ءبىلىم باسقارماسى: ۇبت فورماتى وزگەرمەيدى

ۇلتتىق بىرىڭعاي تەستىلەۋ (ۇبت) بۇرىنعى فورماتتا قالادى. مەكتەپ بىتىرۋشىلەردىڭ ۇبت-عا قاتىسۋعا ونلاين-وتىنىمدەرى 1 ساۋىردەن 10 مامىرعا دەيىن قابىلدانادى, دەپ حابارلادى بۇگىن بريفينگتە قالالىق ءبىلىم باسقارماسىنىڭ باستىعى شولپان قادىروۆا. «بيىل تۇلەكتەر ۇبت-نى 11-سىنىپ باعدارلاماسىنىڭ ءتورتىنشى توقسانىنداعى سۇراقتارسىز, ياعني 5-سىنىپتان 11-ءشى سىنىپتىڭ ءۇش توقسانىنا دەيىنگى سۇراقتار بويىنشا تاپسىرادى», – دەدى ش.قادىروۆا. ونىڭ ايتۋىنشا, قاشىقتان وقىتۋدى ءساتتى وتكىزۋ ماقساتىندا ستۋدەنتتەر مەن وقىتۋشىلار ءۇشىن كومپيۋتەرلەر مەن ينتەرنەتكە قول جەتىمدىلىك مونيتورينگى جۇرگىزىلگەن.

«ماسەلە مەكتەپ بالانسىندا تۇرعان 7118 كومپيۋتەردى (6500 وقۋشى, 618 مۇعالىم) ۋاقىتشا پايدالانۋعا بەرۋ ارقىلى شەشىلدى. سونىمەن قاتار 2613 نوۋتبۋك جانە ينتەرنەتكە قوسىلعان 5200 فلەش-كارتا ساتىپ الىندى. جالپى, كومپيۋتەرلىك تەحنيكانىڭ قول جەتىمدىلىگى 100%», – دەدى ش.قادىروۆا.

سونىمەن بىرگە, ءبىلىم جانە عىلىم ءمينيسترىنىڭ بۇيرىعىنا سايكەس, بيىل 9 جانە 11 سىنىپتار ءۇشىن قورىتىندى اتتەستاتتاۋ بولمايدى. ال قورىتىندى باعالار جىلدىق ناتيجە بويىنشا قويىلادى.

«اپتاسىنا ەكى نەمەسە ودان دا كوپ ساعاتتان تۇراتىن پاندەر بويىنشا (بجب) جيىنتىق باعالاۋدىڭ ۋاقىتى – 4-11 مامىر, اپتاسىنا ءبىر ساعاتتان جۇكتەلەتىن اكادەميالىق پاندەر بويىنشا ساباق كەستەسى – 11-15 مامىر. توقسان سايىنعى جيىنتىق باعالاۋ (تجب) ءبىر رەت – 18-22 مامىردا وتكىزىلەدى. بجب ۋاقىتى – 20 مينۋت, تجب ۋاقىتى – 40 مينۋت. 1-4 سىنىپ وقۋشىلارى ءۇشىن بجب جانە تجب وتكىزۋ ۋاقىتى شەكتەلمەيدى», – دەپ اتاپ ءوتتى ش.قادىروۆا.

بجب جانە تجب مولشەرى ءبىر كۇندەگى ءۇش جيىنتىق جۇمىس كولەمىنەن اسپايدى. سونىمەن قاتار ونەر, ءوزىن-ءوزى تانۋ, مۋزىكا, دەنە تاربيەسى, بيزنەس جانە كاسىپكەرلىك نەگىزدەرى, گرافيكا جانە ديزاين, الەۋمەتتىك زەرتتەۋلەر, ءدىنتانۋ سياقتى پاندەردە بجب جانە تجب بولمايدى. مۇعالىم ءبىلىم بەرۋ پلاتفورمالارىنا (كۇندەلىك.kz, BilimLand جانە ت.ب.) جيىنتىق جۇمىستىڭ وقۋ تاپسىرمالارىن جۇكتەپ, وقۋشىلارعا جيىنتىق جۇمىستى اياقتاۋعا ءارتۇرلى بايلانىس قۇرالدارىن ۇسىنا وتىرىپ بجب جانە تجب جۇرگىزە الادى. وقۋشىلارعا, اتا-انالارعا نەمەسە بالانىڭ زاڭدى وكىلدەرىنە كۇندەلىك.kz پلاتفورماسىندا كەز-كەلگەن قول جەتىمدى بايلانىس قۇرالدارى (ەلەكتروندى پوشتا, چات, Telegram جانە ت.ب.) ارقىلى تۇسىنىكتەمە نەمەسە ايدار تۇرىندە كەرى بايلانىس ۇسىنىلادى.