ماقتاارال اۋدانىندا ەندى ورگەباس ەلدىمەكەنىن سۋ باستى. بۇل تۋرالى وبلىس اكىمدىگىنىڭ ءباسپاسوز قىزمەتى حابارلادى.
«بۇگىن تاڭعى 05.00-تەن باستاپ 250 ءۇيى سۋعا باتقان فەردوۋسي اۋىلى باعىتىنان جاڭاجول اۋىلدىق وكرۋگىنىڭ ورگەباس ەلدىمەكەنىنە قاراي سۋ كەلە باستادى. ەكى اۋىلدىڭ ارا قاشىقتىعى - 3 شاقىرىم. تاڭعى 8.00-دە سۋ ورگەباس ەلدى مەكەنىنىڭ 194 ءۇيىن باسىپ قالدى. اۋىلدىڭ 1451 تۇرعىنى ەۆاكۋاتسيالاندى. كوشىرۋ بارىسىندا زارداپ شەككەندەر جوق», دەلىنگەن حابارلامادا.