پرەزيدەنت ق.توقاەۆتىڭ تاپسىرماسىنا سايكەس ۇلتتىق بانك «قازاگرو» ۇبح-نىڭ ەنشىلەس ۇيىمى «اگرارلىق نەسيەلەۋ كورپوراتسياسى» اق مەن ەكىنشى دەڭگەيلى بانكتەردى قورلاندىرۋ ءۇشىن «قاراپايىم زاتتار ەكونوميكاسى» باعدارلاماسىنىڭ اياسىندا ەگىستىك كومپانياسىن جۇرگىزۋگە قوسىمشا 100 ملرد تەڭگە ءبولدى.
كورپوراتسيا اتالعان باعدارلاما بويىنشا كوكتەمگى ەگىستىك جۇمىستارىن قارجىلاندىرادى. نەگىزگى ماقساتى – اينالىستاعى قاراجاتتى تولىقتىرۋ. بۇگىنگى تاڭدا سۋبسيديالاۋدى ەسەپكە الا وتىرىپ 6% جىلدىق مولشەرلەمەمەن 1,3 ملرد تەڭگە كولەمىندە نەسيە بەرىلدى.
«قاراپايىم زاتتار ەكونوميكاسى» باعدارلاماسىنداعى وزگەرىستەر ءتۇرلى اۋىلشارۋاشىلىق وسىمدىكتەردى ەگەتىن فەرمەرلەرگە قارجى الۋعا مۇمكىندىكتەردى ۇلعايتتى. ەندى شارۋالار ەگىس جۇمىستارىن جۇرگىزۋگە اينالىس قاراجاتىن 12 ايعا دەيىن تولىقتىرا الادى. بۇل رەتتە نەگىزگى بورىشتى قارىز مەرزىمىنىڭ سوڭىندا وتەۋگە بولاتىنىن ايتا كەتكەن ءجون.
قارجىلاندىرۋ جانە شەشىم قابىلداۋعا وتىنىمدەردى قاراستىرۋ مەرزىمى 30 كۇنتىزبەلىك كۇننەن 10 جۇمىس كۇنىنە دەيىن قىسقارتىلعان. سونداي-اق نەسيەلەۋ پروتسەسىن وڭتايلاندىرۋ جانە قارجىلاندىرۋ پروتسەسىن ىقشامداۋ شەڭبەرىندە قارىز الۋشىلار ۇسىناتىن قۇجاتتار تىزبەسى زاڭدى تۇلعالار ءۇشىن 27-دەن 13-كە, شارۋا قوجالىقتارى مەن جەكە كاسىپكەرلەرگە 16-دان 12 قۇجاتقا قىسقارتىلدى. وڭىردەگى فيليالدار دەربەس شەشىم قابىلداۋ ءۇشىن ليميتتەر 200 ملن تەڭگەگە دەيىن ۇلعايتىلدى جانە نەسيە كوميتەتتەرىنىڭ قاشىقتان وتىرىس جۇرگىزۋ, ەتسق ارقىلى قۇجاتتار مەن تولەم قۇجاتتارىنا قول قويۋ پراكتيكاسى دا ەنگىزىلدى.
شالعايداعى ەلدى مەكەندەردەگى شارۋالاردى جەڭىلدەتىلگەن نەسيەگە قولجەتىمدىلىگىن قامتاماسىز ەتۋ ماقساتىندا كوكتەمگى ناۋقاندىق جۇمىستى جۇرگىزۋگە «قاراپايىم زاتتار ەكونوميكاسى» اياسىندا سوڭعى قارىز الۋشىلاردى قارجىلاندىراتىن نەسيەلىك سەرىكتەستىكتەردى قورلاندىرۋ قۇرالى پايدالانىلادى. وسى ۋاقىتتا بۇل ۇيىمدار 144,1 ملن تەڭگەنى ۇلەستىردى.
قابىلدانعان شارالار كوكتەمگى ەگىستىك جۇمىستارمەن اينالىساتىن فەرمەرلەردى نەسيەلەۋ تالاپتارىن جاقسارتا وتىرىپ, ولاردى ەداۋىر قولداۋعا مۇمكىندىك بەرەدى.