تۇركىستان وبلىسىندا, 30 ساۋىردەگى اقپارات بويىنشا, ينفەكتسيا جۇقتىرعان 9 ناۋقاس دەرتتەن ايىعىپ ۇيلەرىنە ورالدى. ولاردىڭ 7-ءۋى ءبىر وتباسى مۇشەلەرى, ياعني ارىس قالاسىنىڭ تۇرعىندارى.
اتى-جوندەرىن جاريالاعىسى كەلمەگەن تۇرعىندار دارىگەرلەرگە دەگەن شەكسىز العىستارىن ءبىلدىرۋدى وتىنگەن. ولار الداعى ۋاقىتتا ۋاقىتشا ءۇي كارانتينىندە دارىگەرلەردىڭ قاداعالاۋىندا بولادى. جالپى, ارىستا دەرتكە شالدىققان 17 ناۋقاس تىركەلگەن. ولاردىڭ 14-ءى جازىلدى. جاقىن جانە ىقتيمال قارىم-قاتىناستا بولعان 28 ادامنان دا سىناما الىنىپ, تەرىس ناتيجە بەرۋىنە وراي ۇيلەرىنە قايتارىلعان.
سونداي-اق, بايدىبەك اۋدانى, مىڭبۇلاق اۋىلىنىڭ 1987 جىلى تۋعان تۇرعىنى جانە سايرام اۋدانى, قوسبۇلاق اۋىلىنىڭ 28 جاستاعى ازاماتى دا دەرتىنەن ايىعىپ, وتباسىنا ورالدى.
جالپى, تۇركىستان وبلىسى بويىنشا بۇگىنگە دەيىن 38 ادام كوروناۆيرۋس ينفەكتسياسىنان جازىلعان.