وتكەن اپتادا يەمەندەگى اتىستى ۋاقىتشا توقتاتۋ كەلىسىمى اياقتالدى. وسىعان بايلانىستى ساۋد ارابياسى بەيبىتشىلىك جونىندە جاڭا كەلىسسوزدەر جۇرگىزبەك. الايدا حۋسيتتەر جاعى ۇسىنىستان باس تارتتى.
كوروناۆيرۋس پاندەمياسى مەن مۇناي قۇنىنىڭ قۇلدىراۋى ساۋد ارابياسىنا وڭايعا تيمەگەنى انىق. سوندىقتان ەر-رياد بيلىگى يەمەندەگى بەس جىلدان اسقان ازاماتتىق سوعىسقا ىقپال ەتۋىن بارىنشا تومەندەتپەك. وسى ماقساتتا ساۋد ارابياسى حۋسيتتەرمەن مامىلەگە كەلۋدى ءجون ساناپ وتىر.
ەستەرىڭىزگە سالساق, يەمەندەگى قارۋلى قاقتىعىس 2014 جىلدان بەرى جالعاسىپ كەلەدى. وسى ۋاقىتتان بەرى شيتتەردىڭ «انسار-اللا» قوزعالىسىنا جاتاتىن حۋسيت كوتەرىلىسشىلەرى ۇكىمەت اسكەرىمەن سوعىسىپ جاتىر. ساۋد ارابياسى سۋننيتتەردىڭ باسىن قوسىپ, كواليتسيا قۇرىپ, 2015 جىلعى ناۋرىزدان باستاپ ازاماتتىق سوعىسقا ارالاسقان-دى. ۇكىمەت اسكەرىنە بولىسقان ولار تالاي مارتە حۋسيتتەرگە قارىمتا سوققى جاسادى.
الايدا حۋسيتتەر 2014 جىلى يەمەن استاناسى سانانى باسىپ الىپ, ۇكىمەتتى ساۋد ارابياسىنا قاشۋعا ماجبۇرلەگەن-تۇعىن. سودان بەرى قارۋلى قاقتىعىستار ءسال سايابىرسىعانىمەن, مۇلدەم توقتاعان جوق. حالىقارالىق قوعامداستىق حۋسيت كوتەرىلىسشىلەرىن يران قولدايدى دەپ ايىپتادى. الايدا ونى تەگەران دا, حۋسيتتەر دە جوققا شىعاردى.
وكىنىشكە قاراي, بۇۇ-نىڭ بەيبىت كەلىسىمگە كەلۋ جونىندە ارەكەتتەرى ناتيجە بەرەر ەمەس. بۇگىنگە دەيىن وسى ەلدە مىڭداعان ادام قازا تاۋىپ, ميلليونعا جۋىق يەمەندىك بوسقىنعا اينالدى.
بۇۇ تاراپى ۇسىنعان بەيبىت كەلىسىم جاساسۋعا بۇعان دەيىن ەكى تاراپ تا ىنتا تانىتپاعان. جوعارىدا ايتىپ وتكەنىمىزدەي, مۇناي باعاسىنىڭ قۇلدىراۋى مەن كوروناۆيرۋس ساۋد ارابياسىنىڭ كوزقاراسىن وزگەرتتى. ايتسە دە حۋسيتتەر وزدەرى قويعان تالاپتار ورىندالعاندا عانا ۇستەل باسىنا وتىراتىنىن جەتكىزدى. ماسەلەن, كوتەرىلىسشىلەر وزدەرىنىڭ قاراماعىنداعى يەمەننىڭ سولتۇستىك بولىگىنەن بلوكادانى الىپ تاستاۋدى تالاپ ەتىپ وتىر. سونداي-اق سانامەن اراداعى اۋە قاتىناسىن قايتا قالپىنا كەلتىرۋدى سۇرادى.
ء«بىزدىڭ تالابىمىز وتە قاراپايىم. ەلىمىزدەن كەتىڭدەر, بلوكادانى الىڭدار, بومبالاۋدى دوعارىڭدار», دەيدى كوتەرىلىسشىلەر باسشىلارىنىڭ ءبىرى مۇحاممەد ءالي ءال-حۋسي.
سونىمەن قاتار حۋسيتتەر يەمەندە شەتەلدىك كۇشتەردىڭ بولماۋىن, كواليتسياعا مۇشە مەملەكەتتەر قيراعان ۇيلەردى, زاۋىتتاردى جانە دۇكەندەردى قالپىنا كەلتىرۋ شىعىنىن كوتەرۋدى, جۇمىسشىلاردىڭ جالاقىسىن 10 جىل بويى تولەپ تۇرۋدى سۇراپ وتىر. سوندا عانا كوتەرىلىسشىلەر ەر-ريادقا كەلىپ, كەلىسىمگە قول قويماق. بۇعان دەيىن حۋسيت باسشىلارى مامىلە جاساسۋ تەك شەتەلدە جۇزەگە اساتىنىن مالىمدەگەن ەدى.
ساۋد ارابياسى مەن يەمەن ۇكىمەتى بۇۇ-نىڭ ۇسىنىسىن قابىلداپ, ەلدە تىنىشتىق ورناتۋعا مۇددەلى ەكەنىن ءبىلدىردى. الايدا كوتەرىلىسشىلەر ۇيىمنىڭ ۇسىنىسىنا مۇلدەم قارسى. جوعارىدا ايتىلعان تالاپتاردان بولەك, حۋسيتتەر ساۋد ارابياسىن يەمەننىڭ ۇكىمەت باسشىسى مانسۋر ءحاديدى قولداماۋى ءتيىس دەپ ەسەپتەيدى. دەگەنمەن, كوتەرىلىسشىلەر يرانمەن اراداعى بايلانىستى ۇزۋگە ق ۇلىقتى ەمەس.
حالىقارالىق قوعامداستىقتىڭ يەمەندەگى ازاماتتىق سوعىسقا قاتتى الاڭداۋىنىڭ تاعى ءبىر سەبەبى – كوروناۆيرۋس پاندەمياسى. ازىرگە ەلدەگى جاعداي بەيمالىم. ءساۋىردىڭ باسىندا ءبىر ادامنىڭ ۆيرۋس جۇقتىرعانى انىقتالدى دەگەن اقپارات تاراعان. كەيىن ونىڭ ساۋ ەكەنى بەلگىلى بولدى. الايدا COVID-19 جۇقتىرعاندار تۋرالى ناقتى مالىمەت ايتۋ قيىن. الدا-جالدا ۆيرۋس ەپيدەميالىق سيپات السا, ەل بيلىگى ونى باقىلاي الماي قالۋى ابدەن مۇمكىن. ويتكەنى يەمەندەگى اۋرۋحانالاردا مامان جەتىسپەيدى, قۇرال-جابدىقتار جوقتىڭ قاسى. ءتىپتى كەي كەزدە ەلەكتر جارىعى ءوشىپ قالادى. قىسقاسى, يەمەندەگى جاعداي ءماز ەمەس.
حۋسيتتەردىڭ تالابىن حالىقارالىق قوعامداستىق تا, ساۋد ارابياسىنىڭ دا قاناعاتتاندىرۋى ەكىتالاي. بىرىنشىدەن, ەلگە اكەلىنەتىن تاۋارلار مەن مۇناي ونىمدەرى پورتتار ارقىلى كىرگىزىلەدى. ياعني بلوكادا بار دەگەن سىلتاۋ شىندىقتىڭ اۋىلىنان الىس جاتىر.
ەكىنشىدەن, يەمەن ۇكىمەتىن حالىقارالىق قوعامداستىق مويىنداعان. ءادىل سايلاۋ ارقىلى سايلانعان. ەگەر ۇكىمەتتى قولداۋعا كەلگەن شەتەلدىك اسكەر ەلدەن كەتسە, بۇل بۇۇ-عا دا, حالىقارالىق قوعامداستىققا دا, ساۋد ارابياسىنا دا سىن بولار ەدى.
مۇنى حۋسيتتەر دە, ساۋد ارابياسى دا جاقسى تۇسىنەدى. Wall Street Journal-دىڭ پايىمداۋىنشا, كوتەرىلىسشىلەر مۇمكىن ەمەس تالاپ قويۋ ارقىلى كەلىسسوزدەرگە ىنتاسىز ەكەنىن اڭعارتتى.