ەلىمىزدەگى جانارماي قورىنىڭ جاقىن كۇندەردە تاۋسىلىپ قالاتىن ءتۇرى بار. وسىنىڭ سالدارىنان تاياۋ كۇندەرى رەسپۋبليكادا اي-92 ماركالى بەنزين مەن ديزەل وتىنىنىڭ باعاسى كۇرت شارىقتاپ كەتۋى ابدەن ىقتيمال. بۇل تۋرالى «استانا» تەلەارناسى حابارلادى.
ءتىلشىنىڭ ايتۋىنشا, ءتىپتى جانارمايدىڭ مۇلدەم جوعالىپ كەتۋى دە عاجاپ ەمەس. وسى رەتتە جانارماي قاۋىمداستىعى وكىلدەرى: «بولشەك ساۋدا يەلەرى سوڭعى ءتورت ايدا قاجەتتى دەڭگەيدەگى مۇناي ونىمدەرىنە قول جەتكىزە الماي وتىر»,- دەپ قىنجىلادى. ولار بۇل ماسەلەنىڭ وزدەرى تاراپىنان بىرنەشە رەت كوتەرىلگەنىن دە اۋىزعا الىپ وتىر.
راسىندا دا كورشىلەس ەلدەن جەتكىزىلۋى ءتيىس 234 مىڭ توننا سۇيىق وتىننىڭ ءوزى جانارماي تاپشىلىعىن شەشە المايدى. ايتا كەتەيىك, بۇعان دەيىن مۇناي جانە گاز مينيسترلىگىنىڭ بۇيرىعىمەن وتاندىق ءۇش كومپانيا عانا رەسەيدەن مۇناي ونىمدەرىن جەتكىزۋشى وپەراتور بولىپ بەلگىلەنگەن بولاتىن.
«ەگەر سۇيىق وتىن بولماسا, جانارماي بەكەتتەرى ونى تالون نەمەسە كارتوچكامەن ساۋدالايدى. «قازمۇنايگازدىڭ» جانارماي بەكەتىندە كەپتەلىس تۋىندايدى. از ۋاقىتتا ولارداعى جانارماي دا تاۋسىلادى. ءبىز مۇنىڭ الدىن العىمىز كەلەدى», - دەيدى «قازاقستاننىڭ جانارماي قاۋىمداستىعى» باسقارما توراعاسى بولات اۋەتاەۆ.
تاسىمالداۋشى وپەراتورلار پاۆلودار مۇناي وڭدەۋ زاۋىتىنىڭ جەتكىلىكتى دەڭگەيدە سۇيىق وتىنمەن قامتاماسىز ەتىلمەي وتىرعانىن العا تارتادى. ولار جانار-جاعارمايدى رەسەيگە قاراستى پەتروپاۆلوۆسك ستانساسىنان اۆتوكولىكپەن جەتكىزىپ وتىرعان كورىنەدى. بۇل ءوز كەزەگەندە ونسىز دا قىمبات بولىپ تابىلاتىن جانار-جاعارماي باعاسىنىڭ شارىقتاۋىنا اكەپ سوقتىرۋدا. مۇناي ءونىمىنىڭ از كولەمدە تاسىمالدانۋى سالدارىنان, قازىردىڭ وزىندە قاۋىمداستىق مۇشەلەرىنىڭ كوپشىلىگىندە ديزەلدى وتىننىڭ از قورى قالىپتى.
«ءبىراز كۇندە ونىڭ ءوزى تاۋسىلادى», - دەپ الاڭدايدى ماماندار. ال شىمكەنتتەگى مۇناي وڭدەۋ زاۋىتى قايتا جوندەۋدەن وتكىزىلەتىندىكتەن, جاعدايدىڭ ۋشىعىپ كەتۋى دە عاجاپ ەمەس.
قۇرىش نۇرىمبەت.