شىنىندا قىزىقتىڭ كوكەسى كارانتيننىڭ كەزىندە بولىپ جاتىر. ويتكەنى, كوپ ادامدار كوروناۆيرۋستىڭ نە ەكەنىن ءالى دە تۇسىنبەۋدە. ەندى بىرەۋلەر امالىنىڭ جوقتىعىنان وسىنداي قادامعا بارۋى مۇمكىن. كارانتين كەزىندە تاكسيمەن زاڭسىز ادام تاسۋ, جالعان اقپارات تاراتۋ, ازىق-ت ۇلىك, باسقا دا تاۋارلاردىڭ باعاسىن كوتەرۋ سياقتى جايتتەر ءجيى ورىن الۋدا. ال, ءبىز سونداي وقيعالاردىڭ «ەڭ قىزىقتارىنا» عانا توقتالدىق.
الماتى قالاسىنىڭ ءبىر تۇرعىنى كوروناۆيرۋس ىندەتىنە شالدىعۋىنا بايلانىستى ءوز-وزىنە قول سالعانى تۋرالى ۆيدەو جاريالاپ, تاراتىپ جىبەرگەن. كەيىننەن ول پوليتسياعا بۇل ارەكەتتى ءىشى پىسقاننان جاساعانىن, ۆيدەونى تەك جاقىن دوستارىنا عانا تاراتقانىن ايتىپ, كوپشىلىكتەن كەشىرىم سۇرادى.
شىعىس قازاقستان وبلىسى, ەرەيمەنتاۋ قالاسىنىڭ ءبىر تۇرعىنى جەرگىلىكتى توتەنشە جاعداي كەزىندە ءتورت كاسىپكەرگە پاۆلوداردان تومەن باعادا جەمىس-جيدەك جەتكىزىپ بەرەمىن دەپ, 66 مىڭ تەڭگەسىن الىپ, قاشىپ كەتكەن. كەيىننەن پوليتسيا الاياقتى ەسىل اۋدانىنداعى ءبىر قوناق ۇيدە جاتقان جەرىنەن ۇستادى.
ال, پەتروپاۆلدىق ءبىر كاسىپكەر ينتەرنەت ساۋدا ارقىلى 7 مىڭ مەديتسينالىق ماسكاعا تاپسىرىس بەرىپ, جەتكىزىپ بەرۋشىنىڭ ەسەپ-شوتىنا 400 مىڭ تەڭگە اۋدارىپ جىبەرگەن. اقشانى العان ادام سودان ءىزىم-قايىم جوق بولعان. قازىر ونى پوليتسيا ىزدەستىرىپ جاتىر.
الماتى قالاسىنداعى 28 پانفيلوۆشىلار ساياباعىندا كەپتەرلەردىڭ جاپپاي قىرىلعانى تۋرالى ۆيدەو تارادى. جۇرت مۇنى قالادا جۇرگىزىلگەن دەزينفەكتسيا جۇمىستارىنىڭ زيانى دەپ جورامالدادى. ال, ورمان شارۋاشىلىعى جانە جانۋارلارى الەمى كوميتەتىنىڭ ءباسپاسوز حاتشىسى ساكەن دىلداحمەت كەپتەرلەردىڭ الدەنەدەن ۋلانىپ ولگەنىن, ارنايى ساراپتاما ءبارىن انىقتايتىنىن جەتكىزدى.
قوستاناي وبلىسى ۇزىنكول اۋدانى ەرشوۆ اۋىلىنىڭ ۋچاسكەلىك ينسپەكتورى كارانتين كەزىندە ابدەن ەرىكسە كەرەك, دوسى ەكەۋى ءازىل ءۇشىن ۆيدەو ءتۇسىرىپ, WhatsAp جەلىسى ارقىلى تاراتادى. ياعني, ۆيدەودا ەكى دوس اۋىلداعى ۇيلەردىڭ بىرىنەن 28 جىل بۇرىن جاسىرىلعان سپيرت تولى بوشكە تاۋىپ الادى. ءسپيرتتى جاعىپ كورگەن ولار ء«بىزدى ەندى كوروناۆيرۋس المايدى» دەپ ءماز بولادى. بىراق, بۇل ازىلگە وبلىستىق پوليتسيا دەپارتامەنتى كۇلە المادى. ۋچاسكەلىك ينسپەكتوردى بىردەن جۇمىستان شىعارىپ جىبەردى.
ەگيپەتتەن ورالعان قاراعاندىلىق ەرلى-زايىپتار ەكى اپتالىق كارانتينگە اۋرۋحاناعا جاتقىسى كەلمەي, ابدەن قيعىلىق سالدى. «ساپ-ساۋمىز, ەش جەرىمىز اۋىرمايدى» دەپ ازار دا بەزەر بولعان ولاردى دارىگەرلەر كوندىرە الماي, اقىرىندا كوپقاباتتى ۇيدەگى پاتەرىنىڭ بالكونىنا پوليتسيا ءورت ءسوندىرۋ كولىگىنىڭ ساتىسى ارقىلى كوتەرىلدى. ەرلى-زايىپتىلار وسىدان كەيىن عانا اۋرۋحاناعا جاتۋعا ءماجبۇر بولدى.
ال, وسىنىڭ الدىندا قاراعاندىلىق تاعى ءبىر ازامات كارانتيندە جاتقان ايەلىنىڭ پالاتاسىنا تەرەزە ارقىلى كىرگەن. سول كۇنى كۇن سۋىق بولعاندىقتان ابدەن توڭىپ قالعان 36 جاستاعى جىگىت گەرمانيادان ۇشىپ كەلگەن ايەلىنە جەكە زاتتارى مەن تەمەكىسىن تەرەزە ارقىلى كىرىپ بەرىپتى. وندا دا بىردەن شىعىپ كەتپەي بولمەدە ءبىراز جىلىنعان كورىنەدى. قاراعاندىلىق ازامات سوت شەشىمىمەن ون تاۋلىككە قاماۋعا الىندى.
ەل استاناسىندا كارانتين اۋماعىن ارعى بەتتەگى دۇكەننەن اراق الىپ كەلۋ ءۇشىن بۇزعان ازامات ۇستالدى.
وسكەمەن قالاسىنىڭ ءبىر تۇرعىنى تاۋلىك بويى جۇمىس ىستەيتىن 1406 call-ورتالىعىنا تەلەفون شالىپ, ءوزىنىڭ تايلاندتان ورالعانىن, بويىندا كوروناۆيرۋس بەلگىلەرى بايقالعانىن ايتقان. كەيىننەن ارنايى ماماندار 39 جاستاعى بۇل ازاماتتىڭ دەنساۋلىعى ساپ-ساۋ ەكەنىن, ەشقانداي شەتەلگە شىقپاعانىن, تەلەفون سوققان كەزدە ماس بولعانىن انىقتادى. وعان ايىپپۇل سالىندى.
ارنايى تسەحتا ماسكا تىگۋگە كىرىسكەن پاۆلودار وبلىسىنداعى اپ-162/3 مەكەمەسىندە جازاسىن وتەۋشى ءبىر ازامات ەڭ العاشقى 20 ماسكانى ءوزىنىڭ وتباسىنا سالىپ جىبەردى. «مەن وسى جەردە تىگىن تىگۋدى ۇيرەندىم, قازىر وسى مەكەمەدەگى قىزمەتكەرلەرى ءۇشىن ماسكا تىگىپ جاتىرمىن. بىراق, جالاقىمنىڭ ەسەبىنەن 20 ماسكانى وتباسىما جىبەرۋ تۋرالى باسشىلىققا ءوتىنىش جاسادىم. مەن وتباسىمدى قاتتى ساعىندىم جانە ولاردى وتە جاقسى كورەمىن» دەدى جازاسىن وتەۋشى. 20 ماسكا سوتتالۋشىنىڭ ايەلى مەن قىزىنا جەتكىزىلدى.
الماتىدا ءبىر جىگىت قوقىس تاسيتىن كولىگىنە ادام جاسىرىپ, بلوك پوستتان الىپ وتپەكشى بولدى. مۇنداي جاعداي الماتى قالاسىندا بىرنەشە مارتە قايتالاندى.
توتەنشە جاعداي جاريالانعانىنا قاراماستان تارازدا ءبىر ءۇي كەلىن ءتۇسىرىپ, بەتاشار توي ىستەدى. اسابا جىگىت «كوروناۆيرۋس كەت, كەت...» دەپ ءان سالىپ, جۇرتتى بيلەتكەن تويدىڭ ۆيدەوسى الەۋمەتتىك جەلىلەردە كەڭىنەن تارادى. بەتاشارعا اجەپتەۋىر حالىق جينالعان. توي يەسى بەس تاۋلىككە قامالىپ, پوليتسيا اساباعا ەسكەرتۋ جاسادى.
جامبىل وبلىسى, جۋالى اۋدانى, نۇرلىكەنت اۋىلىنىڭ ءبىر تۇرعىنى التىنشى بالاسىنىڭ دۇنيەگە كەلۋ قۇرمەتىنە بايلانىستى جۇرتتى جيناپ, كوكپار بەردى.
الماتى وبلىسىنىڭ تاكسيستەرى جولاۋشى تاسىمالداۋدىڭ جاڭا سحەماسىن ويلاپ تاپتى. ياعني, الماتى قالاسى مەن الماتى وبلىسىنىڭ شەكاراسىندا ورنالاسقان ەلدىمەكەندەر كوپ بولعاندىقتان تاكسيستەر ءوز جولاۋشىلارىن بلوكپوستقا جاقىن ماڭداعى ۇيلەردىڭ بىرىنە جەتكىزىپ, ءۇي يەسى جولاۋشىلاردى ءوز ۋچاسكەسى ارقىلى قالاعا وتكىزىپ جىبەرىپ وتىرعان. جولاۋشىلاردى ارعى جاقتا باسقا تاكسي كۇتىپ تۇرادى. وسىلايشا ءبىر ءۇيدىڭ شارباعى كىشىگىرىم كەدەندىك پۋنكتكە اينالىپ, قۇقىق قورعاۋ قىزمەتى انىقتاعانشا ەكى جاققا دا جولاۋشىلار توقتاۋسىز وتە بەرگەن. بۇل قىزمەتى ءۇشىن تاكسيستەر دە, جەر ۋچاسكەسىنىڭ يەلەرى دە اجەپتەۋىر اقشا الىپتى. ءتىپتى, ادام باسىنا 5 مىڭ تەڭگەدەن العان تاكسيستەر ءوز قىزمەتتەرىن جارنامالاپ, WhatsAp جەلىسى ارقىلى حابارلاندىرۋ بەرگەن.
الماتى قالاسىندا كولىك قوزعالىسىنىڭ ازايىپ قالۋى ءبىر جىگىتتەرگە كەرەمەت يدەيا بەرگەن سياقتى. مەگاپوليستىڭ كۇرەتامىرى ىسپەتتەس ءال-فارابي داڭعىلىنىڭ ۇستىندە كەشكە بىرەۋلەر وت جاعىپ, كاۋاپ پىسىرگەن. ياعني, تۋرا كوشەنىڭ ۇستىندە جەڭىل كولىگىنىڭ جۇك سالعىشىنىڭ ەسىگىن اشىپ قويىپ, كوك تۇتىندەتىپ كاۋاپ ءپىسىرىپ جاتقان جاس جىگىتتەردىڭ ۆيدەوسى تارادى. پوليتسيا كوگىلدىر كوكتەمنىڭ كەشىندە «ماەۆكاعا» شىققانداردى تەز انىقتاپ, ونىڭ بىرەۋى 15 تاۋلىككە قاماۋعا الىندى.
ال, قاپشاعايلىق جاستار 23 ناۋرىز تۇنگى ساعات 22:00 شاماسىندا الماتى-وسكەمەن تاسجولىندا اۆتوكولىك جارىسىن ۇيىمداستىرعان. قاپشاعاي قالالىق سوتىمەن قۇقىق بۇزۋشى س. كىنالى دەپ تانىلىپ, وعان جازا رەتىندە, 26510 تەڭگە اكىمشىلىك ايىپپۇل سالىندى.
الماتى وبلىسىندا ءبىر ايەل ءوزىن جۇرتقا «الەۋمەتتىك سالا قىزمەتكەرىمىن» دەپ تانىستىرعان. ءسويتىپ كارانتينگە بايلانىستى ارزان ازىق-ت ۇلىك جەتكىزىپ بەرەمىن دەپ, 73 جاستاعى زەينەتكەردىڭ 100 مىڭعا جۋىق تەڭگەسىن الىپ, ۇشتى-كۇيلى جوق بولىپ كەتىپتى. كەيىنىرەك پوليتسيا بۇل ايەلدىڭ ۇستىنەن بۇعان دەيىن بەس مارتە قىلمىستىق ءىس قوزعالعانىن انىقتادى. بۇل جولى دا الاياق ايەل قولعا ءتۇسىپ, قاريانىڭ قارجىسىن قايتارىپ بەردى.
سەگىز جىلعا سوتتالىپ, پاۆلوداردىڭ تۇرمەلەرىنىڭ بىرىندە جازاسىن وتەپ جاتقان الەكساندر Skype بايلانىسى ارقىلى سۇيىكتىسىنە ءسوز سالدى. ونىڭ سۇيىكتىسىنىڭ ەسىمى ناتاليا ەكەن. توتەنشە جاعداي جاريالانۋىنا بايلانىستى عاشىعىمەن جاقىن ارادا جولىعۋدىڭ ءساتى تۇسپەيتىنىن اڭعارعان الەكساندر تۇرمە باسشىلىعىمەن كەلىسىپ, وسىنداي قادامعا بارىپتى. ەندى الداعى ۋاقىتتا الەكساندر مەن ناتاليا ونلاين ارقىلى نەكەگە تۇرۋدى جوسپارلاپ وتىر. ازىرگە جىگىت ءوز قولىمەن نەكە ساقيناسىن جاساپ, پوشتا ارقىلى سالىپ جىبەردى. ايتپاقشى, تۇرمە باسشىلىعى سوتتالۋشىلار مەن ولاردىڭ وتباسى Skype بايلانىسى ارقىلى ءبىر-بىرلەرىمەن سويلەسۋگە بولاتىنىن جەتكىزدى.
قوستاناي قالاسىندا اۆتوبۋس جۇرگىزۋشىسى جولاۋشىلاردىڭ بىرىنە «ماسكا كيمەيسىڭ بە؟» دەپ ايتقانى ءۇشىن سوققىعا جىعىلدى. كوپ ۇزاماي 31 جاسار بۇزاقى ۇستالىپ, قازىر تەرگەۋ جۇمىستارى ءجۇرىپ جاتىر.
تاراز قالاسىندا بلوك پوستتا تارتىپكە باعىنعىسى كەلمەگەن ءبىر ازامات پوليتسياعا دەنە جاراقاتىن سالدى. پوليتسيا قىزمەتكەرىنىڭ بەتىنەن بىرنەشە مارتە سوققى جاساعان تاراز تۇرعىنى بۇرىن بىرنەشە مارتە سوتتالعان ەكەن.
اقتاۋ قالاسىنىڭ ءبىر تۇرعىنى پودەزىنىڭ كارانتينگە جابىلىپ جاتقانىن كورىپ, ءۇشىنشى قاباتتان سەكىرىپ كەتكەن. بىراق, وڭباي قۇلاپ, ومىرتقاسىن زاقىمداپ الدى. بۇل پودەزدەن كوروناۆيرۋس جۇقتىرعاندار انىقتالعان ەكەن.
الەۋمەتتىك جەلىلەردە اقتاۋ قالاسىنداعى كوپقاباتتى ۇيلەردىڭ ءبىرىنىڭ سۋرەتتەرى تارادى. سۋرەتتەردە پودەزدەن شىعاتىن ەسىك دانەكەرلەنىپ, استىنان كىشكەنتاي تەسىك قالدىرىلعان. ياعني, بۇل ءۇيدىڭ تۇرعىندارى سىرتقا شىعا المايدى, ال, كىشكەنتاي تەسىك سىرتتان زاتتار الۋ ءۇشىن ارنايى جاسالعان كورىنەدى. جەرگىلىكتى اكىمدىك بۇل ءۇيدىڭ توڭىرەگىندە دەزينفەكتسيا جۇمىستارى جۇرگىزىلگەنىن ايتتى. سىرتقى ەسىكتىڭ تەك بەكىتكىشى عانا دانەكەرلەنگەن. ال, كىشكەنتاي تەسىك تۇرعىندارعا ىڭعايلى بولۋ ءۇشىن جاسالىپتى. ياعني, بۇل ءۇيدىڭ تۇرعىندارى سىرتقا شىققىسى كەلمەيدى, ويتكەنى, ولاردى سۋرەتكە ءتۇسىرۋى مۇمكىن. كىشكەنتاي تەسىك سىرتتان زات الىپ تۇرۋ ءۇشىن ارنايى ويىلىپتى.
تەمىرتاۋ قالاسىندا كارانتينگە بايلانىستى بانككە كىرە الماعان ءبىر ايەل قولىنا پىشاق الىپ, ءوتىپ بارا جاتقان جولاۋشىلارعا تۇرا جۇگىرگەن.
37-جاستاعى ازامات شۋ ستانساسىنان اتىراۋعا باراتىن جۇك پويىزىنا جاسىرىنىپ ءمىنىپ كەتكەن. قىزىلوردادا پوليتسيا ءتۇسىرىپ الدى.
«توتەنشە جاعداي كەزىندە 700 مىڭ تەڭگە الەۋمەتتىك كومەك بەرىلەدى» دەگەن جارنامامەن بىرەۋلەر ادامدارعا تەلەفون شالىپ, جەكە كۋالىك, سالىق تولەۋ ءنومىرى سياقتى جەكە اقپاراتتارىن سۇراي باستاعان. پوليتسيا بۇلارعا الدانىپ قالماۋدى ەسكەرتتى.
توعىز اداممەن ستول تەننيسىن ويناپ, كارانتيەن رەجىمىن بۇزعانى ءۇشىن ۇلتتىق بانكتىڭ اقمولا وبلىستىق فيليالىنىڭ ديرەكتورى ءۇش تاۋلىككە قامالدى. ولاردىڭ ەشقايسىسىندا ماسكا بولماعان.
«42500 تەڭگە جاردەماقى بەرەمىز» دەگەن جالعان تەلەگرام-بوت پايدا بولدى. الاياقتار ول اقشانى الۋ ءۇشىن الدىمەن بىرىڭعاي الەۋمەتتىك تولەم تولەۋ قاجەت ەكەنىن ايتىپ, الدەبىر ەسەپ-شوتتاردى جىبەرگەن.
الماتى قالاسى, جەتىسۋ اۋداندىق اكىمدىگىنىڭ قىزمەتكەرلەرى 280 مىڭ تەڭگە كولەمىندە پارا الىپ, تۇرعىنداردىڭ ارى-بەرى وتۋىنە رۇقسات بەرگەن. كۇدىكتىلەر قاماۋعا الىندى.
جامبىل وبلىسىنىڭ ءبىر تاكسيستى كولىكتەگى ءوز ورنىن پوليەتيلەن كلەنكاسىمەن قورشاپ الىپ, جولاۋشىلار تاسىمالداۋدى جالعاستىرا بەرگەن. بۇل قاۋىپتى ىندەتتەن بارىنشا ساقتانعان ءتۇرى بولسا كەرەك.
نۇر-سۇلتان قالاسىنداعى مينيسترلەر ءۇيىنىڭ ماڭىندا قوياندار جۇرگەنى تۋرالى ۆيدەولار پايدا بولدى. شاماسى اق قوياندار اق ورداعا جاقىن جەردەگى ورماننان كەلگەن سياقتى.
ءبىر جاقسىسى, كارانتين كەزىندە بارلىق وڭىرلەر مەن قالالاردا قىلمىستىق وقيعالار ازايدى.