سپورتشى (18 ەر, 18 ايەل) مانەر­لەپ سىرعاناۋ, كونكيمەن جۇگىرۋ, شورت-ترەك, فريستايل-اكروباتيكا, فريس­تايل-موگۋل, شاڭعىمەن تۇعىردان سەكىرۋ, تاۋ شاڭعىسى, شاڭعى جارىسى, بياتلون مەن شاڭعى قوسسايىسى سىندى سپورت تۇرلەرىنەن باق سىنادى. وتانداستارىمىز 49 مەدال جيىنتىعى ساراپقا سالىنعان باسەكەلەردە جارىس جولىنا شىعىپ, جوعارى ناتيجە كورسەتۋگە تىرىستى. بيىلعى وليمپيادادا قۇرامانىڭ گەوگرافياسى كەڭەيىپ, كەيىنگى ءتورت وليمپيادالىق تسيكل ىشىندەگى ەڭ جوعارى كورسەتكىشكە جەتتى. كوماندا قۇرا­مىنا الىنعان سپورتشىلار ساپىندا ەلىمىزدىڭ 11 ءوڭىرىنىڭ وكىلى بولدى. اتاپ ايتقاندا, الماتى, استانا, شىمكەنت قالالارى, سونداي-اق اقمولا, شىعىس قازاقستان, الماتى, پاۆلودار, قوستاناي, سولتۇستىك قازاقستان, قاراعاندى, اباي وبلىستارىنىڭ سپورتشىلارى دوداعا قوسىلدى. بۇعان دەيىنگى قىسقى وليمپيادا سايىستارىندا 10 ءوڭىردىڭ عانا سپورتشىسى اق الاماندا باق سىناۋ مۇمكىندىگىن يەلەنگەن ەدى.

يتاليا تورىندە ءانۇرانىمىزدى شىرقاتىپ, كوك تۋىمىزدى جەلبىرەتكەن مانەرلەپ سىرعاناۋشى ميحايل شايدو­روۆتىڭ التىن مەدالى – وراسان ولجا. ازات ەلدىڭ دەربەس دەلەگاتسياسى رەتىندە قىسقى وليمپياداعا 1994 جىلدان بەرى قاتىسىپ كەلە جاتقان سپورتشىلارىمىز مانەرلەپ سىرعاناۋدان اق الاماننىڭ التىنىن ولجا­لاي العان ەمەس. بۇعان دەيىن 2014 جىلى سوچيدە (رەسەي) وتكەن وليمپيادادا مانەرلەپ سىرعاناۋشى دەنيس تەن قولا مەدال ەنشىلەگەن ەدى. ودان كەيىن مانەرلەپ سىرعاناۋشىلار جۇلدەگە جاقىنداي العان ەمەس. ءتىپتى 2022 جىلى قىتايدا وتكەن وليمپيا ويىندارىنا بۇل سايىس تۇرىنەن قاتىسپادى دا.

1994 جىلى ليللەحاممەر (نورۆەگيا) وليمپياداسىندا ۆلاديمير سميرنوۆ شاڭعى سايىسىندا توپ جارىپ, التىن مەدال ەنشىلەگەننەن كەيىن وليمپ شىڭى اسۋ بەرمەستەي كورىنىپ ەدى. 32 جىلدان كەيىن ەلىمىزدىڭ ابىرويىن اسقاقتاتقان ميحايل شايدوروۆتىڭ ەرلىگى ماقتاۋعا دا, ماقتانۋعا دا تۇرارلىق. جالعىز التىن مەدالدىڭ ارقاسىندا ۇلتتىق قۇراما جالپى ەسەپتە 19-ساتىعا تۇراقتادى.

وليمپيادادا وزگە سپورتشىلارىمىز جۇلدەگە ىلىكپەگەنىمەن, بىرقاتارى جاقسى كورسەتكىشتەرىمەن قۋانتتى. ماسەلەن, جاقىندا عانا 19 جاسقا تولعان, قىسقى وليمپيا ويىندارىنا تۇڭعىش رەت قاتىسىپ وتىرعان مانەرلەپ سىرعاناۋشى سوفيا سامودەلكينا 10-ورىنعا تۇراق­تادى. بۇل كورسەتكىش ەل سپورتىنىڭ تاريحىنا ايەلدەر اراسىندا مانەرلەپ سىر­عاناۋدان وليمپياداداعى ەڭ جوعارى ناتيجە بولىپ قاتتالدى. كونكيمەن جۇگىرۋدەن نادەجدا موروزوۆا 3000 مەتر قاشىقتىقتا 6-ورىن, 5000 مەتردە 10-ورىن السا, ەليزاۆەتا گولۋبەۆا 1500 مەتر قاشىقتىققا جۇيتكۋدە 7-ورىن الىپ, 3000 مەتردە ۇزدىك وندىققا ەندى. سونىمەن قاتار ايەلدەر قۇراماسى كوماندالىق جارىستا ۇزدىك سەگىزدىككە ءىلىندى. 1998 جىلعى ناگانو (جاپونيا) وليمپياداسىنداعى ليۋد­ميلا پروكاشەۆانىڭ قولا مەدالىنەن كەيىن كونكيشىلەرىمىز وندىققا ەنە العان ەمەس.

شاڭعىمەن تۇعىردان سەكىرۋدەن 19 جاستاعى يليا ميزەرنىح ۇلكەن ترامپليندە 8-ورىن الىپ, وسى سپورت تۇرىنەن ەل سپورتىنداعى ەڭ ۇزدىك ناتيجەنى تىركەدى. شورت-ترەكتەن دەنيس نيكيشا 500 مەتر قاشىقتىقتا 7-ورىن يەلەندى. فريستايل-موگۋلدان اناستاسيا گورودكو 8-ورىن, پاۆەل كولماكوۆ 9-ورىن الىپ, 2022 جىلعى ويىندارداعى كورسەتكىشتەرىن ەداۋىر جاقسارتتى. سونداي-اق كونكيمەن جۇگىرۋ سايىسىندا ەۆگەني كوشكين 500 مەتر قاشىقتىقتا 9-ورىن, فريستايل-اكروباتيكادان (ميكست) اسىلحان اسان, رومان يۆانوۆ, ايانا جولداس ۇشتىگى كوماندالىق باسەكەدە 7-ورىن الدى.

سپورتشىلارىمىزدىڭ XXV قىسقى وليمپياداداعى ونەرى وڭ باعالانىپ, حالىقارالىق ارەناداعى باسەكەگە قابىلەتتى تالانتتى سپورتشىلاردىڭ جاڭا بۋىنى قالىپتاسىپ كەلە جاتقانىن كورسەتتى.

كەلەسى, 2030 جىلعى قىسقى وليمپيادا فرانتسيا ەلىندە وتەدى.