قازىر كىمگە وڭاي دەيسىز؟ كوپشىلىگى تابىسىنان ايىرىلدى. ءبارى دە وتباسىن, بالالارىن اسىراۋ ءۇشىن تابىس تاپقىسى كەلەدى.
ءبىز قۇلسارى قالاسىندا تۇرامىز. وتباسىمىزداعى ءتورت بالانىڭ ەكەۋى – ەرەسەك, ەكەۋى مەكتەپتە وقيدى. سەرۆيستىك قىزمەت كورسەتەتىن وتباسىلىق جەكە كاسىپكەرلىگىمىز بار. وعان كۇيەۋىم باسشىلىق جاساپ, ءوزىم سوندا جۇمىس ىستەدىم.
قاۋىپتى ىندەتتىڭ تارالۋىنا وراي كاسىبىمىزدى توقتاتۋعا تۋرا كەلدى. شىندىعىندا جۇمىسسىز ءارى تابىسسىز قالىپ, نە ىستەرىمىزدى بىلمەدىك. وسىنداي ساتتە مەملەكەتتىڭ ءبىز سەكىلدى جاندارعا قولداۋ كورسەتىپ جاتقانىن ەستىپ, كۇيەۋىمىز ەكەۋمىز دە 42 500 تەڭگەنىڭ الەۋمەتتىك تولەمىن الۋعا ءوتىنىش بەردىك. ءۇش كۇننەن كەيىن ارقايسىمىزدىڭ جەكە ەسەپشوتىمىزعا الەۋمەتتىك تولەم قارجىسى ءتۇستى.
بۇل – جۇمىسسىز قالعاندارعا كورسەتىلگەن قارجىلاي دەمەۋ. مۇنداي كومەكتى بەيرەسمي جۇمىس ىستەگەندەر دە, بالا كۇتىمىمەن وتىرعان انالار دا, ءتىپتى توتەنشە جاعداي ەنگىزىلگەنگە دەيىن جۇمىس ىستەگەن ستۋدەنتتەر دە الۋىنا بولادى ەكەن. ءبىزدىڭ مەملەكەتتىڭ قيىن كەزدە ەشكىمدى ەلەۋسىز قالدىرماعانى قۋانتادى.
ءلاززات ق ۇلىمباەۆا,
كوپ بالالى انا
اتىراۋ وبلىسى,
جىلىوي اۋدانى