ەلىمىزدە توتەنشە جاعدايعا بايلانىستى شارالار دەر كەزىندە قولعا الىندى. قىتايدا وقىپ جاتقان جانە سول ەلگە ساپارلاپ بارعان ازاماتتارىمىزدى اۋرۋ جۇقتىرماستان بۇرىن تەگىس ەلگە اكەلگەنى ىندەتتىڭ الدىن الۋدىڭ وتە ءبىر مىقتى قادامى بولدى دەپ ەسەپتەيمىن. ونى باسقا ەلدەر جاسادى ما, جاسامادى ما بىلمەيمىن, ال ءبىزدىڭ ازاماتتاردىڭ ىندەت ءورشىپ تۇرعان جەردەن وتانىنا قايتۋى ناعىز حالىققا جاسالعان قامقورلىق بولعانى انىق.
پرەزيدەنت ق.توقاەۆتىڭ توتەنشە جاعدايدى 11 مامىرعا دەيىن ۇزارتۋ جونىندەگى شەشىمى دە وتە قۇپتارلىق, ويتكەنى اۋرۋ ءورشۋ شىڭىنا ءالى جەتكەن جوق. كەيبىر جەرلەردە ۆيرۋس جۇقتىرۋ تومەندەگەنىمەن, كەي وڭىرلەردە شىرقاۋ بيىگى ءالى الدا, سوندىقتان دا ۇزارتۋ ساياساتىن قولدايمىن. ءتىپتى مامىردىڭ 11-نەن كەيىنگى قادام جونىندە دە ءبىر ويلانىپ الۋ قاجەت بولار. وسى شارالار ارقىلى بۇگىندە ەلىمىزدە اۋىرعاندار سانى دا, قايتىس بولعاندار سانى دا وزگە ەلدەردەي شىعانداپ كەتپەدى. شۆەتسيا, شۆەيتساريا, بەلارۋس رەسپۋبليكاسى سىندى مەملەكەتتەر اۋرۋعا قارسى شارالاردى قاراستىرماپ ەدى, ەندى ونىڭ سالقىنىن, زاردابىن تارتىپ جاتىر. قازاقتىڭ «الىنبايتىن قامال, جەڭىلمەيتىن جاۋ جوق» دەگەن ءسوزى راس. ەل بولىپ وقشاۋلانىپ ەدىك, بۇل باعىتتاعى ءىس ناتيجەلى بولىپ جاتىر. ايتپەگەندە كوپتەگەن ازاماتىمىزدان ايىرىلىپ قالار ەدىك.
پرەزيدەنت بۇل جولى دا مەديتسيناعا دەگەن كوزقاراس وزگەرەتىنىن, سالانى قارجىلاندىرۋ كۇشەيەتىنىن, مەديتسينانى دامىتۋ, رەفورمالاۋ قاجەتتىگىن باسا ايتتى. بۇل – وتە دۇرىس شەشىم. ياعني كوزگە كورىنبەيتىن ۆيرۋس تەك مەديتسيناعا ەمەس, جالپى ادامزاتتىڭ ومىرلىك كوزقاراس, ۇستانىمىنا دا وزگەرىس ەنگىزىپ جاتىر.
وسى قيىن كۇندەردە مەديتسينا قىزمەتكەرلەرى مايداننىڭ العى شەبىندەگى ساربازدارداي ەڭبەك ەتۋدە. توتەنشە جاعداي ورىن العان كەزدە, الدىمەن قۇتقارۋشىلار زارداپ شەكپەي مە, سول ءتارىزدى ءبىزدىڭ دارىگەرلەر مەن مەيىربيكەلەرىمىز العى شەپتە ايانباي ەڭبەك ەتۋدە. مەملەكەت مەديتسينا قىزمەتكەرلەرىنە قوسىمشا اقى تولەۋدى قاراستىردى. جوعارى دەڭگەيدەگى ۇستەمەاقى تولەنىپ جاتىر. بۇل دەنساۋلىق كۇزەتىندەگى جاندارعا جاسالعان ۇلكەن قۇرمەت, قامقورلىق دەپ سانايمىن. ءبىز دارىگەرلەر قاۋىمى مۇنى وتە جوعارى باعالايمىز.
جاقسىلىق دوسقاليەۆ,
مەديتسينا عىلىمدارىنىڭ دوكتورى, پروفەسسور