كەشە استانا ماڭىنداعى «قازانات» اتشابارىندا كوكپاردان ءوتىپ جاتقان ازيا چەمپيوناتى ودان ءارى جالعاستى.
كەشە استانا ماڭىنداعى «قازانات» اتشابارىندا كوكپاردان ءوتىپ جاتقان ازيا چەمپيوناتى ودان ءارى جالعاستى.
وسى كۇنى اپتا باسىنان بەرگى ەلوردانىڭ تۇنەرگەن اسپانى اشىلىپ, حالىق كوكپار تارتقان جىگىتتەردىڭ ونەرىن تاماشالاۋعا كوپ جينالدى.
قازىرگى تاڭدا وسى ۇلتتىق ويىنىمىزدى حالىق اراسىندا كەڭىنەن ناسيحاتتاۋ, سالاماتتى ءومىر سالتىن قالىپتاستىرۋ جانە ويىننىڭ تەحنيكاسى مەن شەبەرلىگىن مەڭگەرۋگە جاستارىمىزدىڭ قىزىعۋشىلىعىن وياتۋ اسا ماڭىزدى بولىپ وتىر. وسى ورايدا ەلىمىزدە حالىقارالىق, رەسپۋبليكالىق جارىستاردى ۇيىمداستىرىپ كەلە جاتقان ۇلتتىق سپورت تۇرلەرى قاۋىمداستىعىنىڭ جۇمىسى مەن قىزمەتىن ەرەكشە اتاپ وتكەنىمىز ءجون. ۇلتتىق سپورت تۇرلەرىنەن مۇنداي حالىقارالىق جارىستار وتكىزۋدىڭ باستى ماقساتى – قازاقتىڭ باي رۋحاني مۇراسىن جاڭعىرتۋ جانە ناسيحاتتاۋ.
كەشە ازيا چەمپيوناتىنىڭ ەكىنشى كۇنى دە قىزىقتى جانە تارتىستى ءوتتى. سارى قۇرلىق باسەكەسىنىڭ فاۆوريتتەرى – قازاقستان مەن قىرعىزستان قۇرامالارى كوپشىلىك كۇتكەندەي, كەزەكتى ويىندارىندا جەڭىسكە جەتتى. قازاقستان قۇراماسى رەسەي كومانداسىن 16:1 ەسەبىمەن, ال الاتاۋدىڭ ار جاعىنان كەلگەن ايىرقالپاقتى اعايىندار ءتۇركيانى 16:3 ەسەبىمەن ۇتتى. وسى كۇنى ءتاجىكستان قۇراماسى دا العاشقى ۇپايلارىن ساناپ الدى. ولار موڭعوليا كوكپارشىلارىن 8:1 ەسەبىمەن جەڭسە, العاشقى ۇپايلارىنا يە بولعان قىتاي كومانداسى دا وزبەكستاننان 6:4 ەسەبىمەن باسىم ءتۇستى.
بۇگىن ويىندار ودان ءارى جالعاسادى. ال ەرتەڭ چەمپيوناتتىڭ جارتىلاي فينالى وتسە, جەكسەنبى كۇنى كوماندالار ءوزارا ازيا چەمپيونىن انىقتايدى.
داستان كەنجالين,
«ەگەمەن قازاقستان».