سەلەكتورلىق رەجيمدە وتكەن كەڭەسكە اتالعان ۆەدومستۆونىڭ ۆيتسە-مينيسترلەرى, قۇرىلىمدىق بولىمشەلەر مەن ۇيىمداردىڭ باسشىلارى, مەديتسينالىق جوو رەكتورلارى, عىلىمي ورتالىقتار ديرەكتورلارى جانە سالاعا قاتىستى وزگە دە ۇيىم وكىلدەرى قاتىستى. دەنساۋلىق ساقتاۋ مينيسترلىگى سانيتارلىق-ەپيدەميولوگيالىق قىزمەتتى كادرلارمەن قامتاماسىز ەتۋ ءۇشىن قىسقا ءارى ورتا مەرزىمدەرگە ارنالعان شارالاردى ۇسىندى. بۇل تۋرالى دسم ءباسپاسوز قىزمەتى حابارلادى.
قىسقا مەرزىمدە شارالار اياسىندا باكالاۆرياتتاعى 120 تۇلەكتى سانيتارلىق دارىگەرلىككە (ەپيدەميولوگتار), قوعامدىق دەنساۋلىق ساقتاۋ ماماندىعىنا جانە گيگيەناشىلىققا مامانداندىرۋ ەسكەرىلگەن. ول ءۇشىن ستۋدەنتتەر ەپيدەميولوگيانىڭ قوسىمشا ساعاتتارىن يگەرۋى ءتيىس.
مينيسترلىك قىسقا مەرزىمدە ەپيدەميولوگيالىق قىزمەت بويىنشا 300 ماماندى قايتا دايارلاۋدى جانە 9 مىڭ مەديتسينا قىزمەتكەرىنىڭ بىلىكتىلىگىن ارتتىرۋدى جوسپارلاپ وتىر. بۇدان بولەك, ورتا مەرزىمدەگى شارالار اياسىندا ءۇشىنشى كۋرستان باستاپ ءبىلىم بەرۋ تراەكتوريالارى تۇرعىسىندا (ەپيدەميولوگيا جانە گيگيەنا) «قوعامدىق دەنساۋلىق ساقتاۋ» ماماندىعىنىڭ ستۋدەنتتەرىنىڭ پروفيليزاتسيا شاراسى ۇسىنىلدى. بەيىندى ماگيستراتۋرادا ەپيدەميولوگيا, گيگيەنا, دەنساۋلىق ساقتاۋداعى مەنەدجمەنت ماماندىقتارى بويىنشا دايارلاۋ جوسپارلانۋدا. دوكتورانتۋرادا عىلىمي-پەداگوگيكالىق كادرلاردى ماقساتتى دايارلاۋ جالعاسادى. ⠀
كەڭەس بارىسىندا رەسپۋبليكالىق ساراپشىلار كادرلار دايارلاۋدى رەفورمالاۋ جانە سانيتارلىق-ەپيدەميولوگيالىق سالادا قىزمەتكەرلەردىڭ الەۋەتىن ارتتىرۋ بويىنشا شارالار جوسپارىن تالقىلادى.