كەشە, ياعني 1-مامىر كۇنى وزبەكستان رەسپۋبليكاسىنداعى «سوردابا» سۋ قويماسى بۇزىلىپ, ماقتاارال اۋدانىنداعى «تسگك» كانالىنا 300 ميلليون تەكشە مەتر سۋ كەلىپ قۇيىلعاندىقتان اۋداندا جەرگىلىكتى دەڭگەيدەگى توتەنشە جاعداي قالىپتاسىپ وتىر.
وزبەكستان رەسپۋبليكاسىنىڭ سۋ شارۋاشىلىعى ءمينيسترى ش. حامراەۆتىڭ بەرگەن رەسمي مالىمەتىنە سايكەس, قازىرگى تاڭدا «سوردابا» قويماسىنان سۋ جىبەرۋ جۇمىستارى تولىق توقتاتىلعان. دەگەنمەن تۇنىمەن اققان سارقىراما سۋ «تسگك» كانالىنا جينالدى. اتالعان كانالدىڭ سۋ جىبەرۋ قۋاتتىلىعى سەكۋندىنا 120 تەكشە مەتر. بىراق كانالعا تۇنىمەن سەكۋندىنا 180 تەكشە مەتر سۋ اعىپ كەلگەن. وسىنى ەسكەرگەن وبلىستىق توتەنشە جاعداي جونىندەگى ءتيىستى قىزمەتتەر ماقتاارال اۋدانىنداعى 4 ەلدى مەكەننەن 5400 ادامدى ەۆاكۋاتسيالاۋعا ءماجبۇر بولدى. بىرقاتار تۇرعىندار ءوز كولىكتەرىمەن تۋعان - تۋىستارىنا بارۋدى قالاسا, قالعاندارى ەۆاكۋاتسيا بارىسىندا اتاكەنت كەنتىندەگى مەكتەپتەرگە جايعاستىرىلدى. وسى جاعدايعا قاتىستى مالىمدەمە جاساعان وبلىس اكىمى ومىرزاق شوكەەۆ ەۆاكۋاتسيالانعان تۇرعىندار بىلتىرعى ارىستىڭ تاجىريبەسىنە سايكەس ءتيىستى مەديتسينالىق قىزمەت, ازىق-ت ۇلىك سەكىلدى بارلىق زاتتارمەن قامتاماسىز ەتىلەتىنىن ايتتى.
«قازىر ەندى وزبەكستان ءمينيسترىنىڭ رەسمي مالىمدەمەسىنە سايكەس, سۋ باسقان ءوڭىردىڭ بارلىعىن قايتادان ارالاپ, كورىپ شىعامىز. سۋ باسۋ قاۋىپتەرى بولمايتىن جاعدايدا ونداعى بارلىق تۇرعىن ۇيلەر پوليتسيامەن قورعالاتىن بولادى. ازىرگە تۇرعىنداردىڭ مالدارى قاۋىپتى ايماقتان تۇگەل شىعارىلدى. ەشقانداي شىعىن جوق. ەندى تۇرعىنداردىڭ ۇيلەرى, م ۇلىكتەرىنىڭ ءبارى كۇزەتىلەتىن بولادى. ەگەر دە سۋدىڭ دەڭگەيى ءالى دە كوتەرىلەتىن بولسا, ماقتاارال اۋدانىنداعى تاعى دا قوسىمشا 4 ەلدى مەكەندى ەۆاكۋاتسيالايتىن بولامىز. ول نۇرلىجول, فيرداۋسي, جانتاقساي, جايلىباەۆ ەلدى مەكەندەرى. اتالعان ءار ەلدى مەكەندە توتەنشە جاعدايدى تۇراقتاندىرۋ ءۇشىن جاقىن اراداعى اۋدانداردىڭ كۇشتەرى جۇمىلدىرىلدى. ايتالىق, نۇرلىجول ەلدى مەكەنىنە شاردارا اۋدانىنىڭ اكىمدىگى, فەرداۋسي, جانتاقساي اۋىلدارىنا كەلەس اۋدانى, ت. جايلىباەۆ اۋىلىنا سارىاعاش اۋدانى جاۋاپتى بولىپ بەكىتىلدى. سوندىقتان مەنىڭ ايتاتىنىم, تۇرعىندارعا دۇرلىگىپ, كوشەگە شىعىپ, دۇربەلەڭ جاساپ, جولعا شىعۋدىڭ قاجەتى جوق. بارلىعى ۇيىمداسقان تۇردە رەتتەلىپ, ءوز قالپىنا كەلەدى.
بۇل جەرگىلىكتى ماسشتابتاعى توتەنشە جاعداي. سوندىقتان بۇل جەردە ارىستاعى تاجىريبەگە ساي الگوريتمدە جۇمىس ىستەيتىن بولامىز. ءبارى ۇيىمداسقان تۇردە رەتتەلەدى, قالپىنا كەلەدى. بۇل توتەنشە جاعدايدى يگەرۋگە وبلىستىڭ تولىق مۇمكىنشىلىگى بار», دەدى ومىرزاق شوكەەۆ.