يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتى 2020 جىلعا ارنالعان كەشەندى ماقساتتى باعدارلامانى بەكىتتى. ونىڭ مىندەتى – حالىقارالىق جانە رەسپۋبليكالىق ماڭىزعا يە جولداردا قىسقى كەزەڭنىڭ سالدارىنان پايدا بولعان ولقىلىقتاردى جويۋ.
15 ساۋىردەن باستاپ قازاقستاننىڭ جولدارىندا جول جابىندىسىنىڭ ولقىلىقتارىن جويۋعا باعىتتالعان جىل سايىنعى ەكى ايلىق باستالادى. ەكى اي ىشىندە شۇڭقىرلاردى جاماۋ, جول بەلگىلەرىن ورناتۋ جانە جولداردى تاڭبالاۋ سياقتى جۇمىستاردىڭ جىلدىق كولەمىنىڭ 60%-ى ورىندالماق.
اتالعان جۇمىستار 15 ءساۋىر مەن 15 ماۋسىم ارالىعىندا الماتى, اتىراۋ, جامبىل, قىزىلوردا, ماڭعىستاۋ جانە تۇركىستان وبلىستارىندا, 1 مامىر مەن 1 شىلدە ارالىعىندا اقمولا, اقتوبە, باتىس قازاقستان, شىعىس قازاقستان, قاراعاندى, قوستاناي, پاۆلودار جانە سولتۇستىك قازاقستان وبلىستارىندا جۇرگىزىلەتىن بولادى.
باعدارلاماعا سايكەس ەل جولدارىنىڭ 463 مىڭ شارشى مەترىندە شۇڭقىرلاردى جاماۋ جۇمىستارى جۇرگىزىلىپ, 13,4 مىڭ جول بەلگىلەرى مەن اقپاراتتىق نىساندار ورناتىلادى دەپ كۇتىلۋدە. جولشىلار ۇزىندىعى 37,1 مىڭ شاقىرىمدى قۇرايتىن جولداردىڭ قوزعالىس بولىگىن تاڭبالاپ, جول بويىنداعى قورشاۋلاردىڭ 37,5 مىڭ ىلەسپە مەترىن ورناتۋى, جوندەۋى ءتيىس. سونىمەن قاتار جولداردىڭ 8,4 مىڭ شارشى مەترىندە شۋىل جولسىزىعى توسەلەتىن بولادى دەپ جوسپارلانۋدا. جۇمىستاردى «قازاقاۆتوجول» جشس جۇزەگە اسىرادى.