تۇركىستان وبلىسىندا COVID-19 ينفەكتسياسىن جۇقتىرعان ءتورت ازاماتتىڭ ەكەۋى وبلىس ورتالىعىنىڭ 1991 جىلى جانە 1997 جىلى تۋعان, ال ەكەۋى سارىاعاش اۋدانى, جارتىتوبە اۋىلدىق وكرۋگىنىڭ 46 جاستاعى, 16 جاستاعى تۇرعىندارى.
اتالعان ازاماتتار وقشاۋلانعان, ەم قابىلداۋدا, جاقىن بايلانىستا بولعاندار انىقتالۋدا. وبلىستىق سيتۋاتسيالىق ورتالىقتىڭ حابارلاۋىنشا, قازىرگى تاڭدا ۆيرۋس جۇقتىرعاندار سانى وبلىس بويىنشا - 117.
سونداي-اق 28 ءساۋىر كۇنى ارىس قالاسىنىڭ ءۇش ازاماتى كوروناۆيرۋس ينفەكتسياسىنان ايىعىپ, ۇيلەرىنە ورالدى. كۆي جانە جەدەل پنەۆمونيا, ارتەريالدى گيپەرتەنزيا سىندى قوسالقى دياگنوزبەن 4 ءساۋىر كۇنى اۋرۋحاناعا تۇسكەن 52 جاستاعى ازامات ەمنەن كەيىن جاعدايىنىڭ جاقسارۋىنا جانە 2 رەت پتر زەرتتەۋى تەرىس ناتيجەسىنە بايلانىستى ۇيىنە شىعارىلدى. ال ارىس قالاسىنىڭ 1974 جىلى تۋعان تۇرعىنى 10 ءساۋىر كۇنى كۆي راستالىپ جانە جەدەل برونحيتپەن اۋرۋحاناعا جاتقىزىلعان. ناۋقاستىڭ جاعدايى جاقسارۋى جانە 26 ءساۋىر كۇنى پتر زەرتتەۋى تەرىس ناتيجە كورسەتۋى سەبەپتى اۋرۋحانادان شىقتى. ارىس قالاسىنىڭ 2018 جىلى تۋعان كىشكەنتاي تۇرعىنى دا الىنعان ەمنەن كەيىن جاعدايىنىڭ جاقسارۋى جانە سوڭعى پتر زەرتتەۋى تەرىس ناتيجەسىنە بايلانىستى ۇيىنە ورالدى.
جالپى وبلىس بويىنشا ىندەتتەن جازىلعاندار سانى – 29.