وندىرىستىك جاراقاتقا جول بەرمەۋ قاجەت

جىل سايىن 28 ساۋىردە دۇنيە­جۇزىلىك ەڭبەكتى قورعاۋ كۇنى اتاپ وتىلەدى. بيىل بۇل كۇن­نىڭ تاقىرىبى «پاندەميانى توق­تاتۋ: جۇمىستاعى قاۋىپسىزدىك پەن دەنساۋلىق ادام ءومىرىن ساقتاپ قالادى» دەپ جاريالاندى. 28 ساۋىردە الەمدىك جۇرتشىلىقپەن ىنتىماقتاسا وتىرىپ وندىرىستە زارداپ شەككەن قىزمەتكەرلەرگە قۇرمەت كورسەتەمىز, ەڭبەك قاۋىپ­سىزدىگى جانە ەڭبەكتى قورعاۋ جو­نىندەگى شارالاردى ساقتاۋعا شاقى­رامىز, ەڭبەك مادەنيەتىن ناسي­حاتتايمىز, دەيدى ۆەدومستۆو باسشىسى.

حالىقارالىق ەڭبەك ۇيى­مى­نىڭ دەرەكتەرى ەڭبەكتى قورعاۋ سالاسىندا اۋقىمدى تۇيتكىل بار ەكەنىن كورسەتەدى. الەمدە جىل سايىن 2 ملن-نان استام ادام قازا تاباتىن 270 ملن جازاتايىم وقيعا جانە 160 ملن كاسىبي اۋرۋلار تىركەلەدى. وكىنىشكە قاراي مۇنداي جاعدايلار ءبىزدىڭ ەلدە دە ورىن الىپ جاتادى. رەسپۋبليكا كاسىپورىندارىندا جىل سايىن 1300-دەن استام قىزمەتكەر جاراقات الادى. 2020 جىلعى ءبىرىنشى توقساننىڭ قورىتىندىسى بويىنشا زارداپ شەككەندەردىڭ سانى 341 ادامدى قۇرادى. زياندى جانە قاۋىپتى ەڭبەك جاعدايلارىندا 2019 جىلى 370 مىڭنان استام قىزمەتكەر جۇمىس ىستەدى: شۋ مەن ءدىرىلدىڭ جوعارى دەڭگەيى جاعدايىندا ءاربىر ەكىنشى (45,9%), جۇمىس ايماعىنىڭ جوعارى گازدانۋى مەن شاڭدانۋى جاعدايىندا ءاربىر ءۇشىنشى (32,6%) جۇمىسكەر ەڭبەك ەتتى. 94 مىڭ ادام نەمەسە ساۋالداماعا قاتىسقان كاسىپ­ورىن­دار قىزمەتكەرلەرىنىڭ سانى­نان 5,6%-ى اۋىر دەنە ەڭبەگى­مەن اينالىسقان. بىلتىر 676 مىڭ قىزمەتكەر زياندى ەڭبەك جاعدايلارىنداعى جۇمىس ءۇشىن 128 ملرد تەڭگە كولەمىندە ءتۇرلى وتەماقى الدى.

«قازاقستاندا 2020-2021 جىل­دارعا ارنالعان جۇمىسپەن قامتۋ­دىڭ جول كارتاسىن ىسكە اسىرۋ باستالدى, ونىڭ اياسىندا 255 مىڭ ادامدى جۇمىسپەن قامتۋ جوسپارلانعان. ءبىز جۇمىس بەرۋ­شىلەردى جۇمىسشىلارعا قاۋىپسىز ەڭبەك جاعدايلارىن جاساۋعا شاقىرامىز» دەدى مينيستر.

جاراقاتتانۋدى جانە ەڭ­بەك جاعدايلارى زياندى جۇمىس ورىن­دارىنىڭ سانىن ازايتۋ ماق­ساتىندا ۇكىمەت قاۋلىسىمەن 2019 جىلى وندىرىستىك جاراقاتتانۋدى جانە ەڭبەك جاعدايلارى زياندى جۇمىس ورىندارىن ازايتۋ جونىندەگى 2019-2023 جىلدارعا ارنالعان جول كارتاسى بەكىتىلدى. ۇيىمداردا ەڭبەكتى قورعاۋدى باسقارۋ جۇيەسىن ەنگىزۋ تەتىگىن كوزدەيتىن ەڭبەك ماسەلەلەرى جونىندەگى زاڭ جوباسى پارلامەنت سەناتىنىڭ قاراۋىندا. زاڭ جوباسى قابىلدانعاننان كەيىن ەڭبەكتى قورعاۋدى باسقارۋ جۇيەسى جۇمىسشىلاردىڭ قاۋىپسىزدىگى مەن دەنساۋلىعىنىڭ ساقتالۋىنا جۇمىستاعى قاۋىپتى فاكتورلاردىڭ اسەرىن انىقتاۋ ءۇشىن ودان تۋىندايتىن تاۋەكەلدەردى تالداۋعا نەگىزدەلەتىن بولادى.

«جۇمىس بەرۋشىلەردى, كاسىپ­وداقتاردى, ەڭبەك ۇجىمدارىن «قاۋىپسىز ەڭبەك» ۇرانىمەن ءىس-شارالار وتكىزۋگە, سونداي-اق «Vision Zero» نولدىك جاراقاتتانۋ تۇجىرىمداماسىنا قوسىلۋعا شاقىرامىز. وتكىزىلگەن ءىس-شارا­لاردىڭ نەگىزگى ماقساتى – وندىرىستىك جاراقاتتانۋدىڭ الدىن الۋ, قاۋىپسىز ەڭبەكتى ناسيحاتتاۋ جانە قىزمەتكەرلەردىڭ ەڭبەك پروتسەسىنىڭ قاۋىپسىزدىگىنە سانالى كوزقاراسىن ارتتىرۋ. بۇل ءۇشىن بىزگە بارلىق مۇمكىندىكتەردى پايدالانۋ قاجەت», دەلىنگەن ءبىرجان نۇرىمبەتوۆتىڭ مالىمدەمەسىندە.