تۇركىستان وبلىسىنىڭ ديقاندارىنا ەلىمىزدەگى توتەنشە جاعداي كەرى اسەرىن تيگىزىپ وتىرعانى ءمالىم. ءونىمىن وتكىزە الماي وتىرعان شارۋالاردىڭ جانايقايىن جۋىردا وبلىس اكىمى ومىرزاق شوكەەۆ پرەمەر-مينيسترگە جەتكىزگەن دە بولاتىن. مىسالى, ماقتاارال اۋدانىنىڭ ديقاندارى بيىل 351,5 گەكتار جەرگە قىرىققابات ەگىپ, قازىردىڭ وزىندە 3584 توننا ءونىم جيناعان. الايدا, كۇللى الەم حالقىن ۇيىنەن شىعارماي قويعان پاندەميا قىرىققابات ءونىمىنىڭ ساتىلۋىنا كەدەرگى جاساپ, نارىقتاعى باعاسىن كۇرت تومەندەتىپ جىبەردى.
بۇعان دەيىن شارۋالارعا ەلىمىزدەگى بلوك-بەكەتتەردەن كەدەرگىسىز ءوتۋ ءۇشىن وبلىستىق اۋىل شارۋاشىلىعى باسقارماسى تاراپىنان بارلىق وبلىستارمەن مەموراندۋم ءتۇزىلىپ, ء«بىز بىرگەمىز!» لوگوتيپىن جاپسىرىپ الۋ ارقىلى ءوتۋ مۇمكىندىگى جاسالعان ەدى. ەندى وبلىس اكىمى ومىرزاق شوكەەۆتىڭ تاپسىرماسىمەن ماقتاارال اۋدانىندا قىرىققابات ءونىمىن وتكىزۋ بويىنشا ارنايى ديستريبيۋتور تاعايىندالىپ, شارۋالاردىڭ ءونىمىن ساتۋعا كومەك بەرىلەتىن بولدى. اۋدان اكىمى باقىت اسانوۆ قىرىققابات ەككەن شارۋالارعا ءونىمىن وتكىزۋ بويىنشا ديستريبيۋتور بولىپ تاعايىندالعان جەكە كاسىپكەر, اۋداندىق ءماسليحاتتىڭ دەپۋتاتى بەرىك شامپيەۆتى تانىستىردى.
«ەگەر, ءسىزدىڭ ەككەن قىرىققاباتىڭىز ءپىسىپ دايىن بولسا, الايدا ءونىمىڭىزدى ساتۋ بويىنشا ماسەلە تۋىنداپ جاتسا, اۋدانىمىزدىڭ ديستريبيۋتورى بەرىك شامپيەۆكە حابارلاسۋعا بولادى. ءونىمىڭىزدى ەكسپورتتاۋ نەمەسە باسقا وبلىستارعا الىپ بارىپ ساتۋ ءۇشىن قۇجاتتاردى دايىنداۋعا كومەكتەسىپ, جۇك كولىكتەرىن تاۋىپ بەرۋگە مۇمكىندىكتەر جاسايتىن بولادى», دەدى باقىت اسانوۆ.
تۇركىستان وبلىسى