ءتۋنيستىڭ بيلىگى ءوز ەلدەرىنەن سيرياعا بارىپ, كوتەرىلىسشىلەردىڭ جىنىستىق قاتىناس جونىندەگى قاجەتتىلىگىن وتەيتىن «دجيحاد-ال-نيكاح» («نەكە دجيحادى») اكتسياسىنا قاتىسۋعا تىلەك ءبىلدىرۋشى قىزداردىڭ كوبەيىپ بارا جاتقانىنا الاڭداپ وتىر. بۇل تۋرالى AFP حابارلادى.
ەلدىڭ ىشكى ىستەر ءمينيسترى لوتفي بەن دجەددۋ پارلامەنتتەگى تىڭداۋ كەزىندە تۋنيس ايەلدەرىنىڭ سيرياعا اتتانىپ, وندا «20, 30, 100 سودىردىڭ جىنىستىق قاتىناس جونىندەگى تىلەگىن قاناعاتتاندىرىپ قايتاتىندارىن» ايتىپ شاعىندى. ونىڭ سوزىنە قاراعاندا, قازىر سيريادا بولعان كوپتەگەن ايەلدەر ەلگە جۇكتى بولىپ ورالىپ جاتىر ەكەن.
ىشكى ىستەر ۆەدومستۆوسىنىڭ باسشىسى, بىراق, ناقتىلى قانشا ايەلدىڭ ەلگە ەكىقابات بولىپ ورالعانىن ايتىپ بەرە المادى. ال بيىلعى جىلعى ناۋرىز ايىنان بەرى تۋنيس بيلىگى 6000 جاس قىزدىڭ سيرياعا بارۋ جونىندەگى سۇرانىستارىنا رۇقسات بەرمەي قويىپتى.
بۇدان بۇرىن يسلام ۇيىمدارىنىڭ تەك سرياعا عانا ەمەس, سونداي-اق مىسىرعا دا «دجيحاد ال-نيكاح» اكتسياسىنا, ياعني ۋاقىتشا نەكەگە تۇرۋعا اتتاندىرىپ كەلگەنىن حابارلاعان بولاتىن. بۇعان مالدانىپ قالاتىن قىزدار وزدەرىنىڭ وسى ارقىلى «قاسيەتتى سوعىسقا» ءوز ۇلەستەرىن قوسا الاتىندارىنا قاتتى يلاناتىن كورىنەدى.
سۇلتان بوزايعىر.