ورتالىق كوممۋنيكاتسيالار قىزمەتىندە وتكەن بريفينگتە ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆ «ارداگەرلەر تۋرالى» جاڭا زاڭىندا ايقىندالعان ارداگەرلەردىڭ ساناتتارى مەن ولاردى الەۋمەتتىك قولداۋ شارالارى تۋرالى ايتتى.
ەرلان اۋكەنوۆ ارداگەرلەردىڭ الەۋمەتتىك قورعالاتىن 5 ساناتى جانە ولار ءۇشىن ارنايى مەملەكەتتىك جاردەماقى مولشەرى انىقتالعانىن ايتتى.
- ۇلى وتان سوعىسىنىڭ ارداگەرلەرى ءۇشىن - 16 اەك (44 448 تەڭگە, 1025 ادام);
- باسقا مەملەكەتتەر اۋماعىنداعى اسكەري ءىس-قيمىلعا قاتىسۋشى ارداگەرلەر ءۇشىن - 6,19 اەك (17 196 تەڭگە, 21 729 ادام) جانە 4,8 اەك (13 335 تەڭگە, 10 248 ادام);
- ۇلى وتان سوعىسىنىڭ ارداگەرلەرىنە جەڭىلدىكتەر مەن كەپىلدىكتەر بويىنشا تەڭەستىرىلگەن ارداگەرلەر - 7,55 (20 974 تەڭگە, 16 175 ادام) جانە 6,19 اەك (17 196 تەڭگە, 21 729 ادام);
- ەڭبەك ارداگەرلەرى - 138,63 (385 115 تەڭگە) جانە 2,13 اەك (5 918 تەڭگە, 107 701 ادام);
- ءتيىستى زاڭمەن قامتىلعان ادامداردىڭ باسقا ساناتتارى - 4,8 (13 335 تەڭگە, 4 299 ادام), 4,48 (12 357 تەڭگە, 15 ادام) جانە 4,59 اەك (12 752 تەڭگە, 13 454 ادام).
«زاڭدا ۇلى وتان سوعىسىنىڭ ارداگەرلەرىنە جەڭىلدىكتەر مەن كەپىلدىكتەر بويىنشا تەڭەستىرىلگەن تۇلعالار قاتارىنان باسقا مەملەكەتتەردىڭ اۋماعىنداعى اسكەري ءىس-قيمىلداردىڭ ارداگەرلەرى اتاپ كورسەتىلگەن. وسىلايشا اۋعانستان, ۆەتنام, الجير, ەگيپەت جانە باسقا مەملەكەتتەردەگى اسكەري قيمىلدارعا قاتىسقان اسكەري قىزمەتشىلەر اسكەري ءىس-قيمىل ارداگەرلەرى ساناتىنا ەنەدى. سونىمەن بىرگە بارلىق قولدانىستاعى جەڭىلدىكتەر مەن جاردەماقىلار ساقتالىپ قالادى», - دەدى ەرلان اۋكەنوۆ.
وسى ساناتتاعى ارداگەرلەردىڭ قاتارى تمد ەلدەرىنىڭ 1994 جىلى قازاقستان راتيفيكاتسيالاعان ارداگەرلەرگە بەرىلەتىن جەڭىلدىكتەر مەن كەپىلدىكتەردى ءوزارا تانۋ تۋرالى كەلىسىمىندە بەكىتىلگەن. بۇل ساناتقا كەڭەس وداعى قارۋلى كۇشتەرىنىڭ قاتارىندا ءار جىلدارى 23 قاقتىعىسقا قاتىسقان اسكەري قىزمەتشىلەر كىرەدى.