اتىراۋ وبلىسىنىڭ اكىمى ماحامبەت دوسمۇحامبەتوۆ كوروناۆيرۋس ينفەكتسياسىنا قارسى كۇرەستە الدىڭعى ساپتا جۇرگەن دارىگەرلەر جانە مەديتسينا قىزمەتكەرلەرىمەن ونلاين سۇحبات وتكىزىپ, العىسىن ءبىلدىردى.
تىكەلەي بايلانىسقا كوروناۆيرۋس ينفەكتسياسىن جۇقتىرعاندارمەن جۇمىس جاساپ جاتقان وبلىستىق جەدەل جاردەم ستانتسياسى مەن ينفەكتسيالىق بولىمشە ورنالاسقان №2 وبلىستىق اۋرۋحانانىڭ دارىگەرلەرى قوسىلدى.
–قازىر سىزدەر شىن مانىندە مىلتىقسىز مايدانداسىزدار. ويتكەنى, كۇندەلىكتى قاۋىپ-قاتەرگە قاراماستان قاجىرلى جۇمىس ىستەپ, بۇگىنگىنىڭ قاھارماندارىنا اينالدىڭىزدار. قازاقستان مەديتسيناسىنىڭ ەرلىككە تولى جاڭا تاريحىن جازىپ جاتىرسىزدار. حالقىمىز وزدەرىڭىزگە ءۇمىت ارتىپ, اماندىقتارىڭىزدى تىلەپ وتىر. ءبىزدىڭ دە باستى مىندەتىمىز – ەڭ الدىمەن, سىزدەردى قولداۋ, - دەدى وبلىس اكىمى ماحامبەت دوسمۇحامبەتوۆ.
اتىراۋدا مەديتسينا سالاسى ماماندارىنىڭ جالاقىسىنا ۇستەماقى تولەۋ ءۇشىن 288,7 ميلليون تەڭگە بولىنگەن. وتكەن ايدا ونىڭ 44,5 ميلليون تەڭگەسى 373 قىزمەتكەردىڭ قولىنا ءتيدى. بۇدان تىس كوروناۆيرۋسپەن كۇرەسىپ جاتقان دارىگەرلەردى ىنتالاندىرۋدىڭ قوسىمشا شارالارى قاراستىرىلدى. اتاپ ايتقاندا, دەمەۋشىلەر تارتا وتىرىپ, 634 مەديتسينالىق قىزمەتكەرگە كوتەرمەلەۋ قارجى تولەندى. ال, 164 دارىگەر جانە جەدەل جاردەم ستانتسياسى قىزمەتكەرلەرى قوناق ۇيلەرگە ورنالاستىرىلدى.
تىكەلەي بايلانىستا №2 وبلىستىق اۋرۋحانانىڭ دارىگەرلەرى ناۋقاستاردى ەمدەۋ جولدارى تۋرالى باياندادى. ماسەلەن, ينفەكتسيالىق ستاتسيونارعا 27 ناۋرىزدان بۇگىنگە دەيىن 123 ناۋقاس قابىلدانىپ, 59-ى تولىق ناتيجەلى ەمىن الىپ, اۋرۋحانادان شىعارىلدى. ال, جەدەل جاردەم ستانتسياسى ماماندارىنىڭ ايتۋىنشا, COVID-19 ينفەكتسياسىن جۇقتىرعاندارمەن جاقىن جانە پوتەنتسيالدى بايلانىستا بولعان ازاماتتاردى تاسىمالداۋعا 3 ارنايى بريگادا جاساقتالعان. ساۋىردە قوسىمشا 2 ارنايى بريگادا تاعى قوسىلعان. سونىمەن قاتار, قوردا ء بىر رەت قولدانىلاتىن ماسكا, ارنايى قورعانىس كوستيۋمدەرى, قورعانىس كوزىلدىرىگى جەتكىلىكتى. دەنساۋلىق ساقتاۋ باسقارماسى, دەمەۋشىلەر, ەرىكتىلەر قورعانىس كيىمدەرىمەن ۇنەمى قامتاماسىز ەتىلۋدە.
–دەنساۋلىق ساقتاۋ سالاسى ۇنەمى باستى نازارىمىزدا بولادى. وبلىستاعى ءاربىر مەديتسينا قىزمەتكەرىنىڭ ورنى ءبىز ءۇشىن ەرەكشە. بۇل ىندەتتى بىرگە جەڭەتىنىمىزگە سەنەمىن. وتباسىلارىڭىزبەن تەز قاۋىشۋلارىڭىزدى تىلەيمىن, - دەپ وبلىس اكىمى ماحامبەت دوسمۇحامبەتوۆ مەديتسينا قىزمەتكەرلەرىنە العىسىن ءبىلدىردى.