بۇگىن, 21 قىركۇيەك كۇنى تاڭەرتەڭ شىعىس قازاقستان وبلىسىنداعى سەمەي قالاسىندا قازاق فۋتبولىنىڭ 100 جىلدىعىن تويلاۋعا ارنالعان ءىس-شارالار باستالىپ كەتتى. بۇل تۋرالى شىعىس قازاقستان وبلىسىنىڭ اقپارات ورتالىعى حابارلايدى.
كەشە تاڭەرتەڭ ارنايى رەيسپەن الماتىدان سەمەيگە قۇرمەتتى قوناقتار, تويعا قاتىسۋشىلار – «دينامو» (تبيليسي, گرۋزيا) جانە «العا» (بىشكەك, قىرعىزستان) كوماندالارىنىڭ ارداگەرلەرى ۇشىپ كەلدى. ۇشاق جەرگە قونعان بويدا بەرگەن بريفينگتەرىندە اتاقتى فۋتبولشىلار جۋرناليستەردىڭ كوپتەگەن سۇراقتارىنا جاۋاپ بەردى.
«ءبىز فۋتبولدىڭ اۋەسقويلارى ءۇشىن ۇلكەن اۋقىمداعى توي بولىپ تابىلاتىن وسىنداي شاراعا قاتىساتىنىمىز ءۇشىن وتە ريزامىز. قازاقستان فۋتبولىنىڭ 100 جىلدىعى شىن مانىندە دە ۇلكەن مەرەكە. وسى جەردە بۇرىنعى كەڭەس كەزەڭىندەگى ارىپتەس-وتانداستارىمىزدى كورەتىنىمىز دە قاتتى قۋاندىرادى. ولارمەن بىرگە تاعى دا فۋتبول الاڭىنا شىعىپ, ونەرىمىزدى كورسەتۋ بىزدەر ءۇشىن عانيبەت», - دەدى «العانىڭ» بۇرىنعى داڭقتى قورعاۋشىسى يۋسۋپ مۋساەۆ. بۇل - كادىمگى «ادامزاتتىڭ ايتماتوۆى» اتانعان اتانعان اتاقتى قىرعىز جازۋشىسى شىڭعىس ايتماتوۆتىڭ ءبىر ماقالاسىندا ايتىلىپ وتەتىن بۇرىنعى فرۋنزەلىك بەلگىلى فۋتبولشى.
بۇگىن اۋلا كوماندالارى اراسىنداعى «بىلعارى دوپ» ءتۋرنيرىنىڭ فينالدىق ويىنى وينالادى. ال قالانىڭ بارلىق فۋتبول الاڭدارىندا «فۋتبول مەرەكەسى» اتتى تۋرنيرد ءوتىپ جاتىر. ولارداعى قاتىسۋشىلاردى مۇمكىندىكتەرى شەكتەۋلى بالالار قۇرايدى. بۇگىن بۇل مەرەكەلىك ءىس-شارالار م.اۋەزوۆ اتىنداعى الاڭدا تياناقتالادى. وقىرمان قاۋىم الەمگە ايگىلى جازۋشىمىزدىڭ كەزىندە سەمەيدىڭ جاستارىنان قۇرالعان «يارىش» كومانداسىنىڭ ساپىندا ويناعانىن جاقسى بىلەتىن شىعار دەگەن ويدامىز.
جالپى, قازاقستان فۋتبولىنىڭ 100 جىلدىعىنا ارنالعان مەرەكە ەكى كۇنگە سوزىلادى. ونىڭ بۇگىن باستالعان وركەنى ەرتەڭ دە جەلكەنىن كەرەدى. وسى كۇندەرى ارداگەر فۋتبولشىلاردىڭ بليتس-ءتۋرنيرى بولىپ وتەدى. وعان «سپارتاك» (سەمەي), «الگا» (بىشكەك, قىرعىزستان), «سپارتاك» (ماسكەۋ, رەسەي), «ۆوستوك» (وسكەمەن, قازاقستان), «قايرات» (الماتى, قازاقستان), «دينامو» (كيەۆ, ۋكراينا), «دينامو» (تبيليسي, گرۋزيا), «رۋبين» (قازان, رەسەي) جانە «سپارتاك» (سەمەي, قازاقستان) كوماندالارىنىڭ ارداگەرلەرى قاتىسۋدا.
فۋتبول جۇلدىزدارى جۋرناليستەرمەن ءباسپاسوز ءماسليحاتىن وتكىزەدى. وسى كەزدە قالانىڭ ءبىر كوشەسىنە «قازاقستان فۋتبولىنا 100 جىل» دەگەن ات بەرىلەدى. مۇندا رەسپۋبليكالىق ۆەلوشەرۋگە قاتىسۋشىلار كەلىپ ات باسىن تىرەيدى. بۇگىن سونداي-اق شاكارىم اتىنداعى مەملەكەتتىك ۋنيۆەرسيتەتتىڭ باس كورپۋسىندا مەرەكەگە ارنالعان حالىقارالىق عىلىمي-پراكتيكالىق كونفەرەنتسيا وتەدى. ال كەشكى 18 ساعات 30 مينۋتتا «سپارتاك» ستاديونىندافۋتبول جۇلدىزدارى شەرۋىمەن مەرەكەنىڭ سالتاناتتى اشىلۋى بولادى. ول تەاترلاندىرىلعان كورىنىسكە جالعاسادى. سوڭىندا «دينامو» (كيەۆ) – «دينامو» (تبيليسي) كوماندالارى اراسىنداعى كەزدەسۋ قانات جايادى.
ەرتەڭ, جەكسەنبى كۇنى سپورت جارىستارى ودان ءارى جالعاسىن تابادى. بۇل كۇنى «ميلليوندار كۋبوگى» اتتى رەسپۋبليكالىق فۋتبول ءتۋرنيرىنىڭ, ارداگەردەردىڭ بليتس-ءتۋرنيرىنىڭ فينالدىق ويىندارى وينالادى. ال دەنساۋلىق كەشەنىندە قازاق كۇرەسىنەن داۋلەت تۇرلىحانوۆ اتىنداعى حالىقارالىق تۋرنير وتكىزىلەدى.
دامير قوجامقۇل.