نۇر-سۇلتاندا جول جۇمىستارى قارقىندى ءجۇرىپ جاتىر. بيىل جالپى ۇزىندىعى 100 شاقىرىم بولاتىن 150 كوشە جوندەلىپ, كەيبىرەۋى جاڭادان سالىنادى. بۇگىن ەلوردا اكىمى التاي كولگىنوۆ بىرقاتار جولداردىڭ قۇرىلىسى بارىسىمەن تانىستى. ە355, ە32, ە489, ە312 كوشەلەرىندە ءتورت جولاقتى جول قۇرىلىسى جۇرگىزىلىپ جاتىر. وندا جەلەكجول اباتتاندىرىلادى.
سونىمەن بىرگە ەلوردا اكىمى №27 كوشەدەگى (ش. بەيسەكوۆا كوشەسىنەن تۇران داڭعىلىنا دەيىنگى ۋچاسكەدە) جول جۇمىستارىمەن تانىستى. قالا اكىمى التاي كولگىنوۆ جول جۇمىستارىن ءتيىستى دەڭگەيدە جۇرگىزۋ قاجەتتىگىن ايتتى.
«ساپاسىز سالىنعان جولداردى قابىلدامايمىز, مەردىگەر ءوز ەسەبىنەن قايتا جوندەيتىن بولادى»,-دەدى التاي كولگىنوۆ.
ەلوردانىڭ 50 ماگيسترالدى كوشەلەرىندەگى قۇرىلىس پەن جوندەۋ جۇمىستارى بيىلدىڭ وزىندە كولىك اعىنىن جەڭىلدەتۋگە جانە جول ءجۇرۋ ءۇشىن قولايلى جاعداي جاساۋعا مۇمكىندىك بەرەدى. الەۋمەتتىك نىساندار مەن تۇرعىن ءۇي كەشەندەرىنە اپاراتىن جولدار ەسكەرىلەدى. قالانىڭ ەلدى-مەكەندەرىندە جالپى ۇزىندىعى 60 شاقىرىمدى قۇرايتىن 100 كوشە جوندەلىپ, كەيبىرەۋى جاڭادان سالىنادى.
جول جۇمىستارىنا «جۇمىسپەن قامتۋدىڭ جول كارتاسى» باعدارلاماسى اياسىندا 1,5 مىڭ ادام جۇمىلدىرىلادى. بارلىعى 15 مىڭ جاڭا جۇمىس ورنى قۇرىلادى. ازاماتتار جۇمىسپەن قامتۋ ورتالىقتارى ارقىلى جۇمىسقا ورنالاسا الادى.