پرەزيدەنت تج رەجيمىن قامتاماسىز ەتۋ جونىندەگى مەمكوميسسيانىڭ وتىرىسىندا تۇرعىن ءۇي ماسەلەسىن شەشۋ ءۇشىن جاڭا «5-10-20» يپوتەكالىق نەسيە بەرۋ باعدارلاماسىن ىسكە اسىرۋدى تاپسىردى.
«ەلباسى ۇسىنعان «7-20-25» باستاماسى يپوتەكالىق نەسيەلەندىرۋگە جانە تۇرعىن ءۇي قۇرىلىسىنا ۇلكەن سەرپىن بەردى. تۇرعىن ءۇي ماسەلەسىن شەشۋ ءۇشىن جاڭا «5-10-20» يپوتەكالىق نەسيە بەرۋ باعدارلاماسىن ىسكە اسىرۋدى تاپسىرامىن. بۇل ماقساتقا داعدارىسقا قارسى قاراجاتتان 390 ملرد تەڭگە بولەمىز. بيىل ەلىمىزدە 15 ملن شارشى مەتر نەمەسە 150 مىڭ پاتەر قۇرىلىسىنىڭ رەكوردتىق كولەمى جوسپارلانعان»,- دەدى مەملەكەت باسشىسى.
پرەزيدەنت ودان بولەك «قازاقستاننىڭ تۇرعىن ءۇي قۇرىلىس جيناق بانكى» نەگىزىندە «وتباسى بانكىن» قۇرۋدى تاپسىردى.
«ازاماتتارىمىزدىڭ تۇرعىن ءۇي جاعدايىن جاقسارتۋ جونىندەگى جۇمىستى جالعاستىرۋ ماڭىزدى. شىن مانىندە, بۇل – ۇكىمەت جۇمىسىنىڭ ستراتەگيالىق باعىتتارىنىڭ ءبىرى. ۇكىمەت جىل سوڭىنا دەيىن «قازاقستاننىڭ تۇرعىن ءۇي قۇرىلىس جيناق بانكى» نەگىزىندە تولىققاندى دامۋ جانە قولداۋ ينستيتۋتى «وتباسى بانكىن» قۇرۋى كەرەك, ول تۇرعىن ءۇيدى ەسەپكە الۋدى, قويۋدى جانە ءبولۋدى ورتالىقتاندىرىپ جۇزەگە اسىرادى» دەپ اتاپ ءوتتى ق.توقاەۆ.
مەملەكەت باسشىسى ۇكىمەتكە ازاماتتاردىڭ وزدەرىنىڭ زەينەتاقى جيناقتارىنىڭ ءبىر بولىگىن تۇرعىن ءۇي جاعدايىن جاقسارتۋ ماقساتىندا پايدالانۋى ماسەلەسى بويىنشا 1 شىلدەگە دەيىن ءبىر شەشىمگە كەلۋدى تاپسىردى.