الەم جۇرتىن اۋرەگە سالعان ىندەتتىڭ كەسىرىنەن بيىلعى رامازاندا مۇسىلمان قاۋىم ارقا-جارقا بولىپ اۋىزاشارعا, توپ بولىپ تاراۋىققا قاتىسا المايدى. وسى ورايدا قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ناۋرىزباي قاجى تاعان ۇلى ەلىمىزدە جاريالانعان توتەنشە جاعدايعا بايلانىستى مەشىتتە جاماعاتپەن وقىلاتىن نامازدارعا ۋاقىتشا شەكتەۋ قويىلعانىن اتاپ ءوتتى.
ء«ار ازاماتتىڭ ءومىرى مەن دەنساۋلىعى قىمبات قۇندىلىق بولعاندىقتان, جۇقپالى ىندەتتىڭ الدىن الۋ ءۇشىن وسىنداي شەشىم قابىلداۋعا ءماجبۇر بولدىق. ارينە بۇل – ۋاقىتشا سىناق. الايدا جاماعات نامازى ءۇشىن مەشىت ەسىگى جابىلعانىمەن, ساۋاپ پەن ىزگىلىك ەسىكتەرى ەشقاشان جابىلمايدى. قاسيەتتى حاديس-شاريفتە ايتىلعانداي, مۇسىلماننىڭ نيەتى امالىنان قايىرلى. ونلاين رەجىمدە ناسيحات تىڭداپ, ۇيدەن شىقپاي ساۋاپتى امالدارعا ورتاقتاسۋعا بولادى. اتاپ ايتقاندا, قازاقستان مۇسىلماندارى ءدىني باسقارماسى بيىلعى قاسيەتتى رامازاندا جاماعاتتىڭ يگىلىگى ءۇشىن مىناداي جوبالاردى ىسكە اسىرۋدى جوسپارلاپ وتىر. قازاقستان مۇسىلماندارى ءدىني باسقارماسىنىڭ www.muftyat.kz سايتىنان «رامازان ەنتسيكلوپەدياسى» قوسىمشا پاراقشاسى قوسىلىپ وتىر. ەلىمىزدەگى وبلىس ورتالىقتارى مەن اۋدان, قالالاردىڭ, كەنتتەردىڭ رامازان كەستەسى قازاق جانە ورىس تىلدەرىندە www.muftyat.kz سايتىنا ورنالاستىرىلدى. «حيكمەت تۆ» ستۋدياسى ارقىلى 30 كۇن ورازا بويى بىلىكتى يمامدارىمىز بەن ۇستازدارىمىزدىڭ «وتىز كۇنگە – وتىز ۋاعىز» اتتى ونلاين جوبا دارىستەرى جۇرگىزىلەدى. «حيكمەت تۆ» ستۋدياسى ارقىلى رامازان ايىندا كۇن سايىن رەسپۋبليكالىق «ازىرەت سۇلتان» مەشىتىنىڭ قابىرعاسىندا كۇنىنە ءبىر ساعات ارنايى ونلاين-حاتىم وقىلىپ, قاسيەتتى قادىر تۇنىندە قۇران حاتىم دۇعاسى جاسالادى. سونداي-اق muslim.kz Instagram پاراقشاسى ارقىلى يمامدارمەن ءبىر تولقىندا دۇعا جاساۋعا نيەتتەلگەن جاماعاتتىڭ يگىلىگى ءۇشىن رامازان ايىنىڭ ءبىرىنشى كۇنىنەن باستاپ, كۇندەلىكتى ءار 15 مينۋت سايىن رەسپۋبليكالىق «ازىرەت سۇلتان» مەشىتىنىڭ قابىرعاسىندا «باتامەن ەل كوگەرەر» اتتى ونلاين رەجىمدە دۇعا جاساپ, باتاعا قاتىسۋ ءراسىمى ۇيىمداستىرىلاتىن بولادى», دەدى باس ءمۇفتي.
سونىمەن قاتار ول توتەنشە جاعداي كەزىندە ءپىتىر ساداقاسى مەن زەكەتتى ونلاين رەجىمدە بەرۋدىڭ وڭتايلى جولى ويلاستىرىلعانىن دا ورتاعا سالدى.
«وسىعان دەيىن حابارلاعانىمىزداي بيىل رامازان ايى 24 ساۋىردە باستالادى. بۇل تۋرالى وسىعان دەيىن حابارلادىق. مامىر ايىنىڭ 19-نان 20-سىنا قاراعان ءتۇن – مىڭ ايدان قايىرلى بولعان قاسيەتتى قادىر ءتۇنى. اللا قالاسا 24 مامىردا ورازا ايت نامازىن وقيمىز. جاراتقان جاببار يەمىز ورازا ايتتى مەشىتتەرىمىزدە جاماعاتپەن وقۋدى جازعاي! وسىناۋ قۋانىشتى كۇندى جاقىن ەتكەي! ءامين! رامازان – جاقسىلىقتا جارىساتىن اي. اللا تاعالا قاسيەتتى قۇراندا «باقارا» سۇرەسىنىڭ 148-اياتىندا: «اركىمنىڭ ءبىر بەت الاتىن قۇبىلاسى بار. سوندا جاقسىلىققا جارىسىڭدار», دەپ باياندايدى. اۋىز بەكىتكەن جاندارعا ازىق-ت ۇلىك جەتكىزىپ بەرسەڭىز دە اۋىز اشتىرعاننىڭ ساۋابىن الاسىز. ءتىپتى كومەككە مۇقتاج وتباسىلارعا اۋىزاشارعا كەتەتىن شىعىندى بەرىپ, قارجىلاي قولداۋ كورسەتسەڭىز دە مول ساۋاپقا كەنەلەسىز. جوعارىدا ايتقانىمىزداي, مۇسىلماننىڭ نيەتى امالىنان قايىرلى. وسى رەتتە بارشا وتانداستارىمدى: كومەككە مۇقتاج وتباسىلارعا جان-جاقتى قولداۋ كورسەتۋگە, ەلىمىزدەگى مەشىتتەر ارقىلى اۋىزى بەرىك وتانداستارىمىزعا اۋىزاشار تاعامدار تاراتۋعا شاقىرامىن! ساداقا – پەندەنىڭ مال-داۋلەتىن ازايتپايدى, كەرىسىنشە, بەرەكەسىن ارتتىرادى. ءبىز بەرگەن ساداقا ءبىر وتباسىن قۋانىشقا بولەيدى. ەندەشە كومەككە ءزارۋ شاڭىراقتى شاتتىققا بولەپ, ۇلكەننىڭ باتاسىن الىپ, العىسىنا بولەنەيىك. اللا ەلشىسى: «كىمدە كىم باۋىرىنىڭ قاجەتىن وتەسە, اللا ونىڭ قاجەتىندە بولادى. كىمدە كىم مۇسىلماننىڭ ءبىر قايعىسىن سەيىلتسە, اللا ونىڭ قايعى-قاسىرەتتەرىنىڭ ءبىرىن سەيىلتەدى», دەگەن. حالىق دانالىعىندا ايتىلاتىن: «قايىرىمدىلىق جاساساڭ – قايىرىن ءوزىڭ كورەسىڭ», دەگەن ناقىل ءسوزدىڭ ءمانى وسى بولسا كەرەك. تۇيىندەپ ايتقاندا, ورازا – ساۋاپ جيناپ, رۋحاني كەمەلدەنۋ ايى. رامازان – راببىمىزدىڭ مەيرىم-ماحابباتىنا بولەنەتىن اي», دەدى ناۋرىزباي قاجى تاعان ۇلى.